കോഴിക്കോട്: മേപ്പയ്യൂരിൽ 21കാരനായ വിദ്യാർഥിയെ കസ്റ്റഡിയിലെടുത്ത് അകാരണമായി മർദിച്ച സംഭവം പൊലിസ് ഒതുക്കി തീർക്കാൻ ശ്രമിക്കുന്നതായി യൂത്ത് കോൺഗ്രസ്. വുഷു സ്റ്റേറ്റ് ചാംപ്യനായ മേപ്പയ്യൂർ സ്വദേശി പി. ആദിലിനെ മർദിച്ച് കർണപടം അടിച്ചുതകർത്ത സംഭവമാണ് മേപ്പയ്യൂർ പൊലിസ് പരാതിക്കാരന് പണം നൽകി ഒതുക്കിയതെന്നും യൂത്ത് കോൺഗ്രസ് സംസ്ഥാന ജന. സെക്രട്ടറി വി.പി ദുൽഖിഫിൽ വാർത്താസമ്മേളനത്തിൽ പറഞ്ഞു.

കഴിഞ്ഞ് മെയ് അഞ്ചിന് മേപ്പയ്യൂർ ബാങ്കിൽ അക്കൗണ്ട് തുടങ്ങാൻ എത്തിയ ആദിലിനെ പൊലിസ് ആളുമാറി കസ്റ്റഡിയിലെടുക്കുകയും മർദിച്ച് പരുക്കേൽപ്പിക്കുകയുമായിരുന്നു. സംഭവത്തിൽ കുറ്റക്കാരായ ഉദ്യോഗസ്ഥർക്കെതിരേ ഇതുവരെയും നടപടികൾ സ്വീകരിച്ചിട്ടില്ല.
 
ഡിവൈ.എസ്.പി ഉൾപ്പെടെയുള്ള ഉന്നത പൊലിസ് ഉദ്യോഗസ്ഥരുടെ അറിവോടുകൂടിയാണ് സ്റ്റേഷനിലെ ഉദ്യോഗസ്ഥർ ഇത്തരത്തിൽ ഒരു നടപടി സ്വീകരിച്ചത്. ആദിലിനെ മർദിച്ചതിന് ശേഷം പുറത്ത് പരാതി പറഞ്ഞാൽ കേസിൽ ഉൾപ്പെടുത്തുമെന്ന് എസ്.ഐ ഭീഷണിപ്പെടുത്തുകയും ചെയ്തിരുന്നു. തുടർന്ന് ചികിത്സയ്ക്ക് ചെലവഴിച്ച പണം നൽകിയാണ് പൊലിസ് കേസ് അട്ടിമറിച്ചതെന്നും ദുൽഖിഫിൽ ആരോപിച്ചു.
 
പൊലിസ് സ്റ്റേഷനിൽ നടന്ന ക്രൂരമർദനത്തിന്റെ ദൃശ്യങ്ങൾ പുറംലോകം കാണണമെങ്കിൽ സ്റ്റേഷനിലെ സി.സി.ടി.വി ദൃശ്യങ്ങൾ പുറത്തുവന്നേ മതിയാകൂ. അന്നേ ദിവസത്തെ സ്റ്റേഷനിലെ സി.സി.ടി.വി ദൃശ്യങ്ങൾ പുറത്തുവിടാൻ പൊലിസ് തയാറാകണം. ആരോപണ വിധേയരായ പൊലിസ് ഉദ്യോഗസ്ഥർക്കെതിരേ അഴിമതി നിരോധന നിയമപ്രകാരം കേസെടുക്കണം. കുറ്റക്കാരായ ഉദ്യോഗസ്ഥർക്കെതിരേ നടപടി സ്വീകരിക്കാൻ അടിയന്തരമായി തയാറായില്ലെങ്കിൽ ഇരയ്ക്ക് നീതി ലഭ്യമാക്കാൻ നിയമനടപടികളുമായി മുന്നോട്ട് പോകുമെന്ന് വി.പി ദുൽഖിഫിൽ അറിയിച്ചു.

എറണാകുളം ജില്ലയിലെ കളമശ്ശേരിയിൽ രജിസ്റ്റർ ചെയ്ത കള്ളപ്പണം വെളുപ്പിക്കൽ കേസുമായി ബന്ധപ്പെട്ട് മേപ്പയൂർ മെയ് 2-നാണ് പൊലിസ് ആദിൽ പിയെ കസ്റ്റഡിയിലെടുത്ത് ശാരീരികമായി മർദിച്ചത്. ഉച്ചയ്ക്ക് 2:45-ന് മേപ്പയ്യൂർ സ്റ്റേറ്റ് ബാങ്ക് ഓഫ് ഇന്ത്യ ശാഖയിൽ വെച്ചാണ് സംഭവം.

കള്ളപ്പണം വെളുപ്പിക്കൽ കേസിലെ പ്രതികളെ പിടികൂടാനെത്തിയ പൊല്സ്, ബാങ്കിൽ അക്കൗണ്ട് എടുക്കാനായി കാത്തുനിന്ന ആദിലിനെ കേസിലെ സംഘത്തിലെ ഒരാളായി തെറ്റിദ്ധരിച്ച് കസ്റ്റഡിയിലെടുക്കുകയായിരുന്നു. “ആദിൽ ബാങ്കിൽ നിൽക്കുമ്പോൾ യൂണിഫോം ധരിക്കാത്ത ചിലർ വന്ന് പിടികൂടുകയായിരുന്നുവെന്നും അവർ പൊലിസ് ആണെന്നും ആദിലിന്റെ സഹോദരൻ ജംഷീർ വെളിപ്പെടുത്തിയിരുന്നു.

മേപ്പയൂർ പൊലിസ് സ്റ്റേഷനിൽ എത്തിച്ച ശേഷം, ഒരു സബ് ഇൻസ്പെക്ടറുടെ സാന്നിധ്യത്തിൽ ആദിലിന്റെ കവിളുകളിൽ അടിച്ചതായും, “സൗരവ് എന്നൊരാളെക്കുറിച്ച് അവർ ചോദിച്ചാണ് മർദനം. പക്ഷേ ആദിൽ അറിയില്ലെന്ന് വ്യക്തമാക്കിയെങ്കിലും മർദനം തുടരുകയായിരുന്നുവെന്ന് ജംഷീർ കൂട്ടിച്ചേർത്തു. ആദിലിന്റെ ഫോൺ പരിശോധിച്ചെങ്കിലും കുറ്റകരമായ ഒന്നും കണ്ടെത്താനായില്ല. 

തെറ്റായി കസ്റ്റഡിയിലെടുത്തതിന് പൊലിസ് ക്ഷമാപണം നടത്തി ആദിലിനെ അന്നുതന്നെ വിട്ടയച്ചു. എന്നാൽ, മർദനത്തെ തുടർന്ന് ആദിലിന്റെ കർണപടലത്തിന് ഗുരുതര പരുക്കേറ്റിരുന്നു. 

The Youth Congress has demanded the release of CCTV footage from the Mappayur police station following an incident where a young man was allegedly assaulted by police.