ന്യൂഡല്‍ഹി: തിരുവനന്തപുരത്തെ പുതിയ എ.കെ.ജി സെന്റര്‍ സ്ഥിതി ചെയ്യുന്ന ഭൂമി വാങ്ങിയത് നിയമപ്രകാരമാണെന്ന് പാര്‍ട്ടി സെക്രട്ടറി എം.വി ഗോവിന്ദന്‍. 2021 ലാണ് 32 സെന്റ് ഭൂമി വാങ്ങിയത്. ഇതില്‍ 30 കോടിയോളം രൂപ ചെലവിട്ട് ഒന്‍പത് നില കെട്ടിടം പണിതതായും എം.വി ഗോവിന്ദന്‍ അറിയിച്ചു. സുപ്രിംകോടതിയില്‍ ഫയല്‍ ചെയ്ത സത്യവാങ്മൂലത്തിലാണ് ഇക്കാര്യം വ്യക്തമാക്കിയത്. 

ഐ.എസ്.ആര്‍.ഒ ശാസ്ത്രജ്ഞയായ ഇന്ദു സുപ്രിം കോടതിയില്‍ ഫയല്‍ ചെയ്ത കേസിലാണ് സി.പി.എം സംസ്ഥാന സെക്രട്ടറിക്ക് സുപ്രിം കോടതി നോട്ടിസ് അയച്ചിരുന്നത്. 

ഭൂമിയുടെ കൈമാറ്റം നിയമാനുസൃതമാണെന്നതിന് എല്ലാ രേഖകളും തെളിവായുണ്ട്. നിയമ തര്‍ക്കം അറിഞ്ഞാണ് ഭൂമി വാങ്ങിയത്. എന്നാല്‍ വാങ്ങുന്ന സമയത്ത് ഭൂമി സംബന്ധിച്ച കേസുകളുണ്ടായിരുന്നില്ല. ഹൈക്കോടതി തള്ളിയ വാദങ്ങളാണ് അപ്പീലിലും ഉയര്‍ത്തിയിട്ടുള്ളതെന്നും സി.പി.എം വ്യക്തമാക്കി.

ALSO READ: 'സൂക്ഷിച്ച് സംസാരിക്കണം, എന്നെ ഉപദേശിക്കാന്‍ വരണ്ട'; സജി ചെറിയാനെതിരെ ജി.സുധാകരന്‍

നിലവില്‍ എ.കെ.ജി സെന്റര്‍ നില്‍ക്കുന്ന 34 സെന്റ് ഭൂമി 1998 ല്‍ താനും 2000 ല്‍ തന്റെ മുത്തച്ഛന്‍ ജനാര്‍ദ്ദനന്‍ പിള്ളയും ചേര്‍ന്ന് രണ്ട് രേഖകളിലായി വാങ്ങിയതാണെന്നാണ് ഇന്ദുവിന്റെ വാദം. ഇക്കാര്യം മറച്ചുവെച്ച് കോട്ടയത്തെ സ്വകാര്യ ധനകാര്യ സ്ഥാപനം സി.പി.എമ്മിന് വില്‍പ്പന നടത്തിയെന്നാണ് പരാതി.

ഈ ഭൂമിയുടെ ആദ്യ ഉടമ പോത്തന്‍ കുടുംബാംഗങ്ങള്‍ ആയിരുന്നു. അവര്‍ ഫിനാന്‍സ് ആന്റ് ഇന്‍വെസ്റ്റ്മെന്റ് കോര്‍പറേഷനില്‍ നിന്നെടുത്ത വായ്പയുടെ തിരിച്ചടവ് മുടങ്ങിയതോടെ സ്ഥാപനം ജപ്തി നടപടികളിലേക്ക് കടന്നു. ഇതിനിടെയാണ് ഇന്ദുവും മുത്തച്ഛനും ചേര്‍ന്ന് ഈ ഭൂമി വാങ്ങിയത്. സി.പി.എം ഭൂമി വാങ്ങിയ സമയത്ത് ഭൂമിയില്‍ തര്‍ക്കമുള്ള കാര്യം ചൂണ്ടിക്കാണിച്ച് ഇന്ദു ഗോപന്‍ അന്നത്തെ സെക്രട്ടറി കോടിയേരി ബാലകൃഷ്ണന് നല്‍കിയ കത്തും പുറത്തുവന്നിരുന്നു.

English  Summary:CPI(M) leader M.V. Govindan tells the Supreme Court that the AKG Centre land in Thiruvananthapuram was purchased legally in 2021, and a ₹30 crore nine-storey building was constructed. The affidavit responds to a land dispute claim by ISRO scientist Indu Gopan.