കോട്ടയം: കോട്ടയം നഗരസഭയില്‍ തിരുനക്കരയില്‍ എല്‍.ഡി.എഫ് സ്ഥാനാര്‍ഥിയായി മത്സരിച്ച ലതികാ സുഭാഷിന് വമ്പന്‍ തോല്‍വി. 48-ാം വാര്‍ഡായ തിരുനക്കരയില്‍ ലതികാ സുഭാഷ് മൂന്നാം സ്ഥാനത്തേക്ക് പിന്തള്ളപ്പെട്ടു. യു.ഡി.എഫിലെ സുശീല ഗോപകുമാറാണ് ഇവിടെ വിജയിച്ചത്. 

നേരത്തെ ജില്ലാ പഞ്ചായത്ത് പ്രസിഡന്റായിരുന്നു ലതിക. സുശീലക്ക് 703 വോട്ടുകളും ബി.ജെ.പി സ്ഥാനാര്‍ഥി നിത്യ രതീഷിന് 279 വോട്ടുകളും ലഭിച്ചു. അതേസമയം, ലതിക സുഭാഷ് നേടിയത് വെറും 113 വോട്ടുകളാണ്. 

2021ല്‍ സ്ഥാനാര്‍ഥി നിര്‍ണയത്തില്‍ തഴഞ്ഞതിന്റെ പേരില്‍ കോണ്‍ഗ്രസ് വിട്ട ലതികാ സുഭാഷ്, പിന്നീട് എന്‍.സി.പിയില്‍ ചേരുകയായിരുന്നു. അപ്രതീക്ഷിതമായിട്ടാണ് കോട്ടയത്ത് മത്സരത്തിനിറങ്ങിയത്. 

കോട്ടയം നഗരസഭയില്‍ ഒടുവിലത്തെ വിവരമനുസരിച്ച് 31 സീറ്റുകളില്‍ യു.ഡി.എഫ് വിജയിച്ചു. എല്‍.ഡി.എഫിന് 15 സീറ്റുകളിലും എന്‍.ഡി.എ 6 സീറ്റുകളിലും വിജയിച്ചു.