തിരുവനന്തപുരം: ദക്ഷിണ റെയില്‍വേയ്ക്കുള്ള ആദ്യ അമൃത് ഭാരത് എക്‌സ്പ്രസ് തമിഴ്നാടിന് അനുവദിച്ചു. വന്ദേഭാരത് ട്രെയിന്‍ കൈമാറിയതിന് പിന്നാലെയാണ് അമൃത് ഭാരത് കേരളത്തിന് നഷ്ടമായത്. നിയമസഭാ തെരഞ്ഞെടുപ്പില്‍ തമിഴ്നാട്ടില്‍ സ്വാധീനം ഉറപ്പിക്കാന്‍ ബി.ജെ.പി നടത്തുന്ന ശ്രമങ്ങളുടെ ഭാഗമാണ് 'പ്രത്യേക സ്‌നേഹം' എന്ന് രാഷ്ട്രീയ നിരീക്ഷകര്‍ വിലയിരുത്തുന്നു. കേരളത്തില്‍ നിന്ന് രണ്ട് കേന്ദ്രമന്ത്രിമാരുണ്ടായിട്ടും അവഗണന തുടരുന്നത് പ്രതിഷേധത്തിന് കാരണമായിട്ടുണ്ട്. 

കേരളത്തിന് അമൃത് ഭാരത് അനുവദിക്കുന്നത് പരിഗണനയില്‍ ഇല്ലെന്നും സൂചനകളുണ്ട്. തമിഴ്നാട്ടിലെ ഈറോഡില്‍ നിന്ന് ബിഹാറിലെ ജോഗ്ബാനിയിലേക്കാണ് ട്രെയിന്‍ സര്‍വിസ് തുടങ്ങുന്നത്. കഴിഞ്ഞ ഫെബ്രുവരിയിലാണ് ദക്ഷിണ റെയില്‍വേക്ക് അമൃത് ഭാരത് അനുവദിച്ചത്. റൂട്ട് സംബന്ധിച്ച ആശയക്കുഴപ്പങ്ങള്‍ കാരണം ഉപയോഗിക്കാതെ വെറുതെയിട്ടിരിക്കുകയായിരുന്നു. പെരമ്പൂര്‍ ഇന്റഗ്രല്‍ കോച്ച് ഫാക്ടറി ആണ് അമൃത് ഭാരത് നിര്‍മിച്ചത്.15ന് ജോഗ്ബനിയില്‍നിന്ന് ഈറോഡിലേക്കാണ് ആദ്യ സര്‍വിസ് ഫ്‌ളാഗ് ഓഫ് ചെയ്യുക. 

ഈറോഡില്‍ നിന്ന് എല്ലാ വ്യാഴാഴ്ചയും രാവിലെ ഏഴിന് പുറപ്പെടുന്ന ട്രെയിന്‍ (16601) ശനിയാഴ്ച രാത്രി ഏഴിന് ജോഗ്ബനിയിലെത്തും. അവിടെ നിന്ന് ഞായറാഴ്ചകളില്‍ ഉച്ചയ്ക്ക് ശേഷം 3.15-ന് പുറപ്പെട്ട് ബുധനാഴ്ച രാവിലെ 7.30ന് ഈറോഡിലെത്തും. സേലം, കാട്പാഡി, പെരമ്പൂര്‍, വിജയവാഡ, നാഗ്പൂര്‍, ജബല്‍പൂര്‍, പട്ന, കതിഹാര്‍ ഉള്‍പ്പെടെ 50 സ്റ്റോപ്പുകളുണ്ടാകും. എട്ട് റെയില്‍വേ സോണുകളിലൂടെ 3,300 കിലോമീറ്ററിലധികം ദൂരമാണ് ട്രെയിന്‍ സഞ്ചരിക്കുന്നത്.