കോഴിക്കോട്: 2026ലെ ഹജ്ജ് തീർഥാടനത്തിനുള്ള ബുക്കിങ് നടപടികൾ തീർഥാടകർ വേഗത്തിൽ പൂർത്തീകരിക്കണമെന്ന് ഇന്ത്യൻ ഹജ്ജ് ഉംറ ഗ്രൂപ്പ് അസോസിയേഷൻ എക്സിക്യൂട്ടീവ് യോഗം അഭ്യർഥിച്ചു. കഴിഞ്ഞവർഷം 80 ശതമാനത്തോളം ആളുകൾക്ക് യാത്ര മുടങ്ങിയ സാഹചര്യത്തിൽ കേന്ദ്ര ഹജ്ജ് മന്ത്രാലയം എല്ലാ നടപടിക്രമങ്ങളും പതിവിലും നേരത്തെ ആക്കിയിട്ടുണ്ട്. 

കഴിഞ്ഞവർഷം ഹജ്ജ് മുടങ്ങിയ 80 ശതമാനം ആളുകൾക്ക് ഈ വർഷം സീറ്റുകൾ ഹജ്ജ് മന്ത്രാലയം ഉറപ്പുവരുത്തിയിരുന്നു. ശേഷിക്കുന്ന 20 ശതമാനത്തിലേക്കാണ് ഹജ്ജ് ഗ്രൂപ്പുകൾ ബുക്കിങ് സ്വീകരിക്കുന്നത്. അടുത്ത ഹജ്ജിന് ലൈസൻസ് ലഭിച്ച  ഗ്രൂപ്പുകളുടെ ലിസ്റ്റ് കേന്ദ്ര ഹജ്ജ് മന്ത്രാലയം  വെബ്സൈറ്റിൽ പ്രസിദ്ധീകരിച്ചിട്ടുണ്ട്. 

ALSO READ: ഹജ്ജ്: നറുക്കെടുപ്പിലൂടെ വെയ്റ്റിങ് ലിസ്റ്റിൽ ഉൾപ്പെട്ട 3791 പേർക്ക് അവസരം

തീർഥാടകർ ബുക്കിങ് ചെയ്യുമ്പോൾ അംഗീകൃത ഹജ്ജ് ലൈസൻസ് ഉണ്ടെന്ന് ഉറപ്പുവരുത്തേണ്ടതാണെന്നും യോഗം ആവശ്യപ്പെട്ടു.  പ്രസിഡന്റ് പാതിരമണ്ണ അബ്ദുറഹ്മാൻ ഫൈസി അധ്യക്ഷനായി. ജനറൽ സെക്രട്ടറി അബ്ദുൽ അസീസ് വേങ്ങര സംസാരിച്ചു.