ന്യൂഡല്‍ഹി: പ്രധാനമന്ത്രി നരേന്ദ്ര മോദിയുടേയും എന്‍.ഡി.എയുടേയും ജനപ്രീതിയില്‍ വന്‍ ഇടിവെന്ന് സര്‍വേ റിപ്പോര്‍ട്ട്. 2025 ആഗസ്റ്റില്‍ നടത്തിയ സര്‍വേയുടെ റിപ്പോര്‍ട്ടാണ് പുറത്ത് വന്നിരിക്കുന്നത്. മോദിയുടെ പെര്‍ഫോമന്‍സ് റേറ്റിങ് 58 ശതമാനത്തിലേക്ക് ഇടിഞ്ഞുവെന്നാണ് സര്‍വേ റിപ്പോര്‍ട്ട് ചൂണ്ടിക്കാട്ടുന്നത്. 2025 ഫെബ്രുവരിയില്‍ നടത്തിയ സര്‍വേയില്‍ മോദിക്ക് 62 ശതമാനം റേറ്റിങ് ഉണ്ടായിരുന്നു.  ഇപ്പോള്‍ നാല് ശതമാനത്തിന്റെ കുറവാണ് ഉണ്ടായിരിക്കുന്നത്. പ്രത്യക്ഷത്തില്‍ നേരിയ വ്യത്യാസമാണെങ്കിലും പതിനൊന്ന് വര്‍ഷത്തെ ഭരണത്തിന് ശേഷം പ്രധാനമന്ത്രിക്ക് ജനങ്ങള്‍ക്കിടയില്‍ അംഗീകാരം ക്രമേണ കുറഞ്ഞു വരികയാണെന്നാണ് ഇത് കാണിക്കുന്നതനെന്ന് നിരീക്ഷകര്‍ വിലയിരുത്തുന്നു. 

34.2 ശതമാനം പേരാണ് മൂന്നാം ഘട്ടത്തിലെ മോദിയുടെ പെര്‍ഫോമന്‍സിനെ ഏറ്റവും മികച്ചതെന്ന് വിലയിരുത്തിയത്. 23.8 ശതമാനം അദ്ദേഹത്തിന്റെ പ്രകടനം മികച്ചതെന്ന് വിലയിരുത്തി. 12.7 ശതമാനം മോദിയുടെ പ്രകടനം ശരാശരിയാണെന്ന് വിലയിരുത്തുന്നു. 12.6 ശതമാനം പ്രധാനമന്ത്രിയുടെ പ്രകടനം മോശമെന്നും 13.8 ശതമാനം പേര്‍ വളരെ മോശമെന്നും വിലയിരുത്തുന്നു. ഇന്ത്യ ടുഡേ സിവോട്ടര്‍ മൂഡ് ഓഫ് നാഷന്‍ സര്‍വേയിലാണ് ഇക്കാര്യം വ്യക്തമായത്.

എന്‍.ഡി.എ സര്‍ക്കാറിന്റെ പ്രകടനത്തിലും ശ്രദ്ധേയമായ  ഇടിവുണ്ടായെന്ന് സര്‍വേ വിലയിരുത്തുന്നു.  കഴിഞ്ഞ ഫെബ്രുവരിയില്‍ സര്‍വേ നടത്തിയപ്പോള്‍ 62.1 ശതമാനം പേര്‍ മോദി സര്‍ക്കാറിന്റെ പ്രകടനം മികച്ചതെന്ന് വിലയിരുത്തിയിരുന്നു. എന്നാല്‍ ഇത്തവണ അത് 52.4 ശതമാനത്തിലേക്ക് ചുരുങ്ങി. 15.3 ശതമാനം പേരും സര്‍ക്കാറിനെ കുറിച്ച് അഭിപ്രായം പറയാനില്ലെന്ന നിലപാടാണ് എടുത്തത്. ഫെബ്രുവരിയില്‍ ഈ കാറ്റഗറിയില്‍ 8.6 ശതമാനം ആളുകളാണ് ഉണ്ടായിരുന്നത്. 

സര്‍വേയില്‍ പങ്കെടുത്തവരില്‍ 2.7 ശതമാനം പേര്‍ സര്‍ക്കാരിന്റെ പ്രകടനത്തില്‍ അതൃപ്തി പ്രകടിപ്പിച്ചതായി ഡാറ്റ കാണിക്കുന്നു ആറ് മാസം മുമ്പ് നടത്തിയ സര്‍വേയിലും കണക്ക് ഇതു തന്നെയാണ്.  

ALSO READ: അസമില്‍ ഇനി ഭൂമി ഇടപാട് ഒരേ മതക്കാര്‍ തമ്മില്‍ മാത്രം; നീക്കം കേരളത്തിലെ മുസ്ലിം സംഘടനകള്‍ സംസ്ഥാനത്ത് വിദ്യാഭ്യാസസ്ഥാപനങ്ങള്‍ നടത്തുന്നതിനിടെ

രാമക്ഷേത്രം യാഥാര്‍ഥ്യമാക്കിയതാണ് മോദി സര്‍ക്കാറിന്റെ ഏറ്റവും വലിയ നേട്ടമായി ജനങ്ങള്‍ കാണുന്നതെന്നാണ് സര്‍വേ സൂചിപ്പിക്കുന്നത്. തൊഴിലില്ലായ്മയും വര്‍ഗീയ കലാപങ്ങളും ന്യൂനപക്ഷങ്ങള്‍ക്കുണ്ടായ അരക്ഷിതാവസ്ഥയും ഭീതിയും- ഇതാണ് സര്‍ക്കാറിനെതിരായ പ്രധാന വിമര്‍ശനങ്ങളായി സര്‍വേയില്‍ ഉന്നയിച്ചിട്ടുള്ളത്. പണപ്പെരുപ്പവും സര്‍ക്കാറിന്റെ ജനപ്രീതി ഇടിയുന്നതിനുള്ള ഒരു കാരണമായിട്ടുണ്ട്. ഓപ്പറേഷന്‍ സിന്ദൂറും അടിസ്ഥാനസൗകര്യവികസനമേഖലയിലെ നേട്ടങ്ങളുമാണ് മോദി സര്‍ക്കാറിന് അനുകൂലമായി മാറുകയെന്നും സര്‍വേ ചൂണ്ടിക്കാട്ടുന്നു.

ബിഹാര്‍ തെരഞ്ഞെടുപ്പില്‍ എന്‍.ഡി.എക്ക് നേരിയ മേല്‍ക്കൈ ഉണ്ടെന്നും സര്‍വേ പ്രവചിക്കുന്നുണ്ട്. ലോക്‌സഭ തെരഞ്ഞെടുപ്പുമായി താരതമ്യം ചെയ്യുമ്പോള്‍ 47 ശതമാനത്തില്‍ നിന്ന് 50 ശതമാനമായി എന്‍.ഡി.എയുടെ വോട്ടുവിഹിതം വര്‍ധിക്കുമെന്നും ഇന്‍ഡ്യ സഖ്യത്തിന്റെ വോട്ടുവിഹിതം 39 ശതമാനത്തില്‍ നിന്നും 44 ശതമാനമായി വര്‍ധിക്കുമെന്നും സര്‍വേ പ്രവചിക്കുന്നു.

2025 ജൂലൈ 1 നും ഓഗസ്റ്റ് 14 നും ഇടയിലാണ് ഇന്ത്യാ ടുഡേ-സിവോട്ടര്‍ മൂഡ് ഓഫ് ദി നേഷന്‍ (എംഒടിഎന്‍) നടത്തിയ സര്‍വേ കാലാവധി.  എല്ലാ ലോക്സഭാ മണ്ഡലങ്ങളിലുമായി 54,788 വ്യക്തികളെയാണ് സര്‍വേയില്‍ ഉള്‍പ്പെടുത്തിയത്. അതിന് പുറമേ സിവോട്ടറിന്റെ പതിവ് ട്രാക്കര്‍ ഡാറ്റയില്‍ നിന്നുള്ള 1,52,038 അഭിമുഖങ്ങളും കൂടി ഇതിനായി വിശകലനം ചെയ്തു. അങ്ങനെ, റിപ്പോര്‍ട്ടിനായി ആകെ 2,06,826 പേരുടെ അഭിപ്രായം പരിഗണിച്ചു.

a 2025 august survey shows a decline in prime minister narendra modi's approval rating from 62% in february to 58%, indicating a gradual drop in public support after eleven years in power.