മോസ്‌കോ: റഷ്യന്‍ പ്രതിപക്ഷ നേതാവ് അലക്‌സി നാവല്‍നിയുടെ മരണം കൊലപാതകമെന്ന് ആവര്‍ത്തിച്ച് വിധവ യൂലിയ നാവല്‍നിയ. രഹസ്യമായി കടത്തിയ സാമ്പിളുകള്‍ വെച്ച് രണ്ട് വിദേശ ലബോറട്ടറികളില്‍ നടത്തിയ പരിശോധനകളില്‍, വിഷബാധയേറ്റതിന്റെ തെളിവുകളുണ്ടെന്നാണ് ഭാര്യയുടെ വെളിപ്പെടുത്തല്‍. റഷ്യന്‍ ഭരണകൂടം നാവല്‍നിയെ കൊലപ്പെടുത്തിയതാകാമെന്ന് നേരത്തെ ആരോപണമുയര്‍ന്നിരുന്നു.

2024 ഫെബ്രുവരി 16നാണ് രാഷ്ട്രീയ തടവുകാരനായിരുന്ന നാവല്‍നി ജയിലില്‍വെച്ച് മരണപ്പെടുന്നത്. ആര്‍ടിക് മേഖലയിലെ ജയിലിലായിരുന്നു നാവല്‍നിയെ പാര്‍പ്പിച്ചിരുന്നത്. 24 മണിക്കൂറും സിസിടിവി നിരീക്ഷണമുള്ള അതീവ സുരക്ഷ ജയിലിലായിരുന്നു നാവല്‍നി. എന്നാല്‍ മരണത്തിന് തലേദിവസത്തെ ദൃശ്യങ്ങള്‍ അപ്രത്യക്ഷമായതായി യൂലിയ ആരോപിച്ചു. 

നാവല്‍നിയുടെ മരണത്തിന് പിന്നാലെ പുറത്തുവന്ന ഫോട്ടോകളില്‍ തറയില്‍ ഛര്‍ദ്ദിയും, രക്തവും ഉള്ളതായി വ്യക്തമായിരുന്നു. തുടക്കം മുതല്‍ തന്നെ ആരോപണം റഷ്യന്‍ ഭരണകൂടം നിഷേധിച്ചിരുന്നെങ്കിലും മുന്‍പും പ്രതിപക്ഷ നേതാക്കളെ കൊലപ്പെടുത്തിയ ചരിത്രം റഷ്യക്കുണ്ടെന്നാണ് ആരോപണമുയരുന്നത്. 

ALSO READ: ഹൈഡ്രജന്‍ ബോംബ് നാളെ? രാഹുല്‍ ഗാന്ധിയുടെ പ്രത്യേക വാര്‍ത്ത സമ്മേളനം ഡല്‍ഹിയില്‍ 

295 ദിവസത്തെ ഏകാന്ത തടവിന് ശേഷമാണ് റഷ്യയിലെ ഏറ്റവും ജനപ്രീതിയുള്ള രാഷ്ട്രീയ നേതാക്കളിലൊരാളായ അലക്‌സി നാവല്‍നി മരണപ്പെടുന്നത്. നാവല്‍നിയുടെ മരണത്തില്‍ തുടക്കത്തില്‍ തന്നെ ദുരൂഹത ആരോപിക്കപ്പെട്ടിരുന്നു. പുടിന്റെ ഏറ്റവും വലിയ വിമര്‍ശകനായിരുന്ന നാവല്‍നിയെ ഭരണകൂടം കൊലപ്പെടുത്തിയെന്നാണ് ഭാര്യ ആരോപിക്കുന്നത്. 2021ല്‍ നാവല്‍നിക്കെതിരെ വിഷപ്രയോഗം നടന്നിരുന്നെന്നും എന്നാല്‍ നാവല്‍നി ഇത് അതിജീവിച്ചെന്നുമാണ് റിപ്പോര്‍ട്ടുകള്‍. 

നാവല്‍നിയുടെ മരണത്തിന് പിന്നാലെ ഭാര്യ യൂലിയ വിദേശത്തേക്ക് ചേക്കേറി. റഷ്യയില്‍ തിരിച്ചെത്തിയാല്‍ രാജ്യദ്രോഹ കുറ്റമടക്കം ഗുരുതര വകുപ്പുകള്‍ യൂലിയക്കെതിരെ ചുമത്താന്‍ സാധ്യതയുണ്ടെന്നാണ് രാഷ്ട്രീയ വിദഗ്ദര്‍ പറയുന്നത്.

Russian opposition leader Alexei Navalny’s death was a murder claims wife