ഇടുക്കി: മൂന്നാറിന് സമീപം ആനച്ചാലില്‍ സ്‌കൈ ഡൈനിംങില്‍ കുടുങ്ങിയ വിനോദസഞ്ചാരികളെ രക്ഷപ്പെടുത്തി. ഫയര്‍ഫോഴ്‌സ് എത്തി കയറുകെട്ടിയാണ് സഞ്ചാരികളെ താഴെയിറക്കിയത്. മലപ്പുറം സ്വദേശികളായ നാലുപേരും സ്‌കൈ ഡൈനിംങ് ജീവനക്കാരിയുമടക്കം അഞ്ചു പേരാണ് നാലുമണിക്കൂറോളം ഇവിടെ കുടുങ്ങിക്കിടന്നത്.

രണ്ടും നാലും വയസും പ്രായമുള്ള കുട്ടികളും സംഘത്തിലുണ്ടായിരുന്നു. ഇന്ന് ഉച്ചയ്ക്ക് 2 മണിയോടെയാണ് 120 അടി ഉയരത്തില്‍ സഞ്ചാരികള്‍ കുടുങ്ങിയത്. 

ഹൈഡ്രോളിക് സംവിധാനം തകരാറിലായതോടെയാണ് സഞ്ചാരികള്‍ കുടുങ്ങാന്‍ കാരണം. ഫയര്‍ഫോഴ്‌സ് എത്തി സാങ്കേതിക തകരാര്‍ പരിഹരിക്കാന്‍ ശ്രമിച്ചുവെങ്കിലും ഇത് പരാജയപ്പെട്ടതിനെ തുടര്‍ന്നാണ് കയര്‍ കെട്ടി ഓരോരുത്തരെയായി താഴെയിറക്കിയത്. ആദ്യം കുട്ടികളുടെ മാതാവിനെയും പിന്നീട് കുട്ടികളെയും പുറത്തിറക്കി. ഫയര്‍ഫോഴ്‌സ് അംഗം കുട്ടികളെ കൈയ്യിലെടുത്തുകൊണ്ട് കയറിലൂടെ താഴെയിറങ്ങുകയായിരുന്നു.  

ALSO READ: കളമശേരിയില്‍ ഗുഡ്‌സ് ട്രെയിന്‍ പാളം തെറ്റി; എറണാകുളം റൂട്ടില്‍ ട്രെയിന്‍ ഗതാഗതത്തില്‍ നിയന്ത്രണം, ട്രെയിനുകള്‍ വൈകിയോടുന്നു

 ആകാശത്തിരുന്ന് ഭക്ഷണം കഴിക്കുന്നതിനായി അഡൈ്വഞ്ചര്‍ ടൂറിസത്തിന്റെ ഭാഗമായി രണ്ടു മാസം മുന്‍പാണ് സ്ഥാപനം ആരംഭിച്ചത്. 120 അടി ഉയരത്തിലാണ് ഇത് സ്ഥിതി ചെയ്യുന്നത്. അരമണിക്കൂറിലേറെ സമയമാണ് അവിടെ ചിലവിടുക. ഒരേസമയം 15 പേര്‍ക്ക് ഇരിക്കാനുള്ള സൗകര്യമാണ് ഇതിലുള്ളത്.

Tourists stranded 120 feet high on a sky dining platform near Munnar were rescued after a four-hour operation. Fire Force teams used ropes to safely bring down five people, including two young children.