ചണ്ഡീഗഢ്: പശു ഒരു പുണ്യമൃഗമാണെന്നും ചില പ്രവൃത്തികൾ ഒരു പ്രധാന ജനവിഭാഗത്തിന്റെ വിശ്വാസങ്ങളെ വ്രണപ്പെടുത്തുമ്പോൾ അത് സമാധാനത്തെ സാരമായി ബാധിക്കുമെന്നും പഞ്ചാബ്, ഹരിയാന ഹൈക്കോടതി. ഗോവധക്കേസിലെ ആരോപണവിധേയനായ നൂഹ് സ്വദേശി ആസിഫിന്റെ ജാമ്യവുമായി ബന്ധപ്പെട്ട ഹരജി പരിഗണിക്കെയാണ് കോടതിയുടെ പരാമർശം. കേസിൽ ആസിഫിന് കോടതി ജാമ്യം നിഷേധിച്ചു.

മുൻകാല ജുഡീഷ്യൽ ഇളവ് ദുരുപയോഗം ചെയ്ത ആസിഫ് പതിവ് കുറ്റവാളി ആണെന്നും കോടതി പറഞ്ഞു. പശുക്കളെ ആവർത്തിച്ച് കശാപ്പ് ചെയ്യുന്നത് നിയമപരമായ ലംഘനം മാത്രമല്ല, രാജ്യത്തിന്റെ സാംസ്കാരിക ഘടനയ്ക്കും ഭരണഘടനാ മൂല്യങ്ങൾക്കും എതിരായ അപമാനവുമാണെന്ന് ജസ്റ്റിസ് സന്ദീപ് മൗദ്ഗിൽ ഉത്തരവിൽ പറഞ്ഞു. 

ഇന്ത്യൻ സമൂഹത്തിൽ പശുവിന്റെ അതുല്യമായ സ്ഥാനം കണക്കിലെടുക്കുമ്പോൾ, നിയമപരമായ പ്രത്യാഘാതങ്ങൾക്ക് പുറമെ, ഇപ്പോഴത്തെ കുറ്റകൃത്യം വൈകാരികവും സാംസ്കാരികവുമായ തലങ്ങൾ ഉള്ളതാണെന്ന് കോടതി നിരീക്ഷിച്ചു. 2023 ലെ ഭാരതീയ നാഗരിക് സുരക്ഷാ സംഹിത (BNSS) ലെ സെക്ഷൻ 482 പ്രകാരമുള്ള ആസിഫിന്റെ ഹരജി തള്ളിയാണ് കോടതിയുടെ നിരീക്ഷണം.

ALSO READ: പ്രണയംനടിച്ച് മുസ്ലിം വിദ്യാര്‍ഥിനികളെ വിവാഹം കഴിക്കും, സ്വകാര്യ വിഡിയോ പകര്‍ത്തി ഭീഷണിപ്പെടുത്തും, കെണിയില്‍പ്പെട്ടത് 3 പെണ്‍കുട്ടികള്‍; ഒടുവില്‍ രവി അറസ്റ്റില്‍

നിലവിലുള്ള നിയമത്തെ ബോധപൂർവ്വം ധിക്കരിച്ചും സമൂഹത്തിന്റെ വികാരങ്ങളെ പൂർണമായും അവഗണിച്ചും പശുവിനെ അറുക്കുക എന്ന കുറ്റമാണ്  എഫ്‌ഐആറിൽ ആരോപിക്കപ്പെട്ടിരിക്കുന്നതെന്ന് കോടതി ഉത്തരവിൽ പറഞ്ഞു. വ്യക്തിസ്വാതന്ത്ര്യം സംരക്ഷിക്കേണ്ടതിന്റെ ആവശ്യകതയെക്കുറിച്ച് കോടതിക്ക് ബോധ്യമുണ്ടെന്ന് മുൻകൂർ ജാമ്യാപേക്ഷ തള്ളിക്കൊണ്ട് ജസ്റ്റിസ് മൗദ്ഗിൽ നിരീക്ഷിച്ചു.

കശാപ്പിനായി രാജസ്ഥാനിലേക്ക് പശുക്കളെ കടത്തിയെന്ന് ആരോപിച്ച് 2025 ഏപ്രിലിലാണ് ആസിഫ്, തസ്ലീം, അമൻ എന്നിവർക്കെതിരെ പൊലിസ് കേസെടുക്കുന്നത്. ഹരിയാന ഗൗവംശ് സംരക്ഷൺ ആൻഡ് ഗൗസംവർദ്ധൻ ആക്ട്, 2015, ക്രൂരത തടയൽ നിയമം,1960 എന്നിവ പ്രകാരമായിരുന്നു കേസെടുത്തത്. ഇവർ സഞ്ചരിച്ച വാഹനം തടഞ്ഞ് ആസിഫ് ഒഴികെ മറ്റു രണ്ടുപേരെയും പിടികൂടിയിരുന്നു. എന്നാൽ ആസിഫ് ഓടിപ്പോയെന്നാണ് പൊലിസ് വാദം.