ദുബൈ: ലീഡ് സീറോ കാർബൺ സർട്ടിഫിക്കറ്റ് (ലീഡർഷിപ്പ് ഇൻ എനർജി ആൻഡ് എൻവയോൺമെന്റൽ ഡിസൈൻ - LEED) നേടുന്ന ലോകത്തിലെ ആദ്യത്തെ ആരാധനാലയമായി മാറി ഹത്തയിലെ അൽ റയ്യാൻ മസ്ജിദ്. ഞായറാഴ്ച ദുബൈ ഇലക്ട്രിസിറ്റി ആൻഡ് വാട്ടർ അതോറിറ്റിയാണ് (DEWA) ഈ പ്രഖ്യാപനം നടത്തിയത്.

യുഎസ് ഗ്രീൻ ബിൽഡിംഗ് കൗൺസിലാണ് (USGBC) ലീഡ് സർട്ടിഫിക്കേഷൻ നൽകുന്നത്. പ്രവർത്തന സമയത്ത് കാർബൺ ബഹിർ​ഗമനം പൂർണ്ണമായും ഇല്ലാതാക്കുന്ന സ്ഥാപനങ്ങൾക്കാണ് ഈ സർട്ടിഫിക്കറ്റ് നൽകുന്നത്. വാർഷിക കാർബൺ ബഹിർഗമനത്തിന്റെ 175 ശതമാനം നികത്തിക്കൊണ്ടാണ് അൽ റയ്യാൻ മസ്ജിദ് ഈ നേട്ടം കൈവരിച്ചത്.

ALSO READ: പൊലിസ് നിരീക്ഷണം ഫലം കണ്ടു; അജ്മാനിൽ ആറു മാസത്തിനിടെ ഡെലിവറി ബൈക്ക് അപകടങ്ങൾ പൂജ്യം

ഇത് മൂന്നാം തവണയാണ് അൽ റയ്യാൻ മസ്ജിദ് ഇത്തരമൊരു ലോക റെക്കോർഡ് സ്വന്തമാക്കുന്നത്. 2021-ൽ, LEED v4 പ്രകാരം LEED പ്ലാറ്റിനം സർട്ടിഫിക്കേഷനും, 2014-ൽ LEED സീറോ എനർജി സർട്ടിഫിക്കേഷനും മസ്ജിദിന് ലഭിച്ചിരുന്നു. മാത്രമല്ല, LEED പ്ലാറ്റിനം സർട്ടിഫിക്കേഷൻ ലഭിച്ച ലോകത്തിലെ ആദ്യത്തെ മസ്ജിദ് എന്ന റെക്കോർഡും അൽ റയ്യാൻ മസ്ജിദിന്റെ പേരിലാണ്. 

പരിസ്ഥിതി പുനഃസ്ഥാപനത്തിലും കാലാവസ്ഥാ സൗഹൃദ രൂപകൽപ്പനയിലും ആരാധനാലയങ്ങൾക്ക് എങ്ങനെ നേതൃത്വം നൽകാനാകും എന്നതിന്റെ ഉദാഹരണമാണ് 2025-ലെ ഈ സർട്ടിഫിക്കേഷൻ എന്ന് ദുബൈ മീഡിയാ ഓഫിസ് പ്രസ്താവനയിൽ വ്യക്തമാക്കി. 

അതേസമയം, ദുബൈ ഇലക്ട്രിസിറ്റി ആൻഡ് വാട്ടർ അതോറിറ്റി (DEWA) മാനേജിംഗ് ഡയറക്ടറും സിഇഒയുമായ സയീദ് മുഹമ്മദ് അൽ തായർ ഈ നേട്ടത്തിൽ സന്തോഷം അറിയിച്ചു. അൽ റയ്യാൻ മസ്ജിദ് ലോകമെമ്പാടുമുള്ള പരിസ്ഥിതി സൗഹൃദ കെട്ടിടങ്ങൾക്ക് ഒരു മാതൃകയാണ്. മാത്രമല്ല, പരിസ്ഥിതിക്ക് ഗുണകരവും ദീർഘകാലം നിലനിൽക്കുന്നതുമായ സ്വാധീനം ഉണ്ടാക്കാൻ സഹായിക്കുമെന്നും അദ്ദേഹം കൂട്ടിച്ചേർത്തു‌‌.

Al Rayyan Mosque in Hatta has become the world's first worship place to achieve Leadership in Energy and Environmental Design (LEED) Zero Carbon certification, announced by Dubai Electricity and Water Authority (DEWA) on Sunday.