തൃശൂർ: കുന്നംകുളം പൊലീസ് സ്റ്റേഷനിൽ യൂത്ത് കോൺഗ്രസ് നേതാവ് സുജിത്തിന് നേരെ നടന്ന ക്രൂരമർദനത്തിൽ തിരുവോണനാളിലും പ്രതിഷേധം ശക്തമാകുന്നു. കുറ്റക്കാരായ പൊലിസ് ഉദ്യോഗസ്ഥരെ സംരക്ഷിക്കുന്നുവെന്ന് ആരോപിച്ച് യൂത്ത് കോൺഗ്രസ് ഇന്ന് തൃശൂർ ഡിഐജി ഓഫീസിലേക്ക് പ്രതിഷേധ മാർച്ച് നടത്തും. മർദനമേറ്റ സുജിത്തിനെ സന്ദർശിക്കാൻ പ്രതിപക്ഷ നേതാവ് വി.ഡി. സതീശൻ ഇന്ന് എത്തും.

കഴിഞ്ഞ ദിവസം വി.ഡി. സതീശൻ മുഖ്യമന്ത്രിക്ക് അയച്ച കത്തിൽ, ക്രൂരത കാണിച്ച പൊലിസ് ഉദ്യോഗസ്ഥരെ സർവീസിൽ നിന്ന് പുറത്താക്കണമെന്നും അവർക്കെതിരെ ക്രിമിനൽ കേസ് ഉൾപ്പെടെയുള്ള നടപടികൾ അടിയന്തിരമായി സ്വീകരിക്കണമെന്നും ആവശ്യപ്പെട്ടിരുന്നു. 2023 ഏപ്രിൽ 5-ന് കുന്നംകുളം പൊലിസ് സ്റ്റേഷനിൽ യൂത്ത് കോൺഗ്രസ് ചൊവ്വന്നൂർ മണ്ഡലം പ്രസിഡന്റ് സുജിത്തിനെ പൊലിസ് ഭീഷണിയെ ചോദ്യം ചെയ്തതിന്റെ പേർവെച്ച് അതിക്രൂരമായി മർദിച്ചിരുന്നു. രണ്ട് വർഷത്തെ നിയമപോരാട്ടത്തിനൊടുവിലാണ് വിവരാവകാശ കമ്മീഷന്റെ ഉത്തരവ് പ്രകാരം ക്രൂരതയുടെ സിസിടിവി ദൃശ്യങ്ങൾ കഴിഞ്ഞ ദിവസം പുറത്തുവന്നത്.

സംഭവത്തിൽ തൃശൂർ ഡിഐജി ഹരിശങ്കർ ഡിജിപിക്ക് റിപ്പോർട്ട് സമർപ്പിച്ചിരുന്നു. പരാതി ഉയർന്ന ഉടനെ നടപടി സ്വീകരിച്ചതായി റിപ്പോർട്ടിൽ അവകാശപ്പെടുന്നു. നാല് പൊലിസ് ഉദ്യോഗസ്ഥർക്ക് രണ്ട് വർഷത്തെ ഇൻക്രിമെന്റ് വെട്ടിക്കുറച്ചതിനൊപ്പം സ്റ്റേഷനിൽ നിന്ന് സ്ഥലംമാറ്റിയതായും റിപ്പോർട്ടിൽ പറയുന്നു. എന്നാൽ, "കൈകൊണ്ട് ഇടിച്ചു" എന്ന കുറ്റം മാത്രമാണ് ഉദ്യോഗസ്ഥർക്കെതിരെ ചുമത്തിയിരിക്കുന്നത്. കോടതിയും ഈ കേസ് മാത്രമാണ് പരിഗണിച്ചത്. കൂടുതൽ നടപടികൾക്ക് ശുപാർശയില്ലാത്ത ഈ റിപ്പോർട്ടിന്റെ പശ്ചാത്തലത്തിൽ, കുന്നംകുളം കോടതി നേരിട്ട് കേസ് അന്വേഷിക്കുകയാണ്. കോടതി ഉത്തരവിന് ശേഷം മാത്രമേ തുടർനടപടികൾ സ്വീകരിക്കൂ എന്നാണ് റിപ്പോർട്ടിലെ നിലപാട്.

In Kunnamkulam, protests persist on Thiruvonam over the brutal assault of Youth Congress leader Sujith by police in 2023. Youth Congress will march to the Thrissur DIG office today, alleging protection of the accused officers. Opposition leader VD Satheesan will visit Sujith, demanding strict action against the guilty.