ബാഴ്സലോണ: ബാഴ്സലോണയുടെയും സ്പെയിൻ ദേശീയ ടീമിന്റെയും യുവ സൂപ്പർസ്റ്റാർ ലാമിൻ യമലിന് (18) മുൻ സ്പെയിൻ ഫുട്ബോൾ മാനേജർ ജാവിയർ ക്ലെമെന്റ് കടുത്ത മുന്നറിയിപ്പ് നൽകി. "അയാൾ നന്നായി പെരുമാറിയില്ലെങ്കിൽ, കളിയിൽ അധികകാലം നിലനിൽക്കില്ല" എന്നാണ് ക്ലെമെന്റെയുടെ വാക്കുകൾ. കളിക്കളത്തിലെ യമലിന്റെ പ്രതിഭയെ പ്രശംസിക്കുമ്പോഴും, താരത്തിന്റെ വ്യക്തിപരമായ ജീവിതത്തിലെ ചില 'അനുചിതമായ' പെരുമാറ്റങ്ങൾക്കെതിരെയാണ് വിമർശനം. സ്പാനിഷ് മാധ്യമമായ 'കാഡെന എസ്ഇആറിന്' നൽകിയ അഭിമുഖത്തിലാണ് ക്ലെമെന്റെയുടെ ഈ പരാമർശം.

 കളത്തിലെ കണക്കുകൾ ഞെട്ടിക്കുന്നത്

പതിനെട്ടാം വയസ്സിൽ തന്നെ ബാഴ്സലോണയുടെ പ്രധാന താരനിരയിലേക്ക് ഉയർന്നുവന്ന യമൽ, ക്ലബ്ബിനും ദേശീയ ടീമിനും നിരവധി വിജയങ്ങൾ നേടിക്കൊടുക്കാൻ സഹായിച്ചിട്ടുണ്ട്. പതിനഞ്ചാം വയസ്സിലാണ് താരം സീനിയർ ടീമിൽ അരങ്ങേറ്റം കുറിച്ചത്.

ബാഴ്സയ്ക്കായി 117 മത്സരങ്ങളിൽ നിന്ന് 31 ഗോളുകളും 40 അസിസ്റ്റുകളും താരം നേടി.ലാ ലിഗ, ചാമ്പ്യൻസ് ലീഗ് മത്സരങ്ങളിൽ അദ്ദേഹത്തിന്റെ വേഗതയും ഡ്രിബ്ലിംഗ് മികവും ടീമിന്റെ പ്രധാന ശക്തിയാണ്.എന്നാൽ ഈ വർഷം മുതലാണ് യമലിന്റെ കളിക്ക് പുറത്തുള്ള കാര്യങ്ങൾ മാധ്യമങ്ങളിൽ ചർച്ചാവിഷയമായത്.

 സ്വകാര്യ ജീവിതത്തിലെ വിവാദങ്ങൾ

ആദ്യം, യമലിന്റെ ആഡംബരപൂർണ്ണമായ ജന്മദിന പാർട്ടി വിമർശനത്തിന് വഴിയൊരുക്കി. ലക്ഷക്കണക്കിന് യൂറോകൾ ചെലവഴിച്ച പാർട്ടി യുവതാരത്തിന്റെ 'അനുചിതമായ' ജീവിതശൈലിയെയാണ് സൂചിപ്പിച്ചത്. പിന്നാലെ, പ്രായമായ ഒരു സ്ത്രീയുമായുള്ള ബന്ധം സംബന്ധിച്ച അഭ്യൂഹങ്ങൾ സോഷ്യൽ മീഡിയയിൽ വലിയ ചർച്ചയായി. ഈ സംഭവങ്ങളുടെ പശ്ചാത്തലത്തിലാണ് ക്ലെമെന്റെയുടെ മുന്നറിയിപ്പ് യമലിന്റെ കരിയർ ഭാവി സംബന്ധിച്ച് വലിയ ആശങ്കകൾ ഉയർത്തുന്നത്.

ക്ലെമെന്റെ കാഡെന എസ്ഇആറിനോട് പറഞ്ഞതിങ്ങനെ:

"അയാൾ നന്നായി പെരുമാറിയില്ലെങ്കിൽ, കളിയിൽ അധികകാലം നിലനിൽക്കില്ല. ഒരു കളിക്കാരൻ എന്ന നിലയിൽ അവൻ മികച്ചവനാണ്. പക്ഷേ തന്റെ വ്യക്തിജീവിതവുമായി ബന്ധപ്പെട്ട എല്ലാ കാര്യങ്ങളിലും അവൻ ശരിയായി പെരുമാറുന്നില്ലെങ്കിൽ, അവൻ അധികം മുന്നോട്ട് പോകില്ല എന്നത് വ്യക്തമാണ്."

"അവൻ മികച്ച പ്രകടനമാണ് നടത്തുന്നത്. എതിരാളികൾക്ക് അവന്റെ കളി അറിയാം. അവനെ എങ്ങനെ നേരിടണമെന്ന് അവർക്കറിയാം. അവനെ കളിക്കാൻ അനുവദിക്കാൻ പാടില്ലാത്ത കളിക്കാരനാണെന്ന് അവർക്കറിയാം, കാരണം അവൻ വളരെ കഴിവുള്ളവനാണ്. മൂന്ന് കളിക്കാർ അവനെ എപ്പോഴും മാർക്ക് ചെയ്യുകയും പുൾ ചെയ്യുകയും ചെയ്യും."

മുൻ സ്പെയിൻ മാനേജറുടെ ഈ വാക്കുകൾ ബാഴ്സലോണ ക്യാമ്പിലും സ്പെയിൻ ഫുട്ബോൾ ലോകത്തും ചൂടേറിയ ചർച്ചകൾക്ക് തിരികൊളുത്തി. ഈ സീസണിൽ ലാ ലിഗയിൽ 10 ഗോളുകളും 12 അസിസ്റ്റുകളും നേടി ടീമിന്റെ 'മാൻ ഓഫ് ദി മാച്ച്' ആയി മാറിയ താരമാണ് യമൽ. ബാഴ്സലോണ കോച്ച് ഹാൻസി ഫ്ലിക്ക് യമലിന് പൂർണ്ണ പിന്തുണ നൽകി "അവൻ ഒരു പ്രതിഭയാണ്, ഞങ്ങൾ അവനെ സംരക്ഷിക്കും."

യുവതാരങ്ങൾ കളിക്ക് പുറത്ത് പുലർത്തേണ്ട പെരുമാറ്റത്തിന്റെ പ്രാധാന്യം ഈ സംഭവം അടിവരയിടുന്നു. യമലിന്റെ വരാനിരിക്കുന്ന ചാമ്പ്യൻസ് ലീഗ് മത്സരങ്ങൾ ഫുട്ബോൾ ലോകം ഉറ്റുനോക്കുകയാണ്.