കുവൈത്ത് സിറ്റി: കുവൈത്തിലെ ഫർവാനിയ പ്രദേശത്ത് സ്വകാര്യ വീട്ടിൽ അനധികൃതമായി പ്രവർത്തിച്ചിരുന്ന മെഡിക്കൽ സ്ഥാപനം സുരക്ഷാ അധികൃതർ അടപ്പിച്ചു. അനധികൃത മെഡിക്കൽ പ്രവർത്തനങ്ങൾ തടയുന്നതിനും പൊതുജനാരോഗ്യം സംരക്ഷിക്കുന്നതിനും വേണ്ടിയുള്ള ആഭ്യന്തര മന്ത്രാലയത്തിന്റെ ഏകോപിത ശ്രമങ്ങളുടെ ഭാഗമായാണ് നടപടി.

ഒന്നാം ഉപപ്രധാനമന്ത്രിയും ആഭ്യന്തര മന്ത്രിയുമായ ഷെയ്ഖ് ഫഹദ് യൂസഫ് സൗദ് അൽ-സബയുടെ നിർദ്ദേശപ്രകാരമായിരുന്നു റെയ്ഡ്. സുരക്ഷാ ഡയറക്ടറേറ്റ്സ് അഫയേഴ്സ് സെക്ടറും ക്രിമിനൽ സെക്യൂരിറ്റി അഫയേഴ്‌സ് സെക്ടറും ചേർന്നാണ് ഓപ്പറേഷൻ നടത്തിയത്.

താൽക്കാലികമായി പ്രവർത്തിച്ചിരുന്ന ക്ലിനിക്കിൽ നിന്ന് നാല് ഇന്ത്യക്കാരെയാണ് ഉദ്യോഗസ്ഥർ ആദ്യ ഘട്ടത്തിൽ അറസ്റ്റ് ചെയ്തത്. അറസ്റ്റിലായവരിൽ ഒരാൾ നിയമപരമായ അനുമതിയില്ലാതെ അനധികൃതമായി വൈദ്യശാസ്ത്രം പരിശീലിച്ചിരുന്നതായി കണ്ടെത്തി, ബാക്കിയുള്ള മൂന്ന് പേർ ചികിത്സയ്ക്കായി ക്ലിനിക്ക് സന്ദർശിച്ചവരായിരുന്നു.

ALSO READ: വിൽക്കാനുള്ള വാഹനങ്ങൾ റോഡിൽ പ്രദർശിപ്പിച്ചാൽ പണികിട്ടും; 60 ദിവസം വരെ വാഹനം കണ്ടുകെട്ടുമെന്ന് കുവൈത്ത് 

തുടർന്നുള്ള അന്വേഷണത്തിൽ, സർക്കാർ നൽകുന്ന മരുന്നുകളുടെ നിയമവിരുദ്ധമായ വിൽപ്പനയിലും വിതരണത്തിലും ഉൾപ്പെട്ട ഒരു വലിയ ശൃംഖലയെക്കുറിച്ച് സൂചന ലഭിച്ചു. നിയമപരമായ മാർഗ്ഗങ്ങൾ മറികടന്ന് പണത്തിന് പകരമായി ലൈസൻസില്ലാത്ത പ്രാക്ടീഷണർക്ക് സർക്കാർ മരുന്നുകൾ എത്തിച്ചു നൽകിയതിന് മൂന്ന് ബംഗ്ലാദേശി പൗരന്മാരെയും അധികൃതർ അറസ്റ്റ് ചെയ്തു.

കേസുമായി ബന്ധപ്പെട്ട് നടത്തിയ കൂടുതൽ അന്വേഷണത്തിൽ, ഒരു സർക്കാർ ആരോഗ്യ കേന്ദ്രത്തിൽ ജോലി ചെയ്യുന്ന ഒരു ബംഗ്ലാദേശി ജീവനക്കാരൻ തന്റെ ഔദ്യോഗിക പദവി ദുരുപയോഗം ചെയ്ത് മരുന്നുകൾ മോഷ്ടിച്ചതായി കണ്ടെത്തി. ഇയാൾ മോഷ്ടിച്ച ഈ മരുന്നുകളാണ് അനധികൃത ക്ലിനിക്ക് നടത്തിയിരുന്ന പ്രതികൾക്ക് വിതരണം ചെയ്തത്. സംഭവവുമായി ബന്ധപ്പെട്ട് ആകെ എട്ട് ഇന്ത്യക്കാരെയും ബംഗ്ലാദേശികളെയുമാണ് അറസ്റ്റ് ചെയ്തിട്ടുള്ളത്.

പ്രതികൾക്കെതിരെ ആവശ്യമായ എല്ലാ നിയമ നടപടികളും സ്വീകരിച്ചിട്ടുണ്ടെന്ന് അധികൃതർ സ്ഥിരീകരിച്ചു. പൊതുജനങ്ങളുടെ ആരോഗ്യവും സുരക്ഷയും സംരക്ഷിക്കുന്നതിനായി എല്ലാത്തരം നിയമവിരുദ്ധ പ്രവർത്തനങ്ങളെയും തുടർന്നും നേരിടുമെന്ന് ആഭ്യന്തര മന്ത്രാലയം വ്യക്തമാക്കി.

authorities in kuwait have closed an illegal clinic operating without proper licenses. during the raid, officials arrested indian and bangladeshi nationals accused of distributing medicines reportedly stolen from government health facilities. the investigation aims to uncover how the drugs were obtained and whether more people are involved. health officials emphasized strict action against anyone misusing public medical supplies, reinforcing the country’s zero-tolerance policy toward illegal healthcare practices.