ദുബൈ: ​ഗസ്സ മുനമ്പിൽ നിന്ന് ഫലസ്തീനികളെ കുടിയിറക്കുമെന്ന ഇസ്റാഈൽ പ്രധാനമന്ത്രി ബെഞ്ചമിൻ നെതന്യാഹുവിന്റെ പ്രസ്താവനയെ ശക്തമായി അപലപിച്ച് യുഎഇ. ഫലസ്തീൻ ജനതയെ ലക്ഷ്യം വെച്ചുള്ള എല്ലാ കുടിയിറക്ക ശ്രമങ്ങളെയും അപലപിക്കുന്നതായി യുഎഇ ആവർത്തിച്ചു.

ALSO READ: ജറുസലേമിലും ഇസ്ലാമിക, ക്രിസ്ത്യൻ പുണ്യസ്ഥലങ്ങളിലും ഇസ്റാഈലിന് പരമാധികാരമില്ല; സയണിസ്റ്റ് പദ്ധതി തള്ളി അറബ് രാജ്യങ്ങൾ

ഫലസ്തീൻ ജനതയെ പിന്തുണയ്ക്കുന്നതിനും അവരെ കുടിയിറക്കാനുള്ള ശ്രമങ്ങളെ നേരിടുന്നതിനും സാധാരണക്കാരുടെ ദുരിതങ്ങൾ ലഘൂകരിക്കുന്നതിനും ഉടനടി വെടിനിർത്തൽ നടപ്പാക്കാനുള്ള ഈജിപ്തിന്റെ നിരന്തരമായ ശ്രമങ്ങളെ യുഎഇ അഭിനന്ദിച്ചു. ഈജിപ്തിന്റെ എല്ലാ ശ്രമങ്ങൾക്കും യുഎഇ പിന്തുണ പ്രഖ്യാപിക്കുകയും ചെയ്തു.

ഫലസ്തീൻ ജനതയെ കുടിയിറക്കാനുള്ള നെതന്യാഹുവിന്റെ ആഹ്വാനങ്ങൾ അന്താരാഷ്ട്ര നിയമങ്ങളുടെയും യുഎൻ പ്രമേയങ്ങളുടെയും നഗ്നമായ ലംഘനമാണെന്നും, സ്വന്തം മണ്ണിൽ തുടരാനും സ്വതന്ത്രവും പരമാധികാരവുമായ രാഷ്ട്രം സ്ഥാപിക്കാനുമുള്ള ഫലസ്തീൻ ജനതയുടെ  അവകാശത്തിന്മേലുള്ള നഗ്നമായ കടന്നുകയറ്റമാണെന്നും വിദേശകാര്യ മന്ത്രാലയം പ്രസ്താവനയിൽ വ്യക്തമാക്കി.

ALSO READ: ഗസ്സയില്‍ 'നരകത്തിന്റെ വാതിലുകള്‍' തുറന്നെന്ന് ഇസ്‌റാഈല്‍ പ്രതിരോധ മന്ത്രി; ആക്രമണം ശക്തം, ഗസ്സ സിറ്റിയിലെ ബഹുനില ടവര്‍ നിരപ്പാക്കി, ഇന്ന് കൊല്ലപ്പെട്ടത് 44 പേര്‍ 

ഫലസ്തീൻ ജനതയുടെ അവകാശങ്ങൾ സംരക്ഷിക്കുക എന്നത് ഒരു തിരഞ്ഞെടുപ്പല്ലെന്നും മറിച്ച് ധാർമ്മികവും മാനുഷികവും നിയമപരവുമായ ബാധ്യതയാണെന്നും യുഎഇ അടിവരയിട്ടു. പലസ്തീൻ രാഷ്ട്ര സ്ഥാപനത്തെ ഇല്ലാതാക്കാനും ഫലസ്തീൻ ജനതയെ കുടിയിറക്കാനുമുള്ള എല്ലാ ശ്രമങ്ങളെയും നിരാകരിക്കുന്നതായും യുഎഇ അറിയിച്ചു.

അന്താരാഷ്ട്ര നിയമസാധുത പ്രമേയങ്ങൾക്ക് അനുസൃതമായി ദ്വിരാഷ്ട്ര പരിഹാര മാർ​ഗത്തിലൂടെ സ്വതന്ത്ര ഫലസ്തീൻ രാഷ്ട്രം സ്ഥാപിക്കുന്നതിലൂടെ മാത്രമേ മേഖലയിൽ സ്ഥിരത കൈവരിക്കാൻ കഴിയൂ എന്നും യുഎഇ ചൂണ്ടിക്കാട്ടി.

the uae has strongly condemned israeli prime minister benjamin netanyahu’s statement suggesting the evacuation of palestinians from gaza, calling it a violation of international law and human rights.