മനാമ: ബഹ്‌റൈനില്‍ എല്ലാ ജോലിസ്ഥലങ്ങളിലും വനിതാ ജീവനക്കാര്‍ക്ക് ഇരിപ്പിടം നിര്‍ബന്ധമാക്കുന്നതിനുള്ള കരട് നിയമം ബാര്‍ലമെന്റില്‍. ഹനാന്‍ ഫര്‍ദാന്‍ മുന്നോട്ടുവച്ച ഈ നിര്‍ദേശം സംബന്ധിച്ച് ചൊവ്വാഴ്ച പാര്‍ലമെന്റ് ചര്‍ച്ച ചെയ്യും.  ജോലി സാഹചര്യങ്ങള്‍ മെച്ചപ്പെടുത്തുക, ദീര്‍ഘനേരം നില്‍ക്കുന്നതിന്റെ പ്രത്യാഘാതങ്ങള്‍ ലഘൂകരിച്ച് സ്ത്രീകളുടെ ആരോഗ്യത്തെ പിന്തുണയ്ക്കുക, ഉല്‍പ്പാദനക്ഷമത വര്‍ദ്ധിപ്പിക്കുക എന്നിവയാണ് സ്വകാര്യ മേഖലയിലെ തൊഴില്‍ നിയമത്തില്‍ ഭേദഗതി നിര്‍ദേശിക്കുന്ന കരട് നിയമം കൊണ്ട്  ലക്ഷ്യമിടുന്നത്. 

2012 ലെ 36ാം നമ്പര്‍ നിയമത്തിലെ ആര്‍ട്ടിക്കിള്‍ 36ല്‍ രണ്ടാമത്തെ ഖണ്ഡിക ചേര്‍ക്കുന്നതിനായി എംപി ഹനാന്‍ ഫര്‍ദാന്‍ സമര്‍പ്പിച്ച നിര്‍ദ്ദേശം പാര്‍ലമെന്റ് പരിശോധിക്കുകയും സേവന സമിതിയുടെ സമ്മതത്തോടെ പരിഷ്‌കരിക്കുകയും ചെയ്യും. ദീര്‍ഘനേരം ജോലി ചെയ്യുന്നതിനിടെ ഇരിക്കുന്നത് ശാരീരിക ക്ഷീണം കുറയ്ക്കുകയും തൊഴിലാളികളുടെ പ്രകടനം മെച്ചപ്പെടുത്തുകയും ചെയ്യുന്നുവെന്ന് ഹനാന്‍ ഫര്‍ദാന്‍ പറഞ്ഞു. സ്ഥിരമായ ചലനം ഉള്‍പ്പെടുന്ന ജോലികളില്‍ പോലും സീറ്റുകള്‍ നല്‍കേണ്ട കടമ ബാധകമാകണം. ഇരിക്കാന്‍ കഴിയുന്നത് വനിതാ തൊഴിലാളികള്‍ക്ക് ആശ്വാസവും സുരക്ഷയും നല്‍കുന്നു. ഇത് അവരുടെ മാനസികാവസ്ഥയും ഉല്‍പാദനക്ഷമതയും മെച്ചപ്പെടുത്തുകയും ആത്യന്തികമായി തൊഴിലുടമകള്‍ക്ക് പ്രയോജനം ചെയ്യുകയും ചെയ്യുന്നുവെന്നും അവര്‍ കൂട്ടിച്ചേര്‍ത്തു.

എന്നാല്‍ നിലവിലുള്ള നിയമങ്ങള്‍ ഇതിനകം തന്നെ വനിതകള്‍ക്ക് സുരക്ഷിതമായ തൊഴില്‍ അന്തരീക്ഷം ഉറപ്പാക്കുന്നുവെന്നും സ്ത്രീകളെ ജോലിക്കെടുക്കുന്നതുമായി ബന്ധപ്പെട്ട സമഗ്രമായ വ്യവസ്ഥകള്‍ നിലവിലുണ്ടെന്നുമാണ് തൊഴില്‍ മന്ത്രാലയം പറയുന്നത്. വിവേചന നിരോധനം, ശമ്പളവും ശമ്പളമില്ലാത്തതുമായ പ്രസവാവധി, വിവാഹമോ പ്രസവമോ കാരണം പിരിച്ചുവിടുന്നതില്‍ നിന്നുള്ള സംരക്ഷണം, മുലയൂട്ടല്‍, ശിശു സംരക്ഷണ ഇടവേളകള്‍ എന്നിവ ശമ്പളം നഷ്ടപ്പെടാതെ ജോലി സമയമായി കണക്കാക്കുന്നത് ഉള്‍പ്പെടെ സ്ത്രീ സൗഹൃദ നിയമങ്ങള്‍ മന്ത്രാലയം ചൂണ്ടിക്കാണിച്ചു. ഈ നിയമങ്ങള്‍ ഇതിനകം തന്നെ വനിതാ ജീവനക്കാരുടെ സുഖവും ക്ഷേമവും പുതിയ കരടിനെക്കാള്‍ വിശാലവും വിശദവുമായ രീതിയില്‍ ഉറപ്പാക്കുന്നുവെന്ന് മന്ത്രാലയം പറഞ്ഞു. ജോലിസ്ഥലത്തെ അക്രമവും ഉപദ്രവവും തടയാന്‍ നടപടികള്‍ കൈക്കൊള്ളേണ്ടത് തൊഴിലുടമകളുടെ കടമയാണെന്നും നിര്‍ദ്ദേശത്തിന്റെ മുന്‍ കരടില്‍ ഉള്‍പ്പെടുത്തിയിട്ടുണ്ടെന്നും മന്ത്രാലയം ഓര്‍മ്മിപ്പിച്ചു. 

അതേസമയം, നിലവിലുള്ള നിയമ നിര്‍മ്മാണം വനിതാ ജീവനക്കാര്‍ക്ക് മതിയായ സംരക്ഷണം നല്‍കുന്നുണ്ടെന്ന് ബഹ്‌റൈന്‍ ചേംബര്‍ ഓഫ് കൊമേഴ്‌സ് ആന്‍ഡ് ഇന്‍ഡസ്ട്രിയും ചൂണ്ടിക്കാട്ടി. ജനറല്‍ ഫെഡറേഷന്‍ ഓഫ് ബഹ്‌റൈന്‍ ട്രേഡ് യൂണിയനുകളും ബഹ്‌റൈന്‍ ഫ്രീ ലേബര്‍ യൂണിയന്‍സ് ഫെഡറേഷനും ഹനാന്‍ ഫര്‍ദാന്റെ ഭേദഗതിയെ പിന്തുണച്ചിട്ടുണ്ട്.

ALSO READ: അറബ് കപ്പിന് നാളെ തുടക്കം, ആദ്യ ദിവസം ഖത്തറും ഫലസ്തീനും ഏറ്റുമുട്ടും, വിറ്റ് പോയത് ഏഴുലക്ഷം ടിക്കറ്റുകള്‍; പൂര്‍ണ ഫിക്‌സറും സമയവും അറിഞ്ഞിരിക്കാം | FIFA Arab Cup Qatar 2025

Seats for female staff in all workplaces would be required under a draft law MPs will debate on Tuesday. Parliament is due to examine a proposal, submitted by MP Hanan Fardan and revised in agreement with the Services Committee, to add a second paragraph to Article 36 of Law No 36 of 2012.