മക്ക: ഹജ്ജിനെത്തുന്ന തീര്‍ത്ഥാടകര്‍ക്ക് സുരക്ഷ ശക്തമാക്കുമെന്ന് സഊദി കിരീടാവകാശിയും ആഭ്യന്തര മന്ത്രിയുമായ അമീര്‍ മുഹമ്മദ് ബിന്‍ നായിഫ് മിനായില്‍ പറഞ്ഞു. തീര്‍ത്ഥാടകരുടെ സ്ഥലങ്ങള്‍ സന്ദര്‍ശിച്ച ശേഷം മിനായില്‍ മാധ്യമ പ്രവര്‍ത്തകരോട് സംസാരിക്കുകയായിരുന്നു അദ്ദേഹം. മേഖലയില്‍ പ്രത്യേക സാഹചര്യമാണ് നിലനില്‍ക്കുന്നത്. ഇത് കണക്കിലെടുത്ത് ഹജ്ജ് തീര്‍ഥാടകര്‍ക്കുള്ള സുരക്ഷ ശക്തമാക്കുമെന്ന് അദ്ദേഹം പറഞ്ഞു.

ഹാജിമാരുടെ സുരക്ഷ നടപ്പിലാക്കേണ്ടത് രാജ്യത്തിന്റെ ആവശ്യമാണ്. ഹജ്ജ് കര്‍മ്മങ്ങള്‍ എളുപ്പത്തിലും ശാന്തമായ അന്തരീക്ഷത്തില്‍ സുരക്ഷയോടെയും നിര്‍വഹിക്കാനാവശ്യമായ എല്ലാ നടപടി ക്രമങ്ങളും സഊദി ഒരുക്കിയിട്ടുണ്ട്. തീര്‍ത്ഥാടകര്‍ സുരക്ഷിതമായി അവരുടെ നാടുകളിലേക്ക് തിരിച്ചുപോകുന്നതുവരെ ആവശ്യമായ എല്ലാ സൗകര്യങ്ങളും തീര്‍ഥാടകര്‍ക്ക് നല്‍കും. മുന്‍ വര്‍ഷത്തേക്കാള്‍ സുരക്ഷാ ക്രമീകരണങ്ങള്‍ ഒരുക്കിയിട്ടുണ്ടെന്നും അദ്ദേഹം പറഞ്ഞു.

ഇറാന്‍ തീര്‍ത്ഥാടകരുടെ വരവ് തടസ്സപ്പെടുത്തിയത് ഇറാന്‍ തന്നെയാണ്. ഇസ്‌ലാമിക വിരുദ്ധവും ഹജ്ജിന്റെ മൊത്തം സുരക്ഷയെ ബാധിക്കുന്നതുമായ നിബന്ധനകള്‍ അനുവദിക്കണമെന്ന ഇറാന്റെ ആവശ്യം അംഗീകരിക്കാനാവില്ല. ഹജ്ജിന്റെ സുരക്ഷയെ ബാധിക്കുന്ന ഏത് നീക്കങ്ങളെയും ആരുടെ ഭാഗത്തുനിന്നായാലും സര്‍വശക്തിയുമുപയോഗിച്ച് നേരിടുമെന്നും അദ്ദേഹം പറഞ്ഞു.