ന്യൂഡല്‍ഹി: ഡല്‍ഹിയിലെ ചെങ്കോട്ടയ്ക്ക് സമീപം ഇന്നലെ വൈകീട്ടുണ്ടായ സ്‌ഫോടനത്തിന്റെ ഭീകരത വിവരിച്ച് ദൃക്‌സാക്ഷികള്‍. കനത്ത സ്‌ഫോടനശബ്ദം കേട്ടതായി ദൃക്‌സാക്ഷികളിലൊരാള്‍ പറഞ്ഞു. 'ഞാന്‍ ഓടി. മറ്റ് പലരും സ്‌ഫോടനം കേട്ട് ഓടുകയായിരുന്നു. ഓടുന്നതിനിടയില്‍ മൂന്ന് തവണ വീണു. സ്‌ഫോടനം വളരെ തീവ്രമായതിനാല്‍ ഭൂമി ഇടിഞ്ഞുവീഴുന്നത് പോലെ തോന്നി. സ്വയരക്ഷയ്ക്കായി ഓടുന്ന ആളുകള്‍ പരസ്പരം ഇടിച്ചുവീഴുകയുംചെയ്തു. ഇനിയൊരു സ്‌ഫോടനം കൂടി നടന്നാല്‍ നാമെല്ലാവരും മരിക്കുമെന്ന് ഞങ്ങള്‍ക്ക് തോന്നി- ദൃക്‌സാക്ഷിയായ മുഹ്‌സിന്‍ അലി പറഞ്ഞു.

സ്‌ഫോടനം നടക്കുമ്പോള്‍ ഞാന്‍ വീടിന്റെ മേല്‍ക്കൂരയിലായിരുന്നു. അവിടെ നിലത്ത് വലിയ തീപിടുത്തങ്ങള്‍ കണ്ടു. എന്താണ് യഥാര്‍ത്ഥത്തില്‍ സംഭവിച്ചതെന്ന് അറിയാനായി താഴേക്ക് ഓടി. സ്‌ഫോടനം വളരെ ശക്തമായിരുന്നു. എന്റെ വീടിന്റെ ജനാലകള്‍ കുലുങ്ങി-മറ്റൊരാള്‍ പറഞ്ഞു.
വലിയ സ്‌ഫോടനമായിരുന്നുവെന്നും അതിന്റെ പ്രകമ്പനം 700 മുതല്‍ 900 മീറ്റര്‍ വരെ അനുഭവപ്പെട്ടതായും പ്രദേശത്തെ വ്യാപാരി സഞ്ജയ് ഭാര്‍ഗവ പറഞ്ഞു. ഭൂചലനം ഉണ്ടായതുപോലെ സമീപത്തെ കെട്ടിടങ്ങള്‍ കുലുങ്ങി. റോഡില്‍ മൃതദേഹങ്ങള്‍ കിടക്കുന്നുണ്ടായിരുന്നു. തലയും കാലുകളും വേര്‍പ്പെട്ട നിലയിലും മൃതദേഹങ്ങള്‍ കണ്ടെന്നും അദ്ദേഹം പറഞ്ഞു.

കുറ്റവാളികളെ കണ്ടെത്തും: അമിത്ഷാ
ന്യൂഡല്‍ഹി: സ്‌ഫോടനത്തിന്റെ കാരണം നിര്‍ണ്ണയിക്കാനും സ്‌ഫോടനത്തില്‍ ഉള്‍പ്പെട്ടവരെ കണ്ടെത്താനും സാധ്യമായ എല്ലാ കോണുകളും പരിശോധിക്കുന്നുണ്ട് ആഭ്യന്തരമന്ത്രി അമിത്ഷാ പറഞ്ഞു. സ്‌ഫോടനത്തിന്റെ എല്ലാ വശങ്ങളും അന്വേഷിക്കും. പ്രദേശത്തെ സി.സി.ടി.വി ദൃശ്യങ്ങള്‍ പരിശോധിച്ച് വരികയാണെന്നും അദ്ദേഹം അറിയിച്ചു. സ്‌ഫോടനത്തിന്റെ പശ്ചാത്തലത്തില്‍ പ്രധാനമന്ത്രി നരേന്ദ്രമോദി കേന്ദ്ര ആഭ്യന്തരമന്ത്രി അമിത് ഷായുമായി സംസാരിക്കുകയും സ്ഥിതിഗതികള്‍ വിലയിരുത്തുകയും ചെയ്തു. 

വളരെ വേദനാജനകം: കോണ്‍ഗ്രസ് 

ന്യൂഡല്‍ഹി: ഡല്‍ഹി സ്‌ഫോടനത്തെ കോണ്‍ഗ്രസ് അപലപിച്ചു. വിഷമകരമായ ഈ സമയം ഞങ്ങള്‍ ദുഃഖിതരായ കുടുംബങ്ങള്‍ക്കൊപ്പം നില്‍ക്കുന്നുവെന്ന് കോണ്‍ഗ്രസ് വക്താവ് പവന്‍ ഖേര ട്വീറ്റ്‌ചെയ്തു. പരുക്കേറ്റവര്‍ വേഗത്തില്‍ സുഖം പ്രാപിക്കാന്‍ പ്രാര്‍ത്ഥിക്കുന്നു. സംഭവത്തില്‍ സമഗ്രവും വേഗത്തിലുള്ളതുമായ അന്വേഷണം സര്‍ക്കാര്‍ ഉറപ്പാക്കണമെന്നും അദ്ദേഹം ആവശ്യപ്പെട്ടു.