ഇന്ത്യയിലെ മുൻനിര എസ്‌യുവി നിർമാതാക്കളായ മഹീന്ദ്ര കഴിഞ്ഞ കുറച്ച് മാസങ്ങളായി വിൽപ്പന ചാർട്ടുകളിൽ തരംഗം സൃഷ്ടിക്കുകയാണ്. പുതിയ ഇലക്ട്രിക് വാഹനങ്ങളുടെ വരവോടെ ഹ്യുണ്ടായിയെ പിന്തള്ളി രാജ്യത്തെ രണ്ടാമത്തെ വലിയ കാർ നിർമാതാക്കളായി ഇതോടെ മഹീന്ദ്ര മാറി. ഈ വർഷം ജൂലൈയിൽ 49,871 യൂണിറ്റുകൾ വിറ്റഴിക്കാൻ കമ്പനിക്ക് കഴിഞ്ഞു. 2024 ജൂലൈയിലെ 41,623 യൂണിറ്റുകളെ അപേക്ഷിച്ച് 20% വാർഷിക വളർച്ചയാണ് കമ്പനി രേഖപ്പെടുത്തിയത്. സ്കോർപിയോ, ഥാർ, ബൊലേറോ തുടങ്ങിയ എസ്‌യുവികൾ ചൂടപ്പം പോലെയാണ് വിപണിയിൽ വിറ്റഴിക്കപ്പെടുന്നത്.

എന്നാൽ, മഹീന്ദ്രയുടെ മോഡൽ നിരയിൽ ഒരു വാഹനം കഴിഞ്ഞ രണ്ട് വർഷമായി വിൽപ്പനയിൽ പിന്നോക്കം നിൽക്കുകയായിരുന്നു - മഹീന്ദ്ര മറാസോ എംപിവി. 2024 ജൂലൈയിൽ മറാസോ വെബ്‌സൈറ്റിൽ നിന്ന് നീക്കം ചെയ്തപ്പോൾ മോഡൽ നിർത്തലാക്കിയെന്ന് വാർത്തകൾ പരന്നു. എന്നാൽ, വില വർധനവോടെ മറാസോ വീണ്ടും വെബ്‌സൈറ്റിൽ ലിസ്റ്റ് ചെയ്യപ്പെട്ടു. ഇതോടെ വിൽപ്പന കൂപ്പുകുത്തി, ചില മാസങ്ങളിൽ 0, 4, 6, 7, 8 യൂണിറ്റുകൾ മാത്രമായി ചുരുങ്ങുകയും ചെയ്തു.

ALSO READ: മഹീന്ദ്രയുടെ മെഗാ ലോഞ്ച് നാളെ; നാല് പുതിയ കൺസെപ്റ്റ് എസ്‌യുവികൾ, പുതുക്കിയ ബൊലേറോ നിയോ, ഫ്രീഡം എൻ‌യു പ്ലാറ്റ്‌ഫോം അവതരിപ്പിക്കും

 

 

പക്ഷേ, ജൂലൈയിൽ മറാസോ ഏവരെയും ഞെട്ടിച്ചു. 176 യൂണിറ്റുകളാണ് ഈ വർഷം ജൂലൈയിൽ വിറ്റഴിച്ചത്. 2024 ജൂലൈയിലെ 14 യൂണിറ്റുകളെ അപേക്ഷിച്ച് 1000%ലധികം വാർഷിക വളർച്ചയാണ് നേടിയത്. ഈ വർഷം ജൂണിൽ വെറും 17 യൂണിറ്റുകൾ മാത്രമായിരുന്നു വിൽപ്പന. ഈ കുതിപ്പിന് പിന്നിൽ 2 ലക്ഷം രൂപയുടെ വമ്പൻ ഡിസ്‌കൗണ്ടാണ്. മുമ്പ് 50,000 രൂപ ഡിസ്‌കൗണ്ട് നൽകിയിരുന്ന കാറിന് ജൂലൈയിൽ ആദ്യമായി ഇത്രയും വലിയ ഓഫർ പ്രഖ്യാപിച്ചതാണ് വിൽപ്പനയെ കുത്തനെ ഉയർത്തിയത്.

 എന്തായാലും ഇത് സ്റ്റോക്ക് തീർക്കാനുള്ള തന്ത്രമായിരിക്കാമെന്നാണ് വിപണി നിരീക്ഷകർ വിലയിരുത്തുന്നത്. ഇന്ത്യൻ കുടുംബങ്ങൾക്ക് അനുയോജ്യമായ കാർ ആണെങ്കിലും, മറാസോ വിപണിയിൽ പിന്നിലാണ്. അപ്‌ഡേറ്റുകളുടെ അഭാവവും മാരുതി എർട്ടിഗ, കിയ കാരൻസ്, ടൊയോട്ട റൂമിയോൺ തുടങ്ങിയ 7 സീറ്റർ എംപിവികളുമായുള്ള കടുത്ത മത്സരവുമാണ് പ്രധാന കാരണങ്ങൾ. ഉപഭോക്തൃ മുൻഗണനകൾ മാറിയതും മറാസോയ്ക്ക് തിരിച്ചടിയായി. മഹീന്ദ്ര മറാസോയെ നവീകരിച്ച് വിപണിയിൽ തിരിച്ചെത്തിക്കുകയോ അല്ലെങ്കിൽ മോഡൽ നിർത്തലാക്കുകയോ ചെയ്യാനാണ് സാധ്യത.

 

 

മറാസോ: ഫാമിലി കാറിന്റെ പ്രത്യേകതകൾ

മറാസോ ഒരു മികച്ച ഫാമിലി എംപിവിയാണ്. എല്ലാ വേരിയന്റുകളിലും ഡ്യുവൽ എയർബാഗുകൾ, എബിഎസ്, ഇബിഡി, റിയർ പാർക്കിംഗ് സെൻസർ തുടങ്ങിയ സുരക്ഷാ ഫീച്ചറുകൾ ലഭ്യമാണ്. 7.0 ഇഞ്ച് ഇൻഫോടെയ്ൻമെന്റ് സിസ്റ്റം (ആൻഡ്രോയിഡ് ഓട്ടോ, ആപ്പിൾ കാർപ്ലേ പിന്തുണയോടെ), റിമോട്ട് കീ-ലെസ് എൻട്രി, ഓട്ടോ ക്ലൈമറ്റ് കൺട്രോൾ, 17 ഇഞ്ച് അലോയ് വീലുകൾ എന്നിവയാണ് മറ്റ് പ്രധാന സവിശേഷതകൾ.

1.5 ലിറ്റർ ഡീസൽ എഞ്ചിൻ 121 bhp കരുത്തും 300 Nm ടോർക്കും നൽകുന്നു. 6 സ്പീഡ് മാനുവൽ ഗിയർബോക്സുമായി ബന്ധിപ്പിച്ച ഈ എഞ്ചിൻ 18-22 കിലോമീറ്റർ മൈലേജ് വാഗ്ദാനം ചെയ്യുന്നതായി മഹീന്ദ്ര അവകാശപ്പെടുന്നു. 7, 8 സീറ്റ് ഓപ്ഷനുകളിൽ ലഭ്യമായ മറാസോയുടെ എക്സ്-ഷോറൂം വില 14.59 ലക്ഷം മുതൽ 17 ലക്ഷം രൂപ വരെയാണ്.

Mahindra Marazzo, a family MPV, saw a sales surge in July 2025 with 176 units sold, a 1000%+ annual growth, driven by a Rs 2 lakh discount replacing the earlier Rs 50,000 offer. Despite features like airbags, ABS, and a 7-inch infotainment system, the model struggles due to outdated features and competition from Maruti Ertiga and Kia Carens