കോഴിക്കോട്: കാലിക്കറ്റ് സര്‍വകലാശാല ഡിപ്പാര്‍ട്‌മെന്റല്‍ സ്റ്റുഡന്റ്‌സ് യൂണിയന്‍ തെരഞ്ഞെടുപ്പ് വൈസ് ചാന്‍സലര്‍ റദ്ദാക്കി. സീരിയല്‍ നമ്പറും റിട്ടേണിങ് ഓഫീസറുടെ ഒപ്പുമില്ലാത്ത ബാലറ്റ് പേപ്പര്‍ ഉപയോഗിച്ച് നടത്തിയ തെരഞ്ഞെടുപ്പ് ചട്ട വിരുദ്ധമാണെന്ന യു.ഡി.എസ്.എഫ് പരാതി അംഗീകരിച്ചാണ് വൈസ് ചാന്‍സലര്‍ തെരഞ്ഞെടുപ്പ് റദ്ദാക്കിയത്. സിന്‍ഡിക്കേറ്റ് അംഗീകരിച്ച നിയമങ്ങള്‍ക്ക് അനുസൃതമായി അച്ചടിച്ച പുതിയ ബാലറ്റുകള്‍ ഉപയോഗിച്ച് വീണ്ടും തെരഞ്ഞെടുപ്പ് നടത്തുമെന്നും വി.സി അറിയിച്ചു. 

തെരഞ്ഞെടുപ്പ് പൂര്‍ത്തിയായ സാറ്റലൈറ്റ് ക്യാമ്പസുകളിലെ യൂണിയനുകളുടെ പ്രവര്‍ത്തനം തല്‍ക്കാലം തടയാനും വി.സി നിര്‍ദ്ദേശിച്ചു.തെരഞ്ഞെടുപ്പില്‍ ക്രമക്കേട് നടന്നുവെന്ന പരാതിയെത്തുടര്‍ന്ന് കാലിക്കറ്റ് സര്‍വകലാശാല കാമ്പസിലെ ഡി.എസ്.യു തെരഞ്ഞെടുപ്പ് നടത്തിപ്പിനെക്കുറിച്ചും ടിഎസ്ആര്‍, ഐഇടി, ഐടിഎസ്ആര്‍ എന്നിവിടങ്ങളിലെ ഡിഎസ് യു തെരഞ്ഞെടുപ്പിനെക്കുറിച്ചും അന്വേഷണം നടത്താനും വി.സി ഉത്തരവിട്ടിട്ടുണ്ട്. 

ALSO READ: വയോധികയുടെ വീട്ടിൽ അതിക്രമിച്ച് കയറി കൈകൂട്ടിപ്പിടിച്ച് കമ്മലൂരാൻ ശ്രമിച്ചു; ബഹളംവെച്ച വയോധികയുടെ മുഖത്തമർത്തി സ്വർണകവർച്ച; മഞ്ചേരിയിൽ യുവതി അറസ്റ്റിൽ, മകൾ ഒളിവിൽ

കഴിഞ്ഞ വെള്ളിയാഴ്ച്ച നടന്ന കാലിക്കറ്റ് യൂണിവേഴ്‌സിറ്റി കാമ്പസിലെ ഡിഎസ്.യുതെരഞ്ഞെടുപ്പിനോട് അനുബന്ധിച്ചുണ്ടായ വിദ്യാര്‍ഥി സംഘര്‍ഷങ്ങളെ തുടര്‍ന്ന് ക്ലാസുകള്‍ നിര്‍ത്തിവച്ചിരുന്നു. സമാധാനം പുനഃസ്ഥാപിക്കുന്നതിനും വിദ്യാര്‍ഥികളുടെ ജീവന്‍ സംരക്ഷിക്കുന്നതിനുമാണ് നടപടിയെന്ന് വൈസ് ചാന്‍സലര്‍ ഡോ.പി.രവീന്ദ്രന്‍ അറിയിച്ചു. ഒരറിയിപ്പ് ഉണ്ടാകും വരെ ക്ലാസുകള്‍ ഉണ്ടാകില്ല.  ഹോസ്റ്റലുകളും അടച്ചിടാന്‍ നിര്‍ദേശിച്ചിട്ടുണ്ട്. എല്ലാ വിദ്യാര്‍ഥികളും ഹോസ്റ്റലുകള്‍ ഉടന്‍ ഒഴിഞ്ഞ് വീട്ടില്‍ പോകണമെന്നും നിര്‍ദേശിച്ചിരുന്നു. 

സര്‍വകലാശാല സെമിനാര്‍ കോംപ്ലക്സില്‍ വച്ചായിരുന്നു തെരഞ്ഞെടുപ്പ് നടന്നിരുന്നത്. ഉച്ചക്ക് 12.30വരെ തെരഞ്ഞെടുപ്പ് നടക്കുന്നതിനിടയിലും യു.ഡി.എസ്. എഫ്, എസ്.എഫ്.ഐ പ്രവര്‍ത്തകര്‍ തമ്മില്‍ സംഘര്‍ഷം ഉണ്ടായിരുന്നു. എന്നാല്‍ വൈകീട്ടോടെ സംഘര്‍ഷത്തിന്റെ തീവ്രത കൂടി.

തെരഞ്ഞെടുപ്പ് നടക്കുന്ന സെമിനാര്‍ കോംപ്ലക്സിനകത്തുവച്ച് എസ്.എഫ്.ഐ പ്രവര്‍ത്തകന്റെ ബാഗില്‍ നിന്ന് വ്യാജ ബാലറ്റ് പേപ്പര്‍ യു.ഡി.എസ്.എഫ് പ്രവര്‍ത്തകര്‍ പിടിച്ചെടുത്തതോടെയാണ് സംഘര്‍ഷത്തി ന് തുടക്കം. സംഘര്‍ഷത്തിനിടെ 20 ഓളം പേര്‍ക്ക് പരുക്കേറ്റു. ഇവരെ കൊണ്ടുപോകാന്‍ ആംബുലന്‍സ് എത്തിയിരുന്നുവെങ്കിലും ആംബുലന്‍സ് അകത്തേക്ക് കടത്തിവിടാന്‍ എസ്.എഫ്.ഐക്കാരോ പൊലിസോ തയാറായില്ല. രാത്രി വൈകിയും സംഘര്‍ഷത്തിന് അയവ് വന്നിരുന്നില്ല.