കടുത്തുരുത്തി: തെരുവ് നായ വട്ടം ചാടിയതിനെ തുടര്‍ന്ന് ഓട്ടോറിക്ഷ മറിഞ്ഞു അപകടം. ഓട്ടോറിക്ഷ ഡ്രൈവര്‍ക്കും വൃദ്ധയ്ക്കും സാരമായി പരിക്കേറ്റു. കൈകുഞ്ഞും മാതാവും രക്ഷപെട്ടു.
ഇന്നലെ രാത്രി 7.10 ഓടെ അക്കരെ ആപ്പാഞ്ചിറയിലാണ് അപകടം. കടുത്തുരുത്തി വെള്ളാശ്ശേരി ചെരുവംകാലായില്‍ ബിബിന്‍ ബേബി (32), ഓട്ടോറിക്ഷ യാത്രക്കാരിയായ വെള്ളാശ്ശേരി കാട്ടുപുതുശ്ശേരി ത്രേസ്യാമ്മ ദേവസ്യാ (69) എന്നിവര്‍ക്കാണ് പരിക്കേറ്റത്.
ത്രേസ്യാമ്മയുടെ മകള്‍ ബിന്ദു റെജി (27), ബിന്ദുവിന്റെ രണ്ട് മാസം പ്രായമുള്ള കൈകുഞ്ഞ് എന്നിവരാണ് ഓട്ടോറിക്ഷയിലുണ്ടായിരുന്ന മറ്റു യാത്രക്കാര്‍. കുഞ്ഞിനെ തലയോലപ്പറമ്പില്‍ ഡോക്ടറെ കാണിക്കാന്‍ പോകുമ്പോളാണ് അപകടമുണ്ടായത്. നാലുപേരേയും മുട്ടുചിറ എച്ച്.ജി.എം ആശുപത്രിയില്‍ പ്രവേശിപ്പിച്ചു. ബിബിന് ഗുരുതരമായി പരിക്കേറ്റിട്ടുണ്ട്.