തിരുവനന്തപുരം: സംസ്ഥാനത്ത് വര്‍ധിച്ചുവരുന്ന വിലക്കയറ്റത്തില്‍ സഭയില്‍ അടിയന്തര പ്രമേയ ചര്‍ച്ച തുടങ്ങി. പ്രതിപക്ഷ എം.എല്‍.എയായ പി.സി വിഷ്ണുനാഥ് ആണ് അടിയന്തര പ്രമേയത്തിന് നോട്ടിസ് നല്‍കിയത്.

'രാജ്യത്ത് ഏറ്റവുമധികം പണപ്പെരുപ്പമുള്ള സംസ്ഥാനമായി കേരളം മാറി. വിലക്കയറ്റത്തോതില്‍ കേരളം നമ്പര്‍വണ്‍ ആണ്. മലയാളിക്ക് ഭക്ഷണത്തില്‍ ഒഴിച്ചുകൂടാന്‍ കഴിയാത്ത ഒന്നാണ് വെളിച്ചെണ്ണ. പപ്പടത്തിന് വെളിച്ചെണ്ണയിലേക്ക് എത്താന്‍ ഇനിയും ഒരുപാട് കാത്തിരിക്കേണ്ടിവരുമെന്നും പപ്പടം ചുട്ടു തിന്നേണ്ട അവസ്ഥയാണെന്നും പി.സി വിഷ്ണുനാഥ് പറഞ്ഞു.

'സബ്‌സിഡി സാധനങ്ങള്‍ക്ക് വില കൂട്ടില്ല എന്ന് ബി.ജി.എം ഇട്ട് കുറെ ഓടിച്ചതാണ്. സപ്ലൈക്കോ അടക്കം എല്ലാ സംവിധാനവും പരാജയമാണ്. 420 കോടി ആവശ്യപ്പെട്ടതില്‍ പകുതി പോലും അനുവദിച്ചില്ലെന്നും അദ്ദേഹം പറഞ്ഞു. 

വിലക്കയറ്റം പിടിച്ചുനിര്‍ത്താന്‍ സര്‍ക്കാരിന് മുന്നില്‍ ഒരു മാര്‍ഗ്ഗമേയുള്ളൂ. അന്തര്‍ദേശീയ വിലക്കയറ്റ വിരുദ്ധ കോണ്‍ക്ലേവ് സംഘടിപ്പിക്കണം. ഇപ്പോള്‍ കോണ്‍ക്ലേവുകളുടെ കാലമല്ലേയെന്നും വിഷ്ണുനാഥ് പരിഹസിച്ചു.

സാധാരണ ജനങ്ങള്‍ക്ക് ജീവിക്കാന്‍ കഴിയാത്ത അവസ്ഥയിലേക്ക് കാര്യങ്ങള്‍ നീങ്ങുകയാണെന്നും, ജനങ്ങളുടെ കയ്യില്‍ പണമില്ലാത്ത സാഹചര്യത്തില്‍ സംസ്ഥാന സര്‍ക്കാരോ ഭക്ഷ്യവകുപ്പോ പ്രതിസന്ധി പരിഹരിക്കാനായി ഒന്നും ചെയ്യുന്നില്ലെന്നുമാണ് പ്രതിപക്ഷം ആരോപിക്കുന്നത്.

നിയമസഭയില്‍ മൂന്ന് ദിവസവും അടിയന്തര പ്രമേയത്തില്‍ ചര്‍ച്ച നടക്കുകയാണ്. സഭാ സമ്മേളനത്തിന്റെ ആദ്യദിനം പൊലിസ് അതിക്രമത്തെക്കുറിച്ചും ഇന്നലെ അമീബിക് മസ്തിഷ്‌ക ജ്വരം വര്‍ധിക്കുന്ന സാഹചര്യത്തെക്കുറിച്ചുമാണ് ചര്‍ച്ച നടന്നത്.