ബെംഗളൂരു: യുവ ഡോക്ടർ കൃതികയുടെ (29) മരണവുമായി ബന്ധപ്പെട്ട കേസിൽ നിർണായക വഴിത്തിരിവ്. ബെംഗളൂരു സ്വദേശിനിയായ ഡെർമറ്റോളജിസ്റ്റ് ഡോ. കൃതികയെ ഭർത്താവും സർജനുമായ ഡോ. മഹേന്ദ്ര റെഡ്ഡി അനസ്തെറ്റിക് മരുന്ന് അമിതമായി കുത്തിവച്ച് കൊലപ്പെടുത്തിയെന്ന് പൊലിസ് കണ്ടെത്തി. ആറ് മാസത്തെ അന്വേഷണത്തിനൊടുവിൽ മറാത്തഹള്ളി പൊലിസ് പ്രതിയെ അറസ്റ്റ് ചെയ്തു.
2025 ഏപ്രിലിൽ നടന്ന കൃതികയുടെ മരണം സ്വാഭാവികമാണെന്ന് തെറ്റിദ്ധരിപ്പിക്കാൻ മഹേന്ദ്ര ശ്രമിച്ചിരുന്നു. കൃതികയ്ക്ക് അസുഖം ബാധിച്ചതായും ആശുപത്രിയിൽ എത്തിച്ചെങ്കിലും മരിച്ചുവെന്നുമാണ് പ്രതി അവകാശപ്പെട്ടത്. എന്നാൽ, മരണത്തിൽ ദുരൂഹത ആരോപിച്ച് ഉയർന്ന പരാതിയെ തുടർന്ന് മറാത്തഹള്ളി പൊലിസ് അസ്വാഭാവിക മരണ റിപ്പോർട്ട് (യുഡിആർ) രജിസ്റ്റർ ചെയ്തു. "2025 ഏപ്രിൽ മാസത്തിൽ മറാത്തഹള്ളി പൊലിസ് സ്റ്റേഷൻ പരിധിയിൽ ഒരു സ്ത്രീ ദുരൂഹ സാഹചര്യത്തിൽ മരിച്ചു," എന്നാണ് യുഡിആർ റിപ്പോർട്ട്.

അനസ്‌തേഷ്യ മരുന്നാണ് മരണകാരണം

അന്വേഷണത്തിൽ, കൃതികയുടെ ശരീരത്തിൽ അനസ്തെറ്റിക് മരുന്നായ പ്രൊപ്പോഫോൾ അമിത അളവിൽ കണ്ടെത്തി. ഇത് ശ്വാസകോശ വൈകല്യവും ആരോഗ്യ പ്രശ്നങ്ങളും ഉണ്ടാക്കി മരണത്തിന് കാരണമായി. കാനുല സെറ്റ്, ഇഞ്ചക്ഷൻ ട്യൂബ്, മറ്റ് മെഡിക്കൽ ഉപകരണങ്ങൾ എന്നിവ ശേഖരിച്ച് പൊലിസ് ഫോറൻസിക് സയൻസ് ലബോറട്ടറിയിലേക്ക് അയച്ചു. മരണകാരണം കൃത്യമായി കണ്ടെത്താൻ, കൃതികയുടെ ആന്തരിക അവയവങ്ങളുടെ സാമ്പിളുകൾ വിദഗ്ധ പരിശോധനയ്ക്കായി അയച്ചിരുന്നു.

പിതാവിന്റെ പരാതിയിൽ അറസ്റ്റ്

കൃതികയുടെ പിതാവ് മുനി റെഡ്ഡി മറാത്തഹള്ളി പൊലിസ് സ്റ്റേഷനിൽ നൽകിയ പരാതിയാണ് കേസിൽ വഴിത്തിരിവായത്. മരുമകൻ മഹേന്ദ്ര റെഡ്ഡി മകളെ മയക്കുമരുന്ന് നൽകി കൊലപ്പെടുത്തിയതാകാമെന്ന് അദ്ദേഹം സംശയം പ്രകടിപ്പിച്ചു. തെളിവുകളുടെ അടിസ്ഥാനത്തിൽ, ഉഡുപ്പിയിലെ മണിപ്പാലിൽ നിന്ന് മഹേന്ദ്രയെ പൊലിസ് അറസ്റ്റ് ചെയ്തു.

"ശേഖരിച്ച തെളിവുകൾ മഹേന്ദ്ര റെഡ്ഡിയിലേക്കാണ് വിരൽ ചൂണ്ടുന്നത്. കൃതികയെ ആശുപത്രിയിൽ എത്തിച്ചത് ഭർത്താവാണ്. കൃതികക്ക് ആരോഗ്യ പ്രശ്നമുണ്ടെന്ന് പ്രതി അവകാശപ്പെട്ടു," എന്ന് പൊലിസ് കമ്മിഷണർ സീമന്ത് കുമാർ സിങ് പറഞ്ഞു. മഹേന്ദ്ര ആശുപത്രിയിലെ സ്വാധീനം ദുരുപയോഗം ചെയ്ത് മരുന്ന് സംഘടിപ്പിച്ചതായും, മരണം സ്വാഭാവികമാണെന്ന് തെറ്റിദ്ധരിപ്പിക്കാൻ ശ്രമിച്ചതായും പൊലിസ് ആരോപിച്ചു. കൃതികയുടെ കുടുംബത്തെ പോസ്റ്റ്മോർട്ടവും പരാതിയും ഒഴിവാക്കാൻ നിർബന്ധിക്കുകയും ചെയ്തു.

"മകൾക്ക് നീതി വേണം," പിതാവിന്റെ ആവശ്യം

"കൃതിക അവനെ പൂർണമായി വിശ്വസിച്ചു. എന്നാൽ, ജീവൻ രക്ഷിക്കേണ്ട വൈദ്യശാസ്ത്ര പരിജ്ഞാനം അവളെ കൊല്ലാൻ അവൻ ഉപയോഗിച്ചു. സ്നേഹം നടിച്ച് അവളെ ഇല്ലാതാക്കി," എന്ന് മുനി റെഡ്ഡി പറഞ്ഞു. "ഈ ആസൂത്രിത കൊലപാതകത്തിന് കഠിന ശിക്ഷ വേണം. ഞങ്ങളുടെ മകൾക്ക് നീതി ലഭിക്കണം. അവളുടെ നഷ്ടം വ്യക്തിപരം മാത്രമല്ല, സമൂഹത്തിനും നഷ്ടമാണ്," അദ്ദേഹം കൂട്ടിച്ചേർത്തു.
2024 മേയ് 26ന് വിവാഹിതരായി ഒരു വർഷത്തിനുള്ളിൽ നടന്ന ഈ സംഭവം ഞെട്ടലുണ്ടാക്കി. മഹേന്ദ്ര റെഡ്ഡി നിലവിൽ പൊലിസ് കസ്റ്റഡിയിലാണ്. അന്വേഷണം പുരോഗമിക്കുകയാണ്.