കൊച്ചി: സംസ്ഥാനത്ത് സ്വര്‍ണവിലയില്‍ ഇന്ന് വീണ്ടും ഇടിവ്. നേരിയ ഇടിവാണ് ഇന്ന് രേഖപ്പെടുത്തിയിരിക്കുന്നത്. യു.എസ് പ്രസിഡന്റ് ട്രംപും റഷ്യന്‍ പ്രസിഡന്റ് പുടിനും തമ്മിലെ 'സമാധാന ചര്‍ച്ച'യാണ് സ്വര്‍ണവിലയുടെ കുതിപ്പിന് കടിഞ്ഞാണിട്ടതെന്ന്  നിരീക്ഷകര്‍ വിലയിരുത്തുന്നു. കൂടാതെ ചൈനയും അമേരിക്കയും തമ്മിലുള്ള തീരുവ യുദ്ധത്തിന് താല്‍ക്കാലിക വിരാമമായതും സ്വര്‍ണത്തിന് തിരിച്ചടിയായി. എന്നാല്‍ രാജ്യാന്തരത്തിലുള്‍പെടെ വലി ഇടിവൊന്നും നിലവില്‍ സ്വര്‍ണത്തിന് സംഭവിച്ചിട്ടില്ല. അതേസമയം, വരാനിരിക്കുന്ന രാഷ്ട്രീയ സാഹചര്യങ്ങളില്‍ സ്വര്‍ണ വിപണിയില്‍ വമ്പന്‍ മാറ്റങ്ങളുണ്ടായേക്കാമെന്നും റിപ്പോര്‍ട്ടുകള്‍ സൂചിപ്പിക്കുന്നു. പണപ്പെരുപ്പം കുറഞ്ഞത് പലിശ കുറയാന്‍ കാരണമായാല്‍ വില കൂടിയേക്കാമെന്ന് സാമ്പത്തിക വിദഗ്ധര്‍ ചൂണ്ടിക്കാട്ടുന്നു. ഇന്ത്യയില്‍ നിന്നുള്ള ഇറക്കുമതിക്ക് അമേരിക്ക തീരുവ വര്‍ധിപ്പിച്ചത് അടക്കമുള്ള ഘടകങ്ങള്‍ സ്വര്‍ണവിലയെ സ്വാധീനിക്കുന്നുണ്ട്.  

റെക്കോര്‍ഡുകള്‍ ഭേദിച്ച് കുതിക്കുന്നതിനിടെയാണ് സ്വര്‍ണവിലയില്‍ ശനിയാഴ്ച മുതല്‍ ഇടിവ് രേഖപ്പെടുത്താന്‍ തുടങ്ങിയത്. വെള്ളിയാഴ്ച 75,760 രൂപയോടെ സര്‍വ്വകാല റെക്കോര്‍ഡ് ആയിരുന്നു സ്വര്‍ണത്തിന്റെ വില. 1440 രൂപയിലധികമാണ്  നാലു ദിവസത്തിനിടെ പവന് കുറഞ്ഞത്.  ഈ മാസത്തിന്റെ ആദ്യത്തില്‍ 73,200 രൂപയായിരുന്നു 22 കാരറ്റ് പവന്‍ സ്വര്‍ണത്തിന്റെ വില. ഒരാഴ്ചക്കിടെ 2500 രൂപയിലധികം വര്‍ധിച്ച ശേഷമാണ് ശനിയാഴ്ച മുതല്‍ കുറഞ്ഞു തുടങ്ങിയത്.

ALSO READ: പ്രാര്‍ഥനായോഗത്തിലേക്ക് ജയ് ശ്രീറാം വിളിയുമായി ഇരച്ചെത്തി; ബിഹാറിലും ക്രിസ്ത്യാനികള്‍ക്കെതിരേ ഛത്തിസ്ഗഡ് മോഡല്‍ ബജ്‌റംഗ്ദള്‍ ആക്രമണം; ചിലരെ ഹിന്ദുമതത്തിലേക്ക് മാറ്റി

ഇന്നത്തെ വില ഇങ്ങനെ 
കേരളത്തില്‍ ഇന്ന് ഒരുവിഭാഗം വ്യാപാരികള്‍ ഗ്രാമിന് 5 രൂപ കുറച്ച് വില ഇന്ന് 9,290 രൂപയാക്കിട്ടുണ്ട്. പവന് 40 രൂപ കുറഞ്ഞ് 74,320 രൂപയുമാണ്. 22 കാരറ്റ് സ്വര്‍ണത്തിന്റെ വിലയാണിത്. വിലയില്‍ മാറ്റം വരുത്തിയ വിഭാഗത്തിന്റെ 18 കാരറ്റ് സ്വര്‍ണത്തിന് ഗ്രാമിന് 7,675 രൂപയാണ് വില.  വെള്ളി വില ഗ്രാമിന് 124 രൂപയില്‍ നിലനിര്‍ത്തി. എന്നാല്‍, മറ്റൊരുവിഭാഗം വ്യാപാരികള്‍ സ്വര്‍ണം, വെള്ളി വിലകളില്‍ മാറ്റം വരുത്തിയിട്ടില്ല. 14 കാരറ്റ് സ്വര്‍ണവില ഗ്രാമിന് മാറ്റമില്ലാതെ 5,940 രൂപയിലും 9 കാരറ്റ് വില 3,820 രൂപയിലുമാണ്. 

വ്യത്യസ്ത കാരറ്റുകളുടെ വില അറിയാം
24 കാരറ്റ്
ഗ്രാമിന് 5രൂപ കുറഞ്ഞ് 10,135
പവന് 40 രൂപ കുറഞ്ഞ് 81,080

22 കാരറ്റ് 
ഗ്രാമിന് 5 രൂപ കുറഞ്ഞ് 9,290
പവന് 40 രൂപ കുറഞ്ഞ് 74,320

18 കാരറ്റ്
ഗ്രാമിന് 4 രൂപ കുറഞ്ഞ് 7,601
പവന് 32 രൂപ കുറഞ്ഞ് 60,808 

രാജ്യാന്തരവില ഔണ്‍സിന് 3,343 ഡോളറില്‍ നിന്ന്  3,351 ഡോളറിലെത്തി. ഇന്ന് ഇന്ത്യന്‍ രൂപ ഡോളറിനെതിരെ 6 പൈസ ഉയര്‍ന്ന് 87.65ല്‍ ആണ് വ്യാപാരം ആരംഭിച്ചത്. ഇതാണ്, ഒരു വിഭാഗം സ്വര്‍ണവില നേരിയതോതില്‍ കുറയ്ക്കാന്‍ കാരണമെന്ന് നിരീക്ഷകര്‍ വ്യക്തമാക്കി. 

വില കുറഞ്ഞത് ആശ്വാസം, അഡ്വാന്‍സ് ബുക്കിങ് ആണ് നല്ലത്
ഓണവും വിവാഹ സീസണുമെല്ലാം ഒന്നിച്ച് വരുന്ന ഈ സാഹചര്യത്തില്‍ വില കുറഞ്ഞു വരുന്നത് ഉപഭോക്താക്കള്‍ക്ക് ആശ്വാസമാണ്. അത്യാവശ്യം അല്ല എങ്കില്‍ അഡ്വാന്‍സ് ബുക്കിങ് വിപണി അസ്ഥിരമായ സാഹചര്യങ്ങളില്‍ ഏറ്റവും ഉചിതം. അതാവുമ്പോള്‍ കുറഞ്ഞ വിലക്ക് സ്വര്‍ണം ലഭിക്കാനുള്ള ഒരു സാധ്യതയുണ്ട്. ബുക്ക് ചെയ്യുമ്പോഴുള്ള വിലയാണ് കുറവെങ്കില്‍ ആ വിലക്കും വാങ്ങുമ്പോഴുള്ള വിലയാണ് കുറവെങ്കില്‍ ആ വിലക്കുമാണ് സ്വര്‍ണം ലഭിക്കുക. 

Gold prices in Kerala see a slight dip today due to global factors, including peace talks between Trump and Putin, and a temporary pause in the US-China trade war. Experts predict possible fluctuations in the gold market ahead of key political and economic developments.