തിരുവനന്തപുരം: അപകടങ്ങള്‍ ഉണ്ടാവുന്ന പശ്ചാത്തലത്തില്‍ ഉത്സവങ്ങളിലെ കെട്ടുകാഴ്ചകള്‍ക്കും ഫ്‌ളോട്ടുകള്‍ക്കും നിയന്ത്രണം ഏര്‍പ്പെടുത്തി വൈദ്യുതി വകുപ്പിന്റെ ഉത്തരവ്. വിദൂര സ്ഥലങ്ങളില്‍ നിന്ന് ഉത്സവ സ്ഥലങ്ങളിലേക്ക് കൊണ്ടുവരുന്ന വാടക കെട്ടുകാഴ്ചകളും ഫ്‌ളോട്ടുകളും ഒഴിവാക്കണമെന്നാണ് ഉത്തരവില്‍ പറയുന്നത്. എന്നാല്‍ ഇത് സംസ്ഥാനത്തെ വിവിധ ആരാധനാലയങ്ങളിലെ കമ്മിറ്റികളുമായി ചര്‍ച്ച ചെയ്ത ശേഷമേ ഉത്തരവ് കര്‍ശനമായി നടപ്പാക്കൂ എന്നും ഉദ്യോഗസ്ഥര്‍ വ്യക്തമാക്കി.

ആരാധനാലയങ്ങളിലെ ആഘോഷങ്ങള്‍ക്ക് എല്ലാ കാലത്തും മാറ്റുണ്ടാക്കുന്നത് കെട്ടുകാഴ്ചകളാണ്. കൂറ്റന്‍ നീളവും ഉയരവുമുള്ള എടുപ്പ് കുതിരയും കാളയും തേരും ഫ്‌ളോട്ടും കണ്ട് ആസ്വദിക്കുന്നതാണ് മലയാളികള്‍ക്ക് ഉത്സവക്കാഴ്ച. വിദൂര സ്ഥലങ്ങളില്‍ നിന്ന് വാടക കെട്ടുകാഴ്ചകള്‍ ഉത്സവ സ്ഥലങ്ങളിലേക്ക് കൊണ്ടുവരുന്നത് പൂര്‍ണമായും ഒഴിവാക്കുകയും പകരം ആരാധനാലയങ്ങളുടെ ഏറ്റവും അടുത്തു നിന്ന് തന്നെ ഇവ കൊണ്ടുവരാനും ശ്രമിക്കണം.

വാടകയ്ക്ക് കൊണ്ടുവരേണ്ട സാഹചര്യമുണ്ടായാല്‍ വൈദ്യുതി ലൈനുകള്‍ അഴിക്കേണ്ടാത്ത രീതിയില്‍ വേണം. മാത്രമല്ല കെട്ടുകാഴ്ചകളുടെ ഉയരം നിജപ്പെടുത്തുകയും കൊണ്ടുവരാന്‍ പൊലിസിന്റെയും കെഎസ്ഇബിയുടെയും മുന്‍കൂര്‍ അനുമതിയും വാങ്ങേണ്ടതായിരിക്കും. അനുമതിയില്ലാതെ ഇവ കൊണ്ടുവന്നാല്‍ ദുരന്തനിവാരണ നിയമ പ്രകാരം കേസെടുക്കുന്നതാണ്.

 വാടക കെട്ടുകാഴ്ചകള്‍ ഉപയോഗിക്കുകയാണെങ്കില്‍ അവ ആരാധനാലയങ്ങളുടെ പരിസരത്ത് കൊണ്ടുവന്ന് കെട്ടുകയും ഉത്സവശേഷം അഴിച്ച് തിരികെ കൊണ്ടുപോവുകയും വേണം. ദീപാലങ്കാരങ്ങള്‍ സംബന്ധിച്ച് ഇലക്ട്രിക്കല്‍ ഇന്‍സ്‌പെക്ടറേറ്റ് പരിശോധന നടത്തി സുരക്ഷ ഉറപ്പാക്കണമെന്നും നിര്‍ദേശത്തില്‍ പറയുന്നുണ്ട്.

In the wake of recurring accidents, the Kerala Electricity Department has issued an order to regulate large decorative structures and floats used in temple festivals. The directive advises against bringing rented structures and floats from distant locations.