മലപ്പുറം: തദ്ദേശ സ്ഥാപനങ്ങളിലേക്കുള്ള തെരഞ്ഞെടുപ്പിന്റെ അന്തിമ വോട്ടർപട്ടിക പുറത്തുവന്നതോടെ സംവരണ വാർഡുകളുടെ നറുക്കെടുപ്പ് കാത്ത് രാഷ്ട്രീയ പാർട്ടികൾ. നറുക്കെടുപ്പിൽ ജനറൽ വാർഡുകൾ ഏതെല്ലാമാകുമെന്ന കണക്കുകൂട്ടലിലാണ് പാർട്ടികൾ ചർച്ച സജീവമാക്കിയിരിക്കുന്നത്. സംവരണ വാർഡ് നറുക്കെടുപ്പ് ഈമാസം നടക്കും.

തദ്ദേശ വോട്ടർപട്ടിക പഠിച്ചുവരുകയാണ് പാർട്ടികൾ. ഓരോ വാർഡിലും അധികരിച്ച വോട്ടുകൾ സ്വന്തമാക്കാനുള്ള തന്ത്രങ്ങളും മെനയുന്നുണ്ട്. മുന്നണിയിൽ കൂടുതൽ സീറ്റ് ആവശ്യപ്പെടണമെങ്കിൽ അതത് വാർഡുകളിൽ പാർട്ടിക്ക് സ്വന്തമാക്കാൻ കഴിയുന്ന വോട്ടർമാരുടെ കണക്കുകൾ വേണം. ചെറിയ വോട്ടുകൾ പോലും വിജയ പരാജയങ്ങളെ നിർണയിക്കും.

തദ്ദേശ  വാർഡ് വിഭജനത്തിന് ശേഷം നടക്കുന്ന തെരഞ്ഞെടുപ്പായതിനാൽ നറുക്കെടുപ്പിൽ മാറ്റങ്ങളുണ്ടാകും. 50 ശതമാനം വാർഡുകൾ വനിതാ സംവരണമായാണ് നറുക്കെടുപ്പ് നടത്തുക. പട്ടികജാതി, പട്ടിക വർഗ വനിതകൾക്ക് ഉൾപ്പെടെയുള്ള സംവരണം ഈ 50 ശതമാനത്തിൽ ഉൾപ്പെടും. കഴിഞ്ഞ തവണ വനിതാ വാർഡുകളായവ ഇത്തവണ ജനറൽ വിഭാഗത്തിലാകും. എന്നാൽ ഇത്തവണ വാർഡ് വിഭജനം നടന്നതിനാൽ വാർഡുകൾക്കെല്ലാം മാറ്റമുണ്ടായിട്ടുണ്ട്. അതിനാൽ സംവരണ വാർഡുകളിലെ വോട്ടർമാരിൽ 50 ശതമാനത്തിന് മുകളിൽ ഏത് വാർഡിലാണോ അവയായിരിക്കും ആ വാർഡായി കണക്കാക്കുക. 

പട്ടിക ജാതി ജനറൽ, പട്ടിക വർഗ ജനറൽ എന്നിവയ്ക്കായി വാർഡുകൾ നീക്കി വയ്ക്കും. ഇവ ബാക്കി 50 ശതമാനത്തിൽ നിന്ന് തിരഞ്ഞെടുക്കുമ്പോഴും നേരത്തെ രണ്ട് തെരഞ്ഞെടുപ്പുകളിലും സംവരണ വാർഡുകളായി മാറിയവ ഒഴിവാക്കും. ഗ്രാമ, ബ്ലോക്ക്, ജില്ലാ പഞ്ചായത്തുകളിലെ സംവരണ വാർഡുകളുടെ നറുക്കെടുപ്പ് അതത് ജില്ലകളിലെ കലക്ടർമാരുടെ മേൽനോട്ടത്തിലായിരിക്കും നടക്കുക. എന്നാൽ നഗരസഭകളിലേത് നഗരസഭാകാര്യ വകുപ്പിലെ റീജ്യനൽ ജോയിന്റ് ഡയരക്ടർമാരുടെ നേതൃത്വത്തിലും കോർപറേഷനുകളിലേത് നഗരസഭാകാര്യ ഡയറക്ടറുടെ അധ്യക്ഷതയിലുമാകും നടക്കുക.

Political parties in Kerala are eagerly awaiting the ward reservation draw for the upcoming local elections, which will determine the allocation of reserved seats for various categories, influencing their candidate selection strategies