സഊദി പ്രൊ ലീഗ് പുതിയ സീസണിൽ ഗംഭീര തുടക്കവുമായി അൽ നസർ. പുതിയ സീസണിലെ ആദ്യ മത്സരത്തിൽ അൽ താവൂണിനെ എതിരില്ലാത്ത അഞ്ചു ഗോളുകൾക്ക് കീഴടക്കിയാണ് അൽ നസർ തേരോട്ടം തുടങ്ങിയത്. കിംഗ് അബ്ദുള്ള സ്പോർട്സ് സിറ്റി സ്റ്റേഡിയത്തിൽ നടന്ന മത്സരത്തിൽ പോർച്ചുഗീസ് സൂപ്പർ താരം ജാവോ ഫെലിക്സ് ഹാട്രിക് നേടി മികച്ച പ്രകടനമാണ് നടത്തിയത്. 7, 67, 87 എന്നീ മിനിറ്റുകളിലാണ് ജാവോ ഫെലിക്സ് ഗോൾ നേടിയത്.

മത്സരത്തിൽ സൂപ്പർതാരം ക്രിസ്റ്റ്യാനോ റൊണാൾഡോയുടെ അൽ നസറിനായി ഗോൾ നേടി. രണ്ടാം പകുതിയിൽ ലഭിച്ച പെനാൽറ്റി കൃത്യമായി ലക്ഷ്യത്തിൽ എത്തിച്ചാണ് റൊണാൾഡോ ഗോൾ നേടിയത്. ഇതോടെ മറ്റൊരു ഫുട്ബാൾ താരത്തിനും അവകാശപ്പെടാനാവാത്ത ഒരു റെക്കോർഡും റൊണാൾഡോ കൈവരിച്ചു.

ഫുട്ബോൾ ചരിത്രത്തിൽ തുടർച്ചയായ 24 സീസണുകളിലും ഗോൾ നേടുന്ന ആദ്യ താരമായാണ് റൊണാൾഡോ മാറിയത്. 2001ൽ പോർച്ചുഗൽ ടീം സ്പോർട്ടിങ്ങിനായി തുടങ്ങിയ ഗോൾ വേട്ട ഇപ്പോൾ നീണ്ട 24 വർഷങ്ങൾക്ക് ശേഷം അൽ നസറിൽ എത്തിനിൽക്കുകയാണ്‌. ഫ്രഞ്ച് സൂപ്പർതാരം കിങ്സിലി കോമനും അൽ നാസറിനായി ലക്ഷ്യം കണ്ടു. 

അതേസമയം സഊദി സൂപ്പർ കപ്പ് ഫൈനലിൽ അൽ ഇത്തിഹാദിനെതിരെ ഗോൾ നേടിയതോടെ മറ്റൊരു ചരിത്രനേട്ടവും അൽ നസർ നായകൻ കൈപ്പിടിയിലാക്കിയിരുന്നു. മത്സരത്തിൽ അനുകൂലമായി ലഭിച്ച പെനാൽറ്റി താരം കൃത്യമായി ലക്ഷ്യത്തിൽ എത്തിക്കുകയായിരുന്നു. ഈ ഗോളോടെ അൽ നസറിനൊപ്പം 100 ഗോളുകൾ എന്ന പുതിയ നാഴികക്കല്ല് സ്വന്തമാക്കാനും റൊണാൾഡോക്ക് സാധിച്ചു. 

ഫുട്ബോളിന്റെ ചരിത്രത്തിൽ നാല് വ്യത്യസ്ത ക്ലബ്ബുകൾക്ക് വേണ്ടിയും ദേശീയ ടീമിന് വേണ്ടിയും 100 ഗോളുകൾ നേടുന്ന ആദ്യ താരമായും റൊണാൾഡോ മാറി. മാഞ്ചസ്റ്റർ യുണൈറ്റഡ്(145), റയൽ മാഡ്രിഡ്(450), യുവന്റസ്(101), അൽ നസർ(100)  എന്നിങ്ങനെയാണ് റൊണാൾഡോ നാല് രാജ്യങ്ങളിലെ നാല് ടീമുകൾക്ക് വേണ്ടി നേടിയ ഗോളുകളുടെ കണക്കുകൾ. പോർച്ചുഗീസ് ദേശിയ ടീമിനായി 138 ഗോളുകളും റൊണാൾഡോ നേടി. 

Al Nasr has made a great start to the new season of the Saudi Pro League. Al Nasr began their campaign by defeating Al Taawon 5-0 in the first match of the new season. Superstar Cristiano Ronaldo achieved a historic feat in the match.