തിരുനാവായ: പി.എസ്.സി പരീക്ഷകളുടെ മൂല്യനിർണയത്തിനുളള അന്തിമ ഉത്തര സൂചികയിലെ തെറ്റുകൾ ഉദ്യോഗാർഥികൾ ചൂണ്ടിക്കാണിച്ചിട്ടും അധികൃതർ തിരുത്താത്തതിനാൽ ശരിയുത്തരം എഴുതിയവർക്ക് മാർക്ക് ലഭിക്കുന്നില്ലെന്ന് പരാതി ഉയരുന്നു. അന്തിമ ഉത്തരസൂചികയിലെ തെറ്റുകളിൽ പരാതി ഉന്നയിക്കാൻ അവസരം നൽകാത്തതാണ് പ്രശ്നമാകുന്നത്.
 
പ്രാഥമിക ഉത്തര സൂചികയുമായി ബന്ധപ്പെട്ട പരാതികൾ സ്വീകരിക്കുന്നതുപോലെ അന്തിമ ഉത്തരസൂചികയെക്കുറിച്ചുള്ള പരാതികൾ കൂടി സ്വീകരിക്കുകയും പരിഹരിക്കുകയും ചെയ്താലാണ് സുതാര്യമായ മൂല്യനിർണയം ഉറപ്പാക്കാൻ കഴിയുക. പരീക്ഷകൾക്കുശേഷം വെബ്സൈറ്റിൽ  ഉത്തരസൂചിക പ്രസിദ്ധീകരിച്ച് അഞ്ച് ദിവസത്തിനകം തെറ്റുകളിൽ പരാതി നൽകാൻ ഉദ്യോഗാർഥികൾക്ക് അവസരം നൽകുന്നുണ്ട്.  മുമ്പ് പരീക്ഷാ കൺട്രോളറുടെ ഓഫിസിലേക്കാണു പരാതി അയയ്ക്കേണ്ടിയിരുന്നതെങ്കിൽ ഇപ്പോൾ ഉദ്യോഗാർഥികൾ സ്വന്തം പ്രൊഫൈൽ വഴിയാണു പരാതി നൽകേണ്ടത്. ഇങ്ങനെ ലഭിക്കുന്ന പരാതികൾ കൂടി പരിഗണിച്ച്, വിദഗ്‌ധരുടെ അഭിപ്രായം ആരാഞ്ഞ ശേഷമാണ് അന്തിമ ഉത്തരസൂചിക പ്രസിദ്ധീകരിക്കുക. എന്നാൽ, അന്തിമ ഉത്തരസൂചികയുമായി ബന്ധപ്പെട്ട പരാതി സ്വീകരിക്കാൻ പ്രൊഫൈൽ വഴിയോ അല്ലാതെയോ ഒരു സംവിധാനവുമില്ല.

അന്തിമ ഉത്തരസൂചികകളിൽ തെറ്റായ ഉത്തരത്തിനു മാർക്ക് നൽകുന്നതായാണ്  ഉദ്യോഗാർഥികളുടെ പരാതി. പൊതുമരാമത്ത്, ജലസേചനം, തദ്ദേശ സ്വയംഭരണ വകുപ്പുകളിൽ ഓവർസിയർ, ഒന്നാം ഗ്രേഡ് ഡ്രാഫ്റ്റ്സ്‌മാൻ (സിവിൽ) തസ്ത‌ികയിൽ ജൂൺ 27നു നടത്തിയ പരീക്ഷയുടെ അന്തിമ ഉത്തരസൂചിക സംബന്ധിച്ച പരാതിയാണ് ഒടുവിലത്തേത്. ശരിയുത്തരമുള്ള ധാരാളം ചോദ്യങ്ങൾ ഈ പരീക്ഷയിൽനിന്ന് ഒഴിവാക്കിയതു ചൂണ്ടിക്കാട്ടി ഉദ്യോഗാർഥികൾ പരാതി നൽകിയെങ്കിലും പരിഗണിക്കപ്പെട്ടിട്ടില്ല. ശക്തമായ മത്സരം നിലനിൽക്കുന്ന പി.എസ്‌.സി പരീക്ഷയിൽ  ഒരു മാർക്ക്പോലും റാങ്ക് ലിസ്‌റ്റിൽ വലിയ ഏറ്റക്കുറച്ചിലുകൾക്ക് ഇടയാക്കും. 

The Public Service Commission (PSC) has decided not to revise errors in its final answer key, leading to complaints from candidates who claim they are not receiving marks for correct answers.