അമരാവതി: ആന്ധ്രപ്രദേശിലെ അനകപ്പള്ളി ജില്ലയിലെ ചോദവരം സബ് ജയിലിൽ നിന്ന് രണ്ട് തടവുകാർ ജയിൽ വാർഡനെ ആക്രമിച്ച് ജയിൽ ചാടി. ജയിൽ വാർഡന്റെ തലയ്ക്ക് ചുറ്റിക കൊണ്ട് അടിച്ചാണ് ഇവർ ജയിൽ വാതിൽ തുറന്ന് കടന്നുകളഞ്ഞത്. ഈ സംഭവത്തിന്റെ സിസിടിവി ദൃശ്യങ്ങൾ സാമൂഹിക മാധ്യമങ്ങളിൽ വ്യാപകമായി പ്രചരിക്കുന്നുണ്ട്.

ആക്രമണത്തിൽ പരിക്കേറ്റ ഹെഡ് ജയിൽ വാർഡനായ വീരരാജുവിനെ അടുത്തുള്ള സർക്കാർ ആശുപത്രിയിൽ പ്രവേശിപ്പിച്ചു. രക്ഷപ്പെട്ട തടവുകാർ ബി. രാമു, നക്ക രവികുമാർ എന്നിവരാണെന്ന് തിരിച്ചറിഞ്ഞിട്ടുണ്ട്. ഇവരെ പിടികൂടാൻ പൊലിസ് പ്രത്യേക അന്വേഷണ സംഘത്തെ ചുമതലപ്പെടുത്തിയിട്ടുണ്ട്.

സിസിടിവി ദൃശ്യങ്ങളിൽ, രാമു വാർഡനെ ചുറ്റിക കൊണ്ട് ആക്രമിക്കുന്നതും തുടർന്ന് ഇരുവരും ചേർന്ന് വാതിൽ തുറന്ന് ഓടി രക്ഷപ്പെടുന്നതും വ്യക്തമാണ്. രാമു വാർഡന്റെ പോക്കറ്റിൽ നിന്ന് ജയിലിന്റെ പ്രധാന ഗേറ്റിന്റെ താക്കോൽ കൈക്കലാക്കി. ഈ സംഭവത്തിനിടെ, നക്ക രവികുമാർ വാർഡനുമായുള്ള ബഹളത്തിൽ ഇടപെടുകയും രാമുവിനെ പിടികൂടാമെന്ന് വാഗ്ദാനം ചെയ്ത് പുറത്തേക്ക് പോവുകയും ചെയ്തു. എന്നാൽ, കുമാർ തിരിച്ചുവരാതെ മുങ്ങുകയായിരുന്നു.

ബി. രാമു മോഷണക്കേസിൽ അറസ്റ്റിലായ പ്രതിയാണ്. വാർഡനെ ചുറ്റിക കൊണ്ട് ആക്രമിച്ചത് രാമുവാണെന്നാണ് റിപ്പോർട്ട്.നക്ക രവികുമാർ മുൻ പഞ്ചായത്ത് സെക്രട്ടറിയാണ്. ഇയാൾ, വിരമിക്കൽ ആനുകൂല്യങ്ങൾക്കുള്ള ഫണ്ട് തട്ടിയെടുത്ത കേസിൽ അറസ്റ്റിലായതാണ്.

സംഭവം അറിഞ്ഞ മറ്റ് ജയിൽ ഉദ്യോഗസ്ഥർ എത്തുമ്പോഴേക്കും തടവുകാർ രക്ഷപ്പെട്ടിരുന്നു. പൊലിസ് ഇവരെ കണ്ടെത്താൻ തീവ്രമായ തിരച്ചിൽ ആരംഭിച്ചിട്ടുണ്ട്. ജയിലിന്റെ സുരക്ഷാ വീഴ്ചയെക്കുറിച്ചും അന്വേഷണം നടക്കുന്നുണ്ട്.