അബൂദബി: യു.എ.ഇയിലെയും മിഡിൽ ഈസ്റ്റ് മേഖലയിലെയും ഏറ്റവും വലിയ പുതുവത്സരാഘോഷങ്ങളിലൊന്നിന് ആതിഥേയത്വം വഹിക്കാൻ അൽ വത്ബ ഒരുങ്ങുന്നു. 62 മിനിറ്റ് നീണ്ടു നിൽക്കുന്ന അഭൂതപൂർവമായ വെടിക്കെട്ട് പ്രദർശനം, ലോകത്തിലെ ഏറ്റവും വലിയ ഡ്രോൺ പ്രകടനം, പങ്കാളിത്ത രാജ്യങ്ങൾ, സ്പോൺസർമാർ, തന്ത്രപരമായ പങ്കാളികൾ എന്നിവർ അവതരിപ്പിക്കുന്ന വൈവിധ്യ സാംസ്കാരിക-പൈതൃക പരിപാടികൾ എന്നിവ ഉൾക്കൊള്ളുന്ന അസാധാരണമായ പരിപാടിക്ക് ശൈഖ് സായിദ് ഫെസ്റ്റിവലിന്റെ ഉന്നത സമിതി അന്തിമ രൂപം നൽകി.

അഞ്ച് പുതിയ ഗിന്നസ് വേൾഡ് റെക്കോഡുകൾ തീർക്കുക എന്ന ലക്ഷ്യത്തോടെ ഫെസ്റ്റിവൽ നാഴികക്കല്ലായ വെടിക്കെട്ട് പ്രദർശനം അവതരിപ്പിക്കും. പുതുവത്സരാഘോഷത്തിലുടനീളം അഞ്ച് ഘട്ടങ്ങളിലായി ഷോ നടക്കും. രാത്രി 8 മണിക്ക് ആരംഭിച്ച് അർധരാത്രിയിൽ തുടർച്ചയായി 62 മിനിറ്റ് നീണ്ടുനിൽക്കുന്ന പ്രധാന പ്രദർശനത്തോടെ അവസാനിക്കും.

ഏറ്റവും പുതിയ സിൻക്രണൈസേഷൻ, ലോഞ്ച് സാങ്കേതിക വിദ്യകൾ ഉപയോഗിച്ചാണ് വെടിക്കെട്ട് നടത്തുന്നത്. അൽ വത്ബയുടെ ആകാശത്ത് ഇത് വർണമനോഹരമായ കാഴ്ചയാണ് സൃഷ്ടിക്കുക. 20 മിനിറ്റ് ദൈർഘ്യമുള്ള ഒറ്റ പറക്കലിൽ 6,500 ഡ്രോണുകൾ പ്രകടനം നടത്തുന്ന ഡ്രോൺ ഷോയും സന്ദർശകർക്ക് കാണാനാകും.

എമിറാത്തി പൈതൃകവും ഐഡന്റിറ്റിയും ഉയർത്തിക്കാട്ടുന്ന സർക്കാർ പങ്കാളികളുടെ സംവേദനാത്മക സാംസ്കാരിക പ്രവർത്തനങ്ങൾ, ലൈറ്റിങ്, ലേസർ, ഡ്രോൺ സാങ്കേതിക വിദ്യകൾ നൽകുന്ന പ്രത്യേക പങ്കാളികളിൽ നിന്നുള്ള സാങ്കേതിക പിന്തുണ, പങ്കെടുക്കുന്ന രാജ്യങ്ങൾ അവതരിപ്പിക്കുന്ന കലാ-സാംസ്കാരിക-സംഗീത പരിപാടികൾ എന്നിവയും പ്രോഗ്രാമുകളിൽ ഉൾപ്പെടും.

പ്രധാന വ്യോമ പ്രദർശനങ്ങൾക്ക് പുറമേ, നൂറുകണക്കിന് ആർട്ടിസ്റ്റുകൾ പങ്കെടുക്കുന്ന അൽ അയാല, അൽ റാസ്ഫ, അൽ നദൂബ എന്നിവയുൾപ്പെടെയുള്ള പരമ്പരാഗത എമിറാത്തി പ്രകടനങ്ങളുടെ വിപുലമായ ഒരു നിര തന്നെ ഫെസ്റ്റിവലിൽ കാണാം.

പങ്കാളിത്ത രാജ്യങ്ങൾ വൈകുന്നേരം മുഴുവൻ കാർണിവൽ ശൈലിയിലുള്ള പരേഡുകൾ, സംഗീത പരിപാടികൾ, സാംസ്കാരിക പ്രകടനങ്ങൾ എന്നിവ അവതരിപ്പിക്കും.

ഈ വർഷം ഡിസംബറിൽ പുതുവത്സര ആഘോഷ വേളയിൽ കുടുംബങ്ങളുടെ പ്രധാന ആകർഷണമായി ആരംഭിച്ച കിഡ്‌സ് തിയേറ്ററിലെ കുട്ടികളുടെ ഷോകളും, പുതുതായി തുറന്ന വണ്ടർ ലാൻഡ് വിനോദ നഗരത്തിലെ പ്രവർത്തനങ്ങളും ഉൾപ്പെടെ സമർപ്പിത കുടുംബ പരിപാടികളും ഫെസ്റ്റിവൽ വാഗ്ദാനം ചെയ്യുന്നു.

സുഗമമായ നടത്തിപ്പിന് വിപുലമായ തയാറെടുപ്പുകൾ ഹയർ കമ്മിറ്റി പ്രഖ്യാപിച്ചു. സന്ദർശകരുടെ സുരക്ഷ നിലനിർത്താൻ സൈറ്റ് പൂർണ ശേഷിയിലെത്തിക്കഴിഞ്ഞാൽ പ്രവേശനം അവസാനിപ്പിക്കുമെന്ന് കമ്മിറ്റി സ്ഥിരീകരിച്ചു.

Abu Dhabi’s Al Wathba is preparing to host one of the UAE and region’s largest New Year’s Eve celebrations. The higher committee of the Sheikh Zayed Festival is finalising an exceptional program that promises a 62-minute fireworks show, the world’s largest drone performance, and a diverse lineup of cultural and heritage events presented by participating countries, sponsors, and strategic partners.