കൊച്ചി: സി.പി.എം നേതാവ് കെ.ജെ ഷൈനിനെതിരെ സോഷ്യല്‍ മീഡിയയില്‍ അധിക്ഷേപ പ്രചാരണം നടത്തിയ  സംഭവത്തില്‍ പറവൂരിലെ കോണ്‍ഗ്രസ് നേതാവ് സി.കെ ഗോപാലകൃഷ്ണന്‍ അറസ്റ്റില്‍. എറണാകുളം റൂറല്‍ സൈബര്‍ പൊലിസാണ് അറസ്റ്റ് ചെയ്തത്. ഇയാളെ പിന്നീട് ജാമ്യത്തില്‍ വിട്ടു. 

കേസില്‍ ഒന്നാം പ്രതിയാണ് ഗോപാലകൃഷ്ണന്‍. ഇയാളുടെ മുന്‍കൂര്‍ ജാമ്യാപേക്ഷ ഹൈക്കോടതി തീര്‍പ്പാക്കിയിരുന്നു. കേസുമായി ബന്ധപ്പെട്ട് ഇയാളുടെ മൊബൈല്‍ ഫോണ്‍ അന്വേഷണസംഘം പിടിച്ചെടുത്തിരുന്നു. 

ഗോപാലകൃഷ്ണന്റെ ഫെയ്സ്ബുക്ക് അക്കൗണ്ട് മെറ്റ നീക്കുകയും ചെയ്തിരുന്നു. അന്വേഷണസംഘം മെറ്റയ്ക്ക് കത്ത് നല്‍കിയതിന് പിന്നാലെയാണ് നടപടി. 

കേസില്‍ രണ്ടാംപ്രതിയായ മാധ്യമപ്രവര്‍ത്തകനും മുന്‍ മുഖ്യമന്ത്രി വി.എസ്. അച്യുതാനന്ദന്റെ മുന്‍ അഡീഷനല്‍ പ്രൈവറ്റ് സെക്രട്ടറിയുമായ കെ.എം. ഷാജഹാനെ റൂറല്‍ സൈബര്‍ പൊലിസ് അറസ്റ്റ് ചെയ്തിരുന്നു. ഷൈനിന്റെ പേര് പരാമര്‍ശിച്ച് അധിക്ഷേപകരമായ പരാമര്‍ശങ്ങള്‍ അടങ്ങിയ വീഡിയോയാണ് അറസ്റ്റിന് കാരണമായത്.

ALSO READ: ആത്മഹത്യയ്ക്ക് ശ്രമിച്ച വിദ്യാര്‍ഥിനിയെയും കൊണ്ട് ആശുപത്രിയിലേക്ക് പോകവെ കാര്‍ അപകടം; 20 കാരിക്ക് ദാരുണാന്ത്യം, അമ്മയ്ക്കും സഹോദരനും പരുക്ക്

നേരത്തെ ഷൈനിന്റെ പരാതിയില്‍ രജിസ്റ്റര്‍ ചെയ്ത കേസുമായി ബന്ധപ്പെട്ട് ഷാജഹാനെ അന്വേഷണ സംഘം ചോദ്യം ചെയ്തിരുന്നു. വിവാദ വീഡിയോ സൂക്ഷിച്ച മെമ്മറി കാര്‍ഡ് ഷാജഹാന്‍ അന്വേഷണ സംഘത്തിന് കൈമാറിയിരുന്നു. എന്നാല്‍, ഷാജഹാന്റെ ഫോണ്‍ നേരത്തെ പിടിച്ചെടുത്തെങ്കിലും മെമ്മറി കാര്‍ഡ് നല്‍കാന്‍ വിസമ്മതിച്ചിരുന്നു. വീഡിയോയില്‍ ഷൈനിന്റെ പേര് പരാമര്‍ശിച്ചിട്ടില്ലെന്ന് ഷാജഹാന്‍ അന്വേഷണ സംഘത്തോട് ആവര്‍ത്തിച്ചിരുന്നു.

പുതിയ വീഡിയോയില്‍ വീണ്ടും ഷൈനിന്റെ പേര് പരാമര്‍ശിച്ച് അധിക്ഷേപം നടത്തിയതോടെ, ഷൈന്‍ പുതിയ പരാതി നല്‍കി. ഈ പരാതിയില്‍ റൂറല്‍ സൈബര്‍ പൊലിസ് പുതിയ കേസ് രജിസ്റ്റര്‍ ചെയ്താണ് ഷാജഹാനെ അറസ്റ്റ് ചെയ്തത്.

English  Summary: Congress leader C.K. Gopalakrishnan arrested for defamatory social media posts against CPM's K.J. Shine. Journalist K.M. Shajahan also held in connection with the case. Cyber police continue investigation.