ഇന്ത്യൻ ടെസ്റ്റ് ഇതിഹാസം ചേതേശ്വർ പൂജാര ക്രിക്കറ്റിലെ മൂന്ന് ഫോർമാറ്റുകളിൽ നിന്നും വിരമിക്കൽ പ്രഖ്യാപിച്ചിരിക്കുകയാണ്. കഴിഞ്ഞ ദിവസങ്ങളിലാണ് പൂജാര തന്റെ വിരമിക്കൽ പ്രഖ്യാപനം ക്രിക്കറ്റ് ലോകത്തെ അറിയിച്ചത്. കഴിഞ്ഞ രണ്ട് വർഷമായി ഇന്ത്യൻ ടെസ്റ്റ് ടീമിൽ പൂജാരക്ക് സ്ഥാനം ഉണ്ടായിരുന്നില്ല. 2023ൽ വേൾഡ് ടെസ്റ്റ് ചാമ്പ്യൻഷിപ്പിന്റെ ഫൈനലിൽ ഓസ്ട്രേലിയക്കെതിരെയാണ് പൂജാര അവസാനമായി ഇന്ത്യക്ക് വേണ്ടി കളിച്ചത്. 

ഇപ്പോൾ പൂജാര ടെസ്റ്റ് ക്രിക്കറ്റിൽ നടത്തിയ മികച്ച പ്രകടനങ്ങളെക്കുറിച്ച് സംസാരിച്ചിരിക്കുകയാണ് ഇന്ത്യൻ ഇതിഹാസ സ്പിന്നർ ആർ അശ്വിൻ. പൂജാര ഇല്ലായിരുന്നെങ്കിൽ വിരാട് കോഹ്‌ലി ഇത്രയും റൺസ് നേടുമായിരുന്നില്ലെന്നാണ് അശ്വിൻ വ്യക്തമാക്കിയത്. തന്റെ യുട്യൂബ് ചാനലിലൂടെയാണ് അശ്വിന്റെ പ്രതികരണം. 

''ക്രിക്കറ്റിൽ എല്ലാ താരങ്ങളും ശ്രദ്ധിക്കപ്പെടുന്നില്ല. എന്നാൽ അതിന്റെ അർത്ഥം അവർ നൽകിയ സംഭാവനകൾ കുറഞ്ഞു പോയി എന്നതല്ല. വിശ്വസിച്ചാലും ഇല്ലെങ്കിലും ഇന്ത്യൻ ടീമിൽ മൂന്നാം നമ്പറിൽ പൂജാരയുടെ സംഭാവനകൾ വിരാട് കോഹ്‌ലിയുടെ റൺസ് വർദ്ധിപ്പിക്കുന്നതിൽ നിർണായകമായ പങ്കുവഹിച്ചുണ്ട്'' അശ്വിൻ പറഞ്ഞു. 

ഇന്ത്യക്കായി ടെസ്റ്റിൽ 2010ൽ അരങ്ങേറ്റം കുറിച്ച പൂജാര 103 മത്സരങ്ങളിൽ 176 ഇന്നിങ്സുകളിൽ 7195 റൺസ് ആണ് നേടിയിട്ടുള്ളത്. ടെസ്റ്റ് ക്രിക്കറ്റിൽ 19 സെഞ്ച്വറികളും 35 അർദ്ധ സെഞ്ച്വറികളും പൂജാര സ്വന്തമാക്കിയിട്ടുണ്ട്.  2018-19ൽ  ഓസ്ട്രേലിയയിൽ നടന്ന ടെസ്റ്റ് പരമ്പരയിലെ ഇന്ത്യയുടെ ചരിത്ര വിജയത്തിൽ നിർണായക പങ്കായിരുന്നു പൂജാര വഹിച്ചിരുന്നത്.  ആ പരമ്പരയിലൂടനീളം മികച്ച പ്രകടനമായിരുന്നു താരം നടത്തിയത്. 521 റൺസ് ആണ് പൂജാര ഓസ്ട്രേലിയൻ പരമ്പരയിൽ നേടിയത്.

Indian legend spinner R Ashwin has spoken about Cheteshwar Pujara's excellent performances in Test cricket. Ashwin stated that Virat Kohli would not have scored so many runs without Pujara.