ന്യൂഡൽഹി: പശ്ചിമ ബംഗാളിൽ നിന്നുള്ള മുസ്‌ലിം കുടിയേറ്റ തൊഴിലാളികളെ ബംഗ്ലാദേശ് പൗരന്മാരെന്ന് ആരോപിച്ച് തടവിലാക്കുന്ന സംഭവങ്ങളിൽ കേന്ദ്ര സർക്കാരിനും ഒൻപത് സംസ്ഥാനങ്ങൾക്കും സുപ്രിംകോടതി നോട്ടിസ് അയച്ചു. ഒഡീഷ, രാജസ്ഥാൻ, മഹാരാഷ്ട്ര, ഡൽഹി, ബിഹാർ, ഉത്തർപ്രദേശ്, ഛത്തീസ്ഗഢ്, ഹരിയാന, പശ്ചിമ ബംഗാൾ എന്നീ സംസ്ഥാനങ്ങൾക്കാണ് കോടതി നോട്ടീസ് നൽകിയത്.

കഴിഞ്ഞ മെയ് മാസം കേന്ദ്ര ആഭ്യന്തര മന്ത്രാലയം പുറപ്പെടുവിച്ച സർക്കുലറിന്റെ അടിസ്ഥാനത്തിൽ, വിവിധ സംസ്ഥാന അധികാരികൾ ബംഗാളി മുസ്‌ലിം കുടിയേറ്റ തൊഴിലാളികളെ ക്രമരഹിതമായി പിടികൂടി, ബംഗ്ലാദേശികളെന്ന് ആരോപിച്ച് തടവിലാക്കുകയാണെന്ന് പശ്ചിമ ബംഗാൾ മൈഗ്രന്റ് വർക്കേഴ്‌സ് വെൽഫെയർ ബോർഡ് സുപ്രീംകോടതിയിൽ ചൂണ്ടിക്കാട്ടി.

ALSO READ: വോട്ടർപട്ടിക തിരയാൻ പറ്റുന്ന രീതിയിൽ പ്രസിദ്ധീകരിക്കണം: വോട്ടർമാരെ ബുദ്ധിമുട്ടിക്കുന്ന രീതിയിൽ ആകരുത്; സുപ്രിംകോടതി

ഈ വിഷയത്തിൽ പരിശോധന നടത്തിയ എല്ലാ കേസുകളിലും തടവിലാക്കപ്പെട്ടവർ ഇന്ത്യൻ പൗരന്മാരാണെന്ന് കണ്ടെത്തിയതായി ബോർഡിന് വേണ്ടി ഹാജരായ അഭിഭാഷകൻ പ്രശാന്ത് ഭൂഷൺ ജസ്റ്റിസ് സൂര്യകാന്ത്, ജസ്റ്റിസ് ജോയ്മല്യ ബാഗ്ചി എന്നിവർ അടങ്ങിയ ബെഞ്ചിന് മുന്നിൽ വാദിച്ചു.

കുടിയേറ്റ തൊഴിലാളികളുടെ മാതൃസംസ്ഥാനവും ഉപജീവനത്തിനായി കുടിയേറിയ സംസ്ഥാനങ്ങളും തമ്മിൽ ഏകോപനം ഉറപ്പാക്കാൻ ഒരു നോഡൽ ഏജൻസി ആവശ്യമാണെന്ന് ജസ്റ്റിസ് സൂര്യകാന്ത് നിരീക്ഷിച്ചു. ഇപ്പോൾ ഇടക്കാല ഉത്തരവ് പുറപ്പെടുവിക്കുന്നില്ലെന്നും ബെഞ്ച് വ്യക്തമാക്കി.

ALSO READ: കുഞ്ഞുങ്ങൾ മരിച്ചു വീഴുന്നു, അങ്ങയുടെ വെളിച്ചം പകരൂ: ഗസ്സ സന്ദർശിക്കാൻ മാർപാപ്പയോട് അഭ്യർഥിച്ച് പോപ്പ് ഗായിക മഡോണ

The Supreme Court has issued notices to the Centre and nine states over the alleged illegal detention of Bengali Muslims, seeking their response on the matter