മുംബൈ: താനെ മുനിസിപ്പൽ കോർപ്പറേഷൻ തിരഞ്ഞെടുപ്പിൽ താക്കറെ സഹോദരങ്ങൾ ഒരുമിച്ച് പോരിനിറങ്ങുമെന്ന് റിപ്പോർട്ട്. ബിജെപിയെ തുരത്താൻ രാജ് താക്കറെയുടെ മഹാരാഷ്ട്ര നവനിർമാൺ സേനക്കൊപ്പം ഒരുമിച്ച് പ്രവർത്തിക്കുമെന്ന് ശിവസേന ഉദ്ധവ് താക്കറെ വിഭാഗം എംപി സഞ്ജയ് റാവത്ത് പറഞ്ഞു. 75ലേറെ സീറ്റുകൾ പിടിച്ചെടുക്കാനാവുമെന്നാണ് പ്രതീക്ഷയെന്നും റാവത്ത് പറഞ്ഞു. 

മഹാരാഷ്ട്ര ഉപമുഖ്യമന്ത്രിയും ശിവസേന ഷിൻഡെ വിഭാഗം നേതാവുമായ ഏക്‌നാഥ് ഷിൻഡെയുടെ ശക്തികേന്ദ്രമാണ് താനെ. നിലവിൽ കോർപ്പറേഷൻ ഭരിക്കുന്നതും ഷിൻഡെ വിഭാഗം സേനയും, ബിജെപിയും ചേർന്ന സഖ്യമാണ്. ഈ കൂട്ടുകെട്ട് പൊളിച്ച് ഭരണം പിടിച്ചെടുക്കാനാണ് താക്കറെ വിഭാഗക്കാർ ശ്രമിക്കുന്നത്. 

“താനെയിൽ ശിവസേനയും എം.എൻ.എസും ഒന്നിച്ച് മത്സരിച്ച് വിജയം പിടിക്കും. ‘75 ലേറെ’ എന്നതാണ് ഞങ്ങളുടെ മുദ്രാവാക്യം. ഏതാനും മാസങ്ങളായി ഉദ്ധവ് താക്കറെയും രാജ് താക്കറെയും തമ്മിലുള്ള അടുപ്പം കൂടുകയാണ്. ഇത് പുതിയ സഖ്യത്തിനുള്ള അടിത്തറയായി. മുൻകാല ഭിന്നതകൾ മറന്ന് മറാത്തികൾക്കും മഹാരാഷ്ട്രക്കുമായി ഒന്നുചേർന്ന് പ്രവർത്തിക്കാൻ ഇരുവരും തീരുമാനിച്ചു. ഈ സഖ്യം താനെയിലും സംസ്ഥാനത്താകെയും മറാത്ത പ്രാതിനിധ്യം ശക്തമാക്കും. ബാൽ താക്കറെയുടെ പൈതൃകത്തെ ചതിച്ചവർക്ക് താനെയിലെ ജനം തെരഞ്ഞെടുപ്പിലൂടെ അർഹമായ മറുപടി നൽകും” -റാവത്ത് പറഞ്ഞു.

ALSO READ: കേരള ടൂറിസം ഇന്‍ഫ്രാസ്ട്രക്ച്ചര്‍ വകുപ്പില്‍ കോര്‍ഡിനേറ്ററാവാം; 30,000 മാസ ശമ്പളം; യോഗ്യതയറിയാം

അതേസമയം 2017 ലെ തിരഞ്ഞെടുപ്പിൽ ഷിൻഡെ വിഭാഗം ശിവസേന 67 സീറ്റിലും, ബിജെപി 23 സീറ്റിലും വിജയം നേടിയിരുന്നു. ആകെ 131 സീറ്റുകളാണ് താനെ മുനിസിപ്പൽ കോർപ്പറേഷനിലുള്ളത്. തദ്ദേശ തിരഞ്ഞെടുപ്പിൽ ബിജെപി സഖ്യം ഉപേക്ഷിച്ച് ഒറ്റക്ക് മത്സരിക്കണമെന്ന് ഷിൻഡെ വിഭാഗം നേതാക്കൾ ആവശ്യപ്പെട്ട സാഹചര്യത്തിലാണ് താക്കറെ കുടുംബത്തിന്റെ ഒത്തുചേരൽ. ഇത് മഹാരാഷ്ട്രയിൽ പുതിയ രാഷ്ട്രീയ സമവാക്യങ്ങൾ രചിക്കുമെന്നാണ് ഏവരും ഉറ്റുനോക്കുന്നത്. 

മഹാരാഷ്ട്ര പ്രൈമറി ക്ലാസുകളിൽ ഹിന്ദി ഭാഷ നിർബന്ധമാക്കിയ കേന്ദ്ര തീരുമാനത്തിനെതിരെ ഉദ്ധവ് താക്കറെയും, രാജ് താക്കറെയും ഒരുമിച്ച് രംഗത്തെത്തിയിരുന്നു. ഇതിന് പിന്നാലെയാണ് രണ്ട് പതിറ്റാണ്ട് നീണ്ട വൈര്യം മറന്ന് ഇരു താക്കറെ കുടുംബങ്ങളും ഒരുമിക്കുമെന്ന അഭ്യൂഹങ്ങളും ശക്തമായത്. തുടർന്ന് മുംബൈ ശിവജി പാർക്കിൽ നടന്ന എംഎൻഎസ് ദീപോത്സവത്തിൽ ഉദ്ധവും, രാജ് താക്കറെയും ഒരുമിച്ച് വേദി പങ്കിടുകയും ചെയ്തിരുന്നു.

Uddhav and Raj Thackeray may unite for the Thane civic polls to fight against the BJP, as per Shiv Sena MP Sanjay Raut.