കൊല്ലം: സംസ്ഥാനത്ത് 600ൽ അധികം സർക്കാർ സ്‌കൂൾ കെട്ടിടങ്ങൾ അപകടഭീഷണിയിൽ. ഇവ അടിയന്തരമായി പൊളിച്ചുമാറ്റണമെന്നും 200 സ്‌കൂളുകളിലെ കെട്ടിടങ്ങൾ ഭാഗികമായി അറ്റകുറ്റപ്പണി നടത്തണമെന്നും പൊതുവിദ്യാഭ്യാസ വകുപ്പ് നിർദേശം. റിപ്പോർട്ട് ഓണാവധിക്ക് മുമ്പ് സർക്കാരിന് കൈമാറിയതായാണ് സൂചന.

അപകടഭീഷണി നേരിടുന്ന കെട്ടിടങ്ങൾ പൊളിച്ചുമാറ്റേണ്ട ചുമതല തദ്ദേശസ്ഥാപനങ്ങൾക്കായതിനാൽ തദ്ദേശ വകുപ്പിന് റിപ്പോർട്ട് കൈമാറും. അതേസമയം, അപകടഭീഷണിയുള്ള കെട്ടിടങ്ങളിൽ നിലവിൽ ക്ലാസുകൾ നടക്കുന്നില്ലെന്ന വിചിത്ര വാദമാണ് പൊതുവിദ്യാഭ്യാസ വകുപ്പ് നൽകുന്നത്. തിരുവനന്തപുരത്താണ് ഏറ്റവും കൂടുതൽ അപകട ഭീഷണിയുള്ള സ്‌കൂൾ കെട്ടിടങ്ങളുള്ളതെന്നാണ് വിവരം. ഒരു സ്‌കൂളിൽ ഒന്നിലധികം കെട്ടിടങ്ങൾ അപകടഭീഷണി നേരിടുന്നുണ്ടെന്നും കണ്ടെത്തിയിട്ടുണ്ട്. 

സംസ്ഥാനത്ത്  4,500ലധികം സർക്കാർ സ്‌കൂളുകളാണുള്ളത്. കൊല്ലത്തെ ദുരന്തത്തിനുപിന്നാലെ മുഖ്യമന്ത്രി വിളിച്ചുചേർത്ത ഉന്നതതലയോഗത്തിൽ വിവിധ വകുപ്പുകൾ അവതരിപ്പിച്ച കണക്കിൽ പൊരുത്തക്കേടുകൾ കണ്ടെത്തിയതിനെ തുടർന്ന് സ്‌കൂൾ കെട്ടിടങ്ങളുടെ ഫിറ്റ്‌നസ് വീണ്ടും പരിശോധിച്ച് റിപ്പോർട്ട് നൽകാൻ പൊതുവിദ്യാഭ്യാസ വകുപ്പിനോട് ആവശ്യപ്പെടുകയായിരുന്നു.

സർക്കാർ സ്‌കൂൾ കെട്ടിടങ്ങളിൽ ബലക്ഷയമുള്ളവ 585 എണ്ണമെന്നായിരുന്നു വിദ്യാഭ്യാസ വകുപ്പ് യോഗത്തിൽ എടുത്ത നിലപാട്. എന്നാൽ, തദ്ദേശ വകുപ്പിന്റെ കണ്ടെത്തൽ 615 എണ്ണം ഉണ്ടെന്നായിരുന്നു. ഇരു വകുപ്പുകളും അവതരിപ്പിച്ച കണക്കുകളിൽ വൈരുധ്യമുണ്ടെന്ന് കണ്ടതോടെയാണ് വീണ്ടും പരിശോധന നടത്തിയത്. പൊളിച്ചുമാറ്റേണ്ടവ, അറ്റകുറ്റപ്പണി വേണ്ടവ എന്നിവ വേർതിരിച്ചാണ് നൽകിയിരിക്കുന്നത്. 

പൊതുവിദ്യാഭ്യാസ വകുപ്പ് നൽകിയ റിപ്പോർട്ട് തദ്ദേശ വകുപ്പ് പരിശോധിച്ച് തുടർനടപടികൾ എടുക്കാൻ മാസങ്ങൾ എടുക്കും. അതിനാൽ തദ്ദേശ തെരഞ്ഞെടുപ്പ് വിജ്ഞാപനത്തിന് മുമ്പ് പൊളിച്ചുമാറ്റൽ നടപടികൾ ഉണ്ടാകില്ലെന്നാണ് സൂചന.