ഡൽഹി: ഉപരാഷ്ട്രപതി തെരഞ്ഞെടുപ്പ് നാളെ നടക്കും. ഉപരാഷ്ട്രപതി തെരഞ്ഞെടുപ്പിന് മുന്നോടിയായി പാർലമെന്റ് സെൻട്രൽ ഹാളിൽ പ്രതിപക്ഷ എംപിമാർ ഇന്ന് യോഗം ചേരും. വോട്ട് ചെയ്യേണ്ടതെങ്ങെനെയാണെന്നുള്ളതടക്കം നേതാക്കൾ എംപിമാരോട് വിശദീകരിക്കും.  എംപിമാർക്ക് കോൺഗ്രസ് അധ്യക്ഷൻ മല്ലിഗാർജുൻ ഖാർഗെയുടെ വീട്ടിൽ  അത്താഴ വിരുന്നും രാത്രി ഒരുക്കും. 

ഇന്ത്യ സഖ്യം സ്ഥാനാർത്ഥി ബി സുദർശൻ റെഡി എല്ലാ എംപിമാരുടെയും പിന്തുണ അഭ്യർത്ഥിച്ചുകൊണ്ടുള്ള ഒരു വീഡിയോ സന്ദേശം കഴിഞ്ഞദിവസം പുറത്തിറക്കിയിരുന്നു. ഉപരാഷ്ട്രപതിയായി തെരഞ്ഞെടുക്കപ്പെട്ടാൽ രാജ്യസഭയെ സംവാദത്തിനുള്ള ഒരു യഥാർത്ഥ ബേദി ആക്കി മാറ്റും എന്നും പാർലമെന്ററി സമിതികളെ രാഷ്ട്രീയ സമ്മർദ്ദങ്ങളിൽ നിന്നും മുക്തമാക്കുമെന്നുമാണ് സുദർശൻ വീഡിയോയിൽ പറഞ്ഞത്.

അതേസമയം എൻഡിഎ എംപിമാരും ഇന്ന് യോഗം ചേരാൻ സാധ്യതയുണ്ട്. ആകെ 783 എംപിമാരിൽ 442 എൻഡിഎയ്ക്ക് ഉള്ളത്. പ്രതിപക്ഷത്ത് 320 ആളുകളും ആണ് ഉള്ളത്. എന്നാൽ ബിആർഎസ്, ബിജു ജനതാദൾ എന്നീ കക്ഷികൾ ഇതുവരെ നിലപാട് പ്രഖ്യാപിച്ചിട്ടില്ല.