പാലക്കാട്: പാലക്കാട് പതിനാലുകാരൻ ജീവനൊടുക്കിയതിൽ സ്‌കൂളിൽ വിദ്യാർഥികളുടെ പ്രതിഷേധം. വിദ്യാർഥികൾ ഒന്നാകെ ക്ലാസ് മുടക്കി സ്‌കൂളിന്റെ നടുമുറ്റത്ത് ഇറങ്ങി പ്രതിഷേധിക്കുകയാണ്. കെഎസ്‌യു ഉൾപ്പെടെയുള്ള വിദ്യാർഥി സംഘടനകൾ വേറെയും പ്രതിഷേധിക്കുന്നുണ്ട്. കണ്ണാടി ഹയർസെക്കൻഡറി സ്‌കൂളിലെ ഒൻപതാം ക്ലാസ് വിദ്യാർത്ഥിയായ അർജുൻ മരിച്ചതിൽ അധ്യാപികയെ പുറത്താക്കണമെന്ന് ആവശ്യപ്പെട്ടാണ് വിദ്യാർഥി പ്രതിഷേധം.

പല്ലൻചാത്തന്നൂരിലാണ് സംഭവം. അർജുന്റെ മരണത്തിൽ ഗുരുതര ആരോപണവുമായി കുടുംബം രംഗത്തെത്തിയിരുന്നു. ക്ലാസിലെ അധ്യാപിക അർജുനെ നിരന്തരം മാനസികമായി പീഡിപ്പിച്ചുവെന്നാണ് കുടുംബത്തിന്റെ ആരോപണം. ഇൻസ്റ്റഗ്രാമിൽ കുട്ടികൾ തമ്മിൽ മെസേജ് അയച്ചതിന് അധ്യാപിക അർജുനെ ഭീഷണിപ്പെടുത്തിയെന്നാണ് കുടുംബം പറയുന്നത്. 

അർജുനെതിരെ സൈബർ സെല്ലിൽ പരാതി നൽകുമെന്നും ജയിലിലിടുമെന്നും അധ്യാപിക ഭീഷണിപ്പെടുത്തിയെന്നും കുടുംബം ആരോപിക്കുന്നു. വിദ്യാർഥികളും ഇതേ ആരോപണമാണ് ഉന്നയിക്കുന്നത്. അധ്യാപികയെ സ്‌കൂളിൽ നിന്ന് പുറത്താക്കണമെന്നാണ് വിദ്യാർഥികൾ ഒന്നാകെ ആവശ്യപ്പെടുന്നത്.

സംഭവത്തിൽ, കുഴൽമന്ദം പൊലിസിൽ പരാതി നൽകുമെന്നും കുടുംബം അറിയിച്ചു. എന്നാൽ സ്‌കൂൾ ആരോപണം നിഷേധിച്ചു. അധ്യാപിക സാധാരണ രീതിയിൽ എല്ലാവരെയും ശാസിക്കുക മാത്രമാണ് ചെയ്തതെന്ന് പ്രധാന അധ്യാപിക പറയുന്നത്.