മനാമ: ബഹ്‌റൈനിലെ ഇന്ത്യന്‍ സ്‌കൂളിലെ വിദ്യാര്‍ഥികളുടെ ഫീസ് വര്‍ധനവിന് ബഹ്‌റൈന്‍ വിദ്യാഭ്യാസ മന്ത്രാലയം അനുമതി നല്‍കിയതായി സ്‌കൂള്‍ മാനേജ്‌മെന്റ് അറിയിച്ചു. ഇതു സംബന്ധിച്ച മാനേജ് മെന്റ് കമ്മറ്റിയുടെ അഭ്യര്‍ഥന മാനിച്ചാണ് മന്ത്രാലയം ഫീസ് വര്‍ധനവിന് അനുമതി നല്‍കിയിരിക്കുന്നത്.
അതേ സമയം, ഓരോ വിദ്യാര്‍ഥിയില്‍ നിന്നും അഞ്ച് ദിനാര്‍ വരെ ഫീസ് ഈടാക്കാനാണ് മന്ത്രാലയത്തിന്റെ അനുമതി. എന്നാല്‍, നിലവിലെ പ്രത്യേക സാഹചര്യത്തില്‍ രക്ഷിതാക്കള്‍ക്ക് അധിക ഭാരം ആകാതിരിക്കാന്‍ ഓരോ ക്ലാസ്സിലും 1.9 ദിനാര്‍ മുതല്‍ 2.5 ദിനാര്‍ വരെ മാത്രമാണ് ഇപ്പോള്‍ ഫീസ് വര്‍ധിപ്പിക്കുകയുള്ളൂവെന്ന് സ്‌കൂള്‍ ഭരണസമിതി അറിയിച്ചിട്ടുണ്ട്.
ഇതിന്റെയടിസ്ഥാനത്തില്‍ പുതുക്കിയ ഫീസ് നിരക്കുകള്‍ ഇപ്രകാരമാണ്

എല്‍.കെ.ജി മുതല്‍ ക്ലാസ് 4 വരെ - 1.9 ദിനാര്‍
ക്ലാസ്: 5 മുതല്‍ ക്ലാസ് 8 വരെ - 2 ദിനാര്‍
ക്ലാസ്: 9 മുതല്‍ ക്ലാസ് 10 വരെ - 2.3 ദിനാര്‍
പ്ലസ്ടു ഹ്യുമാനിറ്റീസ് - 2.3 ദിനാര്‍
സയന്‍സ് - 2.2 ദിനാര്‍
ബയോ ടെക്‌നോളജി - 2.5 ദിനാര്‍

കൂടാതെ ബസ് നിരക്കില്‍ ഒരു ദിനാറും വര്‍ധിപ്പിച്ചിട്ടുണ്ട്. അതേ സമയം ബഹ്‌റൈനില്‍ വൈദ്യുതി, ജല നിരക്കുകള്‍ എന്നിവ ഉയര്‍ത്തിയതും റിഫാ ക്യാംപസ് ലോണ്‍ അടവ് തുടങ്ങിയതുമെല്ലാം ഫീസ് ഉയര്‍ത്തുന്നതിന് കാരണമായി. കൂടാതെ അക്കാദമിക് നിലവാരം ഉയര്‍ത്തുന്നതിനും ഇന്ത്യന്‍ സ്‌കൂളിന്റെ പ്രവര്‍ത്തനങ്ങള്‍ നല്ല രീതിയില്‍ മുന്നോട്ട് കൊണ്ടുപോകുന്നതിനും എല്ലാ രക്ഷിതാക്കളുടെയും പിന്തുണ ഉണ്ടാകണമെന്നും ഭരണസമിതി അഭ്യര്‍ഥിച്ചു.

കൂടാതെ, വിദ്യാര്‍ഥികളുട ഫീസ് വര്‍ധനവിന് തങ്ങള്‍ നിര്‍ബന്ധിതരായതാണെന്നും മുന്‍ കമ്മിറ്റി സ്‌കൂളിന്റെ ട്രാന്‍സ്‌പോര്‍ട്ട് കമ്പനിക്ക് നല്‍കാനുണ്ടായിരുന്ന കട ബാധ്യത 3,45,000 ദിനാറും റിഫാ ക്യാംപസിന് വേണ്ടി ബാങ്കില്‍ പ്രതിമാസം അടയ്‌ക്കേണ്ടുന്ന ലോണ്‍ തുക പലിശ അടക്കം 63,000 ദിനാറും സ്ഥാപനത്തിന് നിലവില്‍ ബാധ്യതയുണ്ടെന്നും ഭരണസമിതി അറിയിച്ചു.

അതേ സമയം, നിലവിലുള്ള ഭരണസമിതിയെ നിശിതമായി വിമര്‍ശിച്ച് മുന്‍ ഭരണസമിതിയായ യു.പി.പി കഴിഞ്ഞ ദിവസം രംഗത്തെത്തിയിരുന്നു. അതിനിടെയാണിപ്പോള്‍ ഫീസ് വര്‍ധനവും പ്രഖ്യാപിച്ചിരിക്കുന്നത്.