ആലപ്പുഴ: തന്നെ ഉപദേശിക്കാന്‍ മന്ത്രി സജി ചെറിയാന്‍ വരേണ്ടെന്ന് മുന്‍ മന്ത്രി ജി.സുധാകരന്‍. പാര്‍ട്ടിയോട് ചേര്‍ന്ന് പോകണമെന്ന് തന്നോട് പറയുന്നത് എന്ത് അടിസ്ഥാനത്തിലാണ്. തന്നെ ഉപദേശിക്കാനുള്ള അര്‍ഹതയോ, പ്രായമോ, ബോധമോ സജിക്കില്ല. അദ്ദേഹം സൂക്ഷിച്ച് സംസാരിക്കണം. ഏറ്റുമുട്ടാന്‍ സജി വരേണ്ട. തന്നോട് ഫൈറ്റ് ചെയ്ത് ഒരാളും ജയിച്ചിട്ടില്ല. തന്നെ ഉപദേശിക്കാന്‍ വരേണ്ടെന്നും ജി. സുധാകരന്‍ പറഞ്ഞു. 

''പാര്‍ട്ടിയോട് ചേര്‍ന്നു പോകണമെന്നാണ് സജി പറഞ്ഞത്. ഞാന്‍ പാര്‍ട്ടിയോട് ചേര്‍ന്നല്ല പോകുന്നത്, അകത്താണ് പ്രവര്‍ത്തിക്കുന്നത്. ഞാന്‍ ഇതുവരെ പാര്‍ട്ടിക്കെതിരെ പറഞ്ഞിട്ടില്ല. പാര്‍ട്ടിയില്‍നിന്ന് പാര്‍ട്ടിക്കെതിരെ പറയുന്നവരെയാണ് എതിര്‍ക്കുന്നത്.''- സുധാകരന്‍ പറഞ്ഞു. 

'ബി.ജെ.പിയില്‍ പോകുമെന്ന് സജി ചെറിയാന്റെ ആളുകള്‍ പ്രചരിപ്പിച്ചു. മുഖ്യമന്ത്രിക്കെതിരെ സ്വപ്നയുടെ ആരോപണം ഉയര്‍ന്നപ്പോള്‍ പ്രതിരോധത്തിന് തന്നെയാണ് ചുമതലപ്പെടുത്തിയത്. ആലപ്പുഴയില്‍ സജി ചെറിയാനും നാസറും വിദ്യാര്‍ഥികളായിരിക്കുമ്പോള്‍ താനാണ് ഇവരെയൊക്കെ സംരക്ഷിച്ചത്.- സുധാകരന്‍ കൂട്ടിച്ചേര്‍ത്തു.

ജി. സുധാകരന്‍ പാര്‍ട്ടിയുമായി ചേര്‍ന്ന് പോകണമെന്നായിരുന്നു മന്ത്രി സജി ചെറിയാന്റെ ഉപദേശം. പാര്‍ട്ടിയെ ശക്തിപ്പെടുത്താന്‍ പ്രവര്‍ത്തിക്കണം. പ്രശ്നങ്ങള്‍ തുറന്നമനസ്സോടെ ചര്‍ച്ച ചെയ്യാന്‍ തയ്യാറാണെന്നും സജി ചെറിയാന്‍ പറഞ്ഞിരുന്നു.

English Summary: Former Kerala minister G. Sudhakaran has strongly criticized Minister Saji Cherian, saying he has neither the maturity nor authority to advise him. Reacting to Cherian's remark that Sudhakaran should stay aligned with the party, Sudhakaran retorted that he has never acted against the party and continues to function from within.