കൊച്ചി: വിമാന യാത്രക്കാർക്ക് കൂടുതൽ സംതൃപ്തി നൽകുന്നതിലും ഗുണമേന്മയിലും  ഏറ്റവും മുന്നിൽ നിൽക്കുന്ന വിമാനത്താവളങ്ങൾ കൊച്ചിയും കണ്ണൂരും. എയർപോർട്ടുകൾ സംബന്ധിച്ച സർവേ നടത്തുന്ന ഇൻ്റർനാഷനൽ ബോഡിയായ എയർപോർട്ട് കൗൺസിൽ ഇൻ്റർനാഷനലിൻ്റെ റിപ്പോർട്ടിലാണ് കേരളത്തിലെ വിമാനത്താവളങ്ങൾ മുന്നിലെത്തിയത്. സ്വകാര്യ പങ്കാളിത്തത്തോടെ പ്രവർത്തിക്കുന്ന (പി.പി.പി ) രാജ്യത്തെ 13 വിമാനത്താവളങ്ങളിൽ ഒന്നാം സ്ഥാനത്ത് കൊച്ചി അന്താരാഷ്ട്ര വിമാനത്താവളവും അഞ്ചാം സ്ഥാനത്ത് കണ്ണൂരുമാണ്. ഇരു വിമാനത്താവളങ്ങളും റാങ്കിങ്ങിൽ അഞ്ച് പോയിൻ്റ്  വീതം നേടിയാണ് മുന്നിലെത്തിയത്. 

പി.പി. പി മോഡലിൽ പ്രവർത്തിക്കുന്ന തിരുവനന്തപുരം വിമാനത്താവളം റാങ്കിങ്ങിൽ ഏറ്റവും പിന്നിലായി 13-ാം സ്ഥാനത്താണ്. 4.82 പോയിൻ്റ് നേടാൻ മാത്രമേ അദാനിയുടെ നേതൃത്വത്തിൽ പ്രവർത്തിക്കുന്ന തിരുവനന്തപുരത്തിന് കഴിഞ്ഞിട്ടുള്ളു. സംതൃപ്തി യുടെ കാര്യത്തിൽ പിന്നിലാണെങ്കിലും ചെലവ് കുറഞ്ഞ വിമാനത്താവളങ്ങളുടെ കൂട്ടത്തിൽ തിരുവനന്തപുരം മുന്നിലാണ്. ഒപ്പം കണ്ണൂർ വിമാനത്താവളവും. 

എയർപോർട്ട് അതോറിറ്റി ഓഫ് ഇന്ത്യയുടെ കീഴിൽ പ്രവർത്തിക്കുന്ന കോഴിക്കോട് കരിപ്പൂർ വിമാനത്താവളത്തിനും 4. 82 പോയിൻ്റ് നേടൻ മാത്രമേ കഴിഞ്ഞിട്ടുള്ളൂ. യാത്രക്കാരുടെ സംതൃപ്തിയാണ് പ്രധാനമായും റാങ്കിങ്ങിൽ പരിഗണിക്കുന്നത്. 

എയർപോർട്ട് നാവിഗേഷൻ, ചെക്ക് ഇൻ പ്രോസസ്, ഷോപ്പിങ് അനുഭവം, ഭക്ഷണ സൗകര്യങ്ങൾ, പരിസ്ഥിതി, മെച്ചപ്പെട്ട അടിസ്ഥാന സൗകര്യങ്ങൾ, പൊതുശുചിത്വം  എന്നിവ പരിഗണിച്ചാണ്  പോയിൻ്റ് നൽകുന്നത്. രാജ്യത്തെ വിമാനത്താവളങ്ങളിൽ പി. പി പി എയർ പോർട്ടുകളുടെ ശരാശരി സംതൃപ്തി 4.81 പോയിൻ്റും എയർപോർട്ട് അതോറിറ്റി ഇന്ത്യ  എയർപോർട്ടുകളുടെ ശരാശരി റാങ്കിങ് 4.96 പോയിൻ്റുമാണ്. കൊച്ചിക്കും കണ്ണൂരിനും പുറമേ ഡൽഹി, ഹൈദരാബാദ്, മുംബൈ എന്നീ വിമാനത്താവളങ്ങളാണ് അഞ്ച് പോയിൻ്റ് വീതം നേടി മുന്നിലെത്തിയത്.

യാത്രക്കാർക്ക് ലഭിക്കുന്ന സംതൃപ്തി പരിശോധിച്ചാണ് .  യാത്രക്കാർക്ക് ലഭിക്കുന്ന സംതൃപ്തി പരിശോധിച്ചാണ്  എയർപോർട്ടുകളുടെ സൗകര്യങ്ങളും സാങ്കേതിക ക്രമീകരണങ്ങളും മെച്ചപ്പെടുത്തുന്നത്.  ചെലവ് കുറഞ്ഞ വിമാനത്താവളങ്ങളിൽ ഏറ്റവും മുന്നിലുള്ള  കണ്ണൂരിൽ എംബാർക്കേഷൻ ഫീസ് ഇൻ്റർനാഷനൽ യാത്രക്കാർക്ക് 1,680 രൂപയും ആഭ്യന്തര യാത്രയ്ക്ക് 750 രൂപയുമാണ് ഈടാക്കുന്നത്. തിരുവനന്തപുരത്ത്  മറ്റ് സ്ഥലങ്ങളെ അപേക്ഷിച്ച് ഫീസ് കുറവാണ്. മുൻ വർഷത്തേക്കാൾ തിരുവനനന്തപുരം വിമാനത്താവളത്തിൻ്റെ പോയിൻ്റ് നില 4.92 ആയി മെച്ചപ്പെട്ടിട്ടുണ്ടെന്നും പുതിയ എയർപോർട്ടുകളുമായി പതിറ്റാണ്ടുകൾ പഴക്കമുള്ള തിരുവനന്തപുരത്തെ താരതമ്യം ചെയ്യാൻ കഴിയില്ലെന്നും തിരുവനന്തപുരം എയർപോർട്ട് കൈകാര്യം ചെയ്യുന്ന അദാനി ഗ്രൂപ്പ് വക്താവ് സുപ്രഭാതത്തോട് പറഞ്ഞു. ഭൗതിക സൗകര്യങ്ങൾ മെച്ചപ്പെടുത്തുകയാണ്. പുതിയ ടെർമിനൽ വരുന്നതോടെ പോയിൻ്റ് അഞ്ചിലേക്ക് എത്താൻ കഴിയുമെന്നും അദ്ദേഹം പറഞ്ഞു.