തിരുവനന്തപുരം: കേരള സർവകലാശാലയിലെ ചാറ്റ് ജിപിടി കവിത വിവാദത്തിൽ ഇടപെട്ട് വൈസ് ചാൻസലർ. കേരള സർവകലാശാലയിലെ നാലാം വർഷ ബിഎ ഇംഗ്ലീഷ് ഒന്നാം സെമസ്റ്റർ സിലബസിൽ പാബ്ലോ നെരൂദയുടെ പേരിൽ ചാറ്റ് ജിപിടി ടൂൾ ഉപയോഗിച്ച് തയ്യാറാക്കിയ കവിത ഇടംപിടിച്ചതിനെക്കുറിച്ചാണ് ബോർഡ് ഓഫ് സ്റ്റഡീസ് ചെയർമാനോട് വൈസ് ചാൻസലർ അടിയന്തര റിപ്പോർട്ട് തേടിയത്. ഏത് സാഹചര്യത്തിലാണ് ഇത്തരമൊരു അബദ്ധം സിലബസിൽ സംഭവിച്ചതെന്ന് വിശദീകരിക്കണമെന്നാണ് ആവശ്യം.

വിവാദമായ കവിത 'ഇംഗ്ലീഷ്, യുവർ ലാംഗ്വേജ്' (English, Your Language) എന്നതാണ്. സിലബസിൽ ഈ കവിത നേരത്തെ ഉൾപ്പെടുത്തിയിരുന്നു എന്നു മാത്രമല്ല, പരീക്ഷയിൽ ഈ കവിതയെ ആധാരമാക്കിയുള്ള ചോദ്യങ്ങളും ഉണ്ടായിരുന്നു. നോട്ടുകൾ തിരഞ്ഞെടുക്കാൻ ശ്രമിച്ച അധ്യാപകരാണ് നെരൂദ ഇത്തരമൊരു കവിത എഴുതിയിട്ടില്ലെന്നും, ഇത് എഐ (ആർട്ടിഫിഷ്യൽ ഇന്റലിജൻസ്) ഉപയോഗിച്ച് ജനറേറ്റ് ചെയ്ത കവിതയാണെന്നും കണ്ടെത്തിയത്. സംഭവത്തിൽ അന്വേഷണം ആവശ്യപ്പെട്ട് വൈസ് ചാൻസലർക്ക് നേരത്തെ പരാതി ലഭിച്ചിരുന്നു.
അതോടൊപ്പം, 

ഈ വിവാദങ്ങൾ കേരള സർവകലാശാലയുടെ അക്കാദമിക് മാനദണ്ഡങ്ങൾക്ക് വെല്ലുവിളിയാകുന്നതായി അധ്യാപകരും വിദ്യാർത്ഥികളും ചൂണ്ടിക്കാട്ടുന്നു. സിലബസ് തയ്യാറാക്കുന്നതിൽ കൂടുതൽ പരിശോധനയും വിദഗ്ധാഭിപ്രായങ്ങളും ആവശ്യമാണെന്നും അഭിപ്രായമുയരുന്നുണ്ട്. റിപ്പോർട്ട് ലഭിച്ച ശേഷം തുടർനടപടികൾ സ്വീകരിക്കുമെന്നാണ് വിസി വ്യക്തമാക്കിയത്.