തിരുവനന്തപുരം: ദീപാവലി എത്താൻ ദിവസങ്ങൾ മാത്രം ശേഷിക്കെ പടക്കങ്ങൾ ഉപയോഗിക്കുന്നതിൽ നിയന്ത്രണം വേണമെന്ന് ആഭ്യന്തര വകുപ്പ്. ദീപങ്ങളുടെയും പടക്കങ്ങളുടെയും ഉത്സവമായ ദീപാവലിക്ക് ആളുകൾ ധാരാളമായി കരിമരുന്ന് ഉപയോഗിക്കുന്നത് പ്രകൃതിക്ക് ദോഷം ചെയ്യുമെന്നതിനാലാണ് നിയന്ത്രണത്തിലേക്ക് നീങ്ങുന്നത്. ദീപാവലിയുമായി ബന്ധപ്പെട്ട് പടക്കങ്ങൾ അടക്കമുള്ള കരിമരുന്നുകളുടെ പ്രയോഗത്തിൽ ദേശീയ ഹരിത ട്രൈബ്യൂണലിന്റെ ഉത്തരവിന്റെ അടിസ്ഥാനത്തിലുള്ള മാർഗനിർദേശങ്ങൾ പാലിക്കണമെന്ന് ആഭ്യന്തര വകുപ്പ് അറിയിച്ചു. 

ഗ്രീൻ കാറ്റഗറിയിലുള്ള പടക്കങ്ങൾ മാത്രമേ ഉപയോഗിക്കാൻ അനുവദിക്കുകയുള്ളൂ. പടക്കങ്ങളുടെ ഉപയോഗം രാത്രി എട്ടു മുതൽ 10 വരെ മാത്രമായി നിയന്ത്രിക്കണം. ഈ നിർദേശങ്ങൾ പാലിക്കുന്നതായി ബന്ധപ്പെട്ട ഉദ്യോഗസ്ഥർ ഉറപ്പുവരുത്തണമെന്നും ആഭ്യന്തര വകുപ്പിന്റെ ഉത്തരവിൽ നിർദേശിച്ചിട്ടുണ്ട്.

അന്തരീക്ഷ വായു മലിനമാകുമെന്നതിനാൽ രാജ്യതലസ്ഥാനത്ത് ഉൾപ്പെടെ നിയന്ത്രണം ഏർപ്പെടുത്താറുണ്ട്. ഡൽഹിയിൽ വായു നിലവാരം ഏറ്റവും തീവ്രമായ അവസ്ഥയിൽ എത്താറുണ്ട്. ദിവസങ്ങളോളമാണ് വായുമലിനീകരണം ദീപാവലിയെ തുടർന്ന് ഡൽഹിയിൽ ഉണ്ടാവുക.