കൊച്ചി: ഭൂട്ടാനിലെ നിന്ന് നികുതി വെട്ടിച്ച് ഇന്ത്യയിലേക്ക് ഇരുന്നൂറോളം ആഡംബര വാഹനങ്ങൾ ഇറക്കുമതി ചെയ്തിട്ടുണ്ടെന്ന് വെളിപ്പെടുത്തി കസ്റ്റംസ്. ആകെ 198 വാഹനങ്ങൾ കടത്തിയെന്നാണ് പ്രാഥമിക വിവരം. എന്നാൽ ഇവയിൽ എത്രയെണ്ണം കേരളത്തിൽ എത്തിയിട്ടുണ്ടെന്ന് വ്യക്തമല്ല. ഇത് കണ്ടെത്താനുള്ള ശ്രമങ്ങൾ നടത്തുകയാണ് കസ്റ്റംസ്. സിനിമ താരങ്ങളായ പൃഥ്വിരാജ്, ദുൽഖർ സൽമാൻ, അമിത് ചക്കാലക്കൽ എന്നിവരുടെ കൊച്ചിയിലെ വീടുകളിൽ കസ്റ്റംസ് നടത്തിവരുന്ന പരിശോധന പുരോഗമിക്കുകയാണ്. കോഴിക്കോട്, മലപ്പുറം ജില്ലകളിൽ നിന്നായി 11 വാഹനങ്ങളിൽ നിന്ന് പിടിച്ചെടുത്തെന്നാണ് വിവരം.

ഭൂട്ടാൻ പട്ടാളം ഉപേക്ഷിച്ചത് അടക്കമുള്ള എസ്‍യുവികളാണ് ഭൂട്ടാനിൽ നിന്ന് ഇറക്കുമതി നികുതി വെട്ടിച്ച് ഇന്ത്യയിൽ എത്തിച്ചത്. വാഹന ഡീലർമാരിൽ നിന്ന് അടക്കം ലഭിച്ച കണക്കുകളിലാണ് 198 വാഹനങ്ങൾ ഇന്ത്യയിലേക്ക് എത്തിയിട്ടുണ്ടെന്ന് കണക്കാക്കുന്നത്. എന്നാൽ ഇത് യഥാർത്ഥ കണക്കാണോ എന്ന് വ്യക്തമല്ല. ഇത് കണ്ടെത്താനാണ് രാജ്യത്താകെ ഓപ്പറേഷൻ നുംഖാർ എന്ന പേരിൽ പരിശോധന നടക്കുന്നത്. കേരളത്തിൽ നിന്ന് ഇതുവരെ 20ഓളം ആഡംബര എസ്‍യുവി വാഹനങ്ങൾ കസ്റ്റംസ് കസ്റ്റഡിയിലെടുത്തു എന്നാണ് വിവരം. കോഴിക്കോട്, മലപ്പുറം ജില്ലകളിൽ നിന്നു മാത്രമായി 11 വാഹനങ്ങൾ പിടിച്ചെടുത്തിട്ടുണ്ട്. സെക്കന്റ് ഹാൻഡ് ആഡംബര വാഹനങ്ങളുടെ ഷോറൂമുകളിലാണ് പരിശോധന. 

ALSO READ: നികുതി വെട്ടിപ്പിലൂടെ ഭൂട്ടാൻ വഴി വാഹനങ്ങൾ വാങ്ങിച്ചു?; പൃഥ്വിരാജിന്റെയും ദുൽഖർ സൽമാന്റെയും വീടുകളിൽ കസ്റ്റംസ് റെയ്ഡ്

ഭൂട്ടാനിൽ നിന്ന് എത്തിയ വാഹനങ്ങൾ വാങ്ങിച്ചവരിൽ സിനിമാ താരങ്ങൾക്ക് പുറമെ കേന്ദ്ര സർക്കാരിലെ ഉന്നത ഉദ്യോഗസ്ഥരും ഉണ്ടെന്ന റിപ്പോർട്ടുകളാണ് പുറത്തുവരുന്നത്. നാഷണൽ ടിബി ഇൻസ്റ്റിറ്റ്യൂട്ട് ഡയറക്ടർ, സെൻട്രൽ സിൽക്ക് ബോർഡ് മെമ്പർ സെക്രട്ടറി എന്നിവർ വാഹനം വാങ്ങിയെന്ന വിവരവും കസ്റ്റംസിന് ലഭിച്ചിട്ടുണ്ട്. ഇരുവരുടെയും വാഹനങ്ങൾ ബെംഗളൂരുവിലാണ് ഉള്ളത്.

അതേസമയം, മലയാള സിനിമ താരങ്ങളായ പൃഥ്വിരാജ്, ദുൽഖർ സൽമാൻ, അമിത് ചക്കാലക്കൽ എന്നിവരുടെ വീട്ടിൽ പരിശോധന തുടരുകയാണ്. ദുൽഖർ സൽമാന്റെയും മമ്മൂട്ടിയുടെയും വീടായ കൊച്ചിയിലെ എലംകുളത്തെ വീട്ടിലും പനമ്പിള്ളി നഗറിലെ പഴയ വീട്ടിലും കാറുകൾ സൂക്ഷിച്ചിരിക്കുന്ന ഗോഡൗണിലാണ് പരിശോധന. കസ്റ്റംസ് ഉദ്യോഗസ്ഥർക്കൊപ്പം കേരളത്തിലെ മോട്ടോർ വാഹന വകുപ്പ് ഉദ്യോഗസ്ഥരും പരിശോധനയിലുണ്ട്. വാഹനപ്രേമിയായ മമ്മൂട്ടിയ്ക്കും ദുൽഖറിനും പഴയ മോഡൽ വിന്റേജ് കാറുകൾ ഉൾപ്പെടെ പുതിയ വാഹനങ്ങൾ ഉൾപ്പെടെ സ്വന്തമായി നിരവധി വാഹനങ്ങൾ ഉണ്ട്.

വ്യാജ രജിസ്ട്രേഷനിലൂടെ നികുതി വെട്ടിപ്പ് നടത്തി ഭൂട്ടാനിൽ നിന്ന് ഇന്ത്യയിലേക്ക് വാഹനം എത്തിക്കുന്നവരെ കണ്ടുപിടിക്കാനുള്ള റെയ്ഡാണ് ഓപ്പറേഷൻ നുംഖോർ. ഭൂട്ടാൻ ഭാഷയിൽ വാഹനം എന്നർത്ഥം വരുന്ന വാക്കാണ് നുംഖോർ. ഭൂട്ടാനില്‍ നിന്ന് പട്ടാളം ഉപേക്ഷിച്ച വാഹനങ്ങള്‍ ഇന്ത്യയിലേക്ക് കടത്തി എന്ന പരാതി നേരത്തെ തന്നെ ഉയര്‍ന്നിരുന്നു. നിരവധി ആഡംബര വാഹനങ്ങളാണ് ഇത്തരത്തിൽ എത്തിയതെന്നാണ് കണക്കാക്കുന്നത്. വാഹനങ്ങള്‍ ഹിമാചല്‍ പ്രദേശിലെത്തിച്ച് രജിസ്ട്രേഷന്‍ ചെയ്ത് രാജ്യമെമ്പാടും വില്‍പ്പന നടത്തിയെന്നാണ് പരാതി.