നെടുമ്പാശ്ശേരി: പ്രവാസി മലയാളികൾക്ക് ഓണം ആഘോഷിക്കാൻ ഈ വർഷം നെടുമ്പാശ്ശേരി രാജ്യാന്തര വിമാനത്താവളം വഴി വിവിധ രാജ്യങ്ങളിലേക്ക് കടൽ കടന്നത് 1323 മെട്രിക് ടൺ പച്ചക്കറിയും പഴവർഗങ്ങളും പൂക്കളും. മുൻ വർഷങ്ങളെ അപേക്ഷിച്ച് 25 ശതമാനം വർധനവാണ് ഓണക്കാലത്തെ കയറ്റുമതിയിൽ രേഖപ്പെടുത്തിയത്. കഴിഞ്ഞ എട്ട് ദിവസത്തിനിടെയാണ് ഇവ കയറ്റുമതി ചെയ്തത്. 
വാഴയില മുതൽ പൂക്കൾ വരെ ഇതിൽ ഉൾപ്പെടും. പച്ചക്കറികളിൽ മുരിങ്ങയില മുതൽ ഉള്ളി വരെ ഇത്തവണ കയറ്റി അയച്ചിട്ടുണ്ട്. കയറ്റി അയച്ചതിൽ 1197 ടണും വേഗത്തിൽ കേടുവരുന്ന പച്ചക്കറികളും പഴവർഗങ്ങളുമാണ്. അവശേഷിക്കുന്ന 126 ടൺ വാഴയില, മുരിങ്ങ കോൽ, ഉള്ളി തുടങ്ങിയ വേഗത്തിൽ കേടുവരാത്ത ഇനങ്ങളാണ്.
 
കഴിഞ്ഞ മാസം 27 മുതൽ ഈ മാസം മൂന്ന് വരെയുള്ള എട്ട് ദിവസങ്ങളിലാണ് പ്രധാനമായും ഓണ വിഭവങ്ങൾ കയറ്റി അയച്ചത്. ഇതിൽ രണ്ട്, മൂന്ന് തീയതികളിലാണ് ഏറ്റവും കൂടുതൽ കയറ്റുമതി നടന്നത്. 180 ടൺ വീതം 360 ടണ്ണാണ് ഈ ദിവസങ്ങളിൽ കയറ്റി അയച്ചത്. ഓഗസ്റ്റ് 27ന് 174.2 ടൺ, 28ന് 132.2, 29ന് 176.1, 30ന് 178, 31ന് 142.4, സെപ്. ഒന്നിന് 160 ടൺ എന്നിങ്ങനെയാണ് മറ്റ് ദിവസങ്ങളിലെ കയറ്റുമതി. ദുബൈ, ദോഹ, ഷാർജ, കുവൈത്ത്, അബൂദബി, മസ്കറ്റ്, സഊദി തുടങ്ങിയ ഗൾഫ് നാടുകളിലേക്കാണ് ബഹുഭൂരിഭാഗം സാധനങ്ങളും കയറ്റി അയച്ചത്.  ഇതോടൊപ്പം യൂറോപ്യൻ രാജ്യങ്ങളിലേക്കും ഓണമാഘോഷിക്കാൻ വിഭവങ്ങൾ അയച്ചിട്ടുണ്ട്. 

കേരളത്തിലെയും തമിഴ്നാട്ടിലെയും വിവിധ പ്രദേശങ്ങളിൽ നിന്നാണ് കാർഗോ ഏജൻ്റുമാർ കയറ്റുമതിക്കായി പച്ചക്കറികളും പഴ വർഗങ്ങളും നെടുമ്പാശ്ശേരിയിൽ എത്തിച്ചത്. കേരളത്തിലെ കർഷകരിൽ നിന്നും  കർഷക വിപണികളിൽ നിന്നും നേരിട്ട് വാങ്ങുന്ന പച്ചക്കറികൾക്കാണ് വിദേശത്ത് ഏറ്റവും കൂടുതൽ ഡിമാൻ്റുള്ളത്. നെടുമ്പാശ്ശേരി വിമാനത്താവളത്തിലെ കാർഗോ വിഭാഗത്തിൽ പച്ചക്കറികളും പഴ വർഗങ്ങളും ശീതീകരിച്ച് സൂക്ഷിക്കാൻ സംവിധാനമുള്ളതിനാൽ കാർഗോ ഏജൻ്റുമാർക്ക് ഉൽപ്പന്നങ്ങൾ നേരത്തെ എത്തിക്കാൻ കഴിഞ്ഞതും കയറ്റുമതി വർധിക്കാൻ സഹായകമായി.

The Onam festival has boosted exports by 25%, with 1323 tonnes of various items, including traditional foods and products, shipped overseas, reflecting the growing global demand for Kerala's cultural delicacies.