അബഹ: സഊദി അറേബ്യയില്‍ പ്രവാസി മലയാളി ജോലിക്കിടെ കുഴഞ്ഞുവീണ് മരിച്ചു. ചങ്ങനാശ്ശേരി മടുക്കുംമൂട് സ്വദേശി പള്ളിപ്പറമ്പില്‍ നവാസ് അബ്ദുല്‍ ഖാദര്‍(53) ആണ് മരിച്ചത്. കുഴഞ്ഞുവീണതിനെത്തുടര്‍ന്ന് ഹയാത്ത് ആശുപത്രിയിലെ അത്യാഹിത വിഭാഗത്തില്‍ ചികിത്സയില്‍ കഴിയവെ ഹൃദയാഘാതം മൂലമാണ് മരണം.

മിനി ട്രക്ക് ഡ്രൈവറായി ജോലിചെയ്തുവരികയായിരുന്നു നവാസ്. ജോലിയുടെ ഭാഗമായി സാധനങ്ങളെടുക്കാന്‍ ജിദ്ദയില്‍ നിന്നും മുന്ന് ദിവസം മുമ്പാണ് നവാസ് വാഹനവുമായി അബഹയില്‍ എത്തിയത്. ട്രക്കിനുള്ളിലേക്ക് സാധനങ്ങള്‍ കയറ്റുന്നതിനിടെ ദേഹാസ്വാസ്ഥ്യമനുഭവപ്പെട്ട് കുഴഞ്ഞുവീഴുകയായിരുന്നുവെന്ന് സുഹൃത്തുക്കള്‍ അറിയിച്ചു. ഉടന്‍ ആശുപത്രിയില്‍ എത്തിക്കുകയും ചെയ്തു.

സുലൈഖാ ബീവിയാണ് നവാസിന്റെ ഭാര്യ. മക്കള്‍: മുഹമ്മദ് മനാഫ്, മുഹമ്മദ് സല്‍മാന്‍, സോന നവാസ്. വിവരമറിഞ്ഞ് റിയാദില്‍ ജോലി ചെയ്യുന്ന ഭാര്യാ സഹോദരന്‍ അലാമിന്‍ അബഹയില്‍ എത്തിയിട്ടുണ്ട്. നടപടികള്‍ പൂര്‍ത്തിയാക്കിയ ശേഷം മയ്യിത്ത് നാട്ടിലെത്തിച്ച് മറവുചെയ്യും. സന്തോഷ് കൈരളി, ഡോ.ഖാദര്‍ എന്നിവരുടെ നേതൃത്വത്തിലാണ് നടപടികള്‍ പൂര്‍ത്തിയാക്കുന്നത്.

Expatriate Malayali dies after collapsing while working in Saudi Arabia