2026-ലെ ഐപിഎൽ ലേലത്തിൽ ചെന്നൈ സൂപ്പർ കിംഗ്‌സ് (CSK) നടത്തിയ ഏറ്റവും ശ്രദ്ധേയമായ ഒരു നീക്കമായിരുന്നു ന്യൂസിലൻഡ് താരം സാക്ക് ഫൗൾക്സിനെ (Zak Foulkes) ടീമിലെത്തിച്ചത്. അന്താരാഷ്ട്ര ക്രിക്കറ്റിലെ മിന്നും പ്രകടനങ്ങൾക്ക് പിന്നാലെ 75 ലക്ഷം രൂപയ്ക്കാണ് ഈ 23-കാരനായ പേസർ മഞ്ഞപ്പടയുടെ ഭാഗമായത്.

ഭാവിയിലെ ട്രെന്റ് ബോൾട്ടും ടിം സൗത്തിയുമായി ക്രിക്കറ്റ് ലോകം വിലയിരുത്തുന്ന സാക്കിനെക്കുറിച്ച് ആരാധകർ അറിഞ്ഞിരിക്കേണ്ട 5 രസകരമായ കാര്യങ്ങൾ താഴെ നൽകുന്നു.

1. പാരമ്പര്യമായി കിട്ടിയ ക്രിക്കറ്റ് ആവേശം

ക്രിക്കറ്റുമായി ആഴത്തിൽ ബന്ധമുള്ള ഒരു കുടുംബത്തിൽ നിന്നാണ് സാക്ക് വരുന്നത്. സാക്കിനെപ്പോലെ തന്നെ സഹോദരങ്ങളായ ലിയാം, റോബി എന്നിവരും പിതാവ് ഗ്ലെന്നും കാൻ്റർബറിക്ക് വേണ്ടി കളിച്ചിട്ടുള്ളവരാണ്. സഹോദരൻ റോബി ഫൗൾക്സ് 2024-ലെ അണ്ടർ 19 ലോകകപ്പിൽ ന്യൂസിലൻഡിനെ പ്രതിനിധീകരിച്ചപ്പോൾ, മറ്റൊരു സഹോദരനായ ലിയാം നിലവിൽ ക്രിക്കറ്റ് അയർലണ്ടിന്റെ ഗെയിം ഡെവലപ്‌മെന്റ് മാനേജരായി സേവനമനുഷ്ഠിക്കുന്നു.

2. ബൗളറല്ല, ഇതൊരു 'ബാറ്റിംഗ്' കരുത്ത്!

ലോകം ഇന്ന് സാക്കിനെ ഒരു പേസർ ആയിട്ടാണ് കാണുന്നതെങ്കിലും, താൻ ഒരു ബാറ്റർ ആണെന്ന് പറയാനാണ് അദ്ദേഹം ഇഷ്ടപ്പെടുന്നത്. കരിയറിൻ്റെ തുടക്കത്തിൽ ഒരു ടോപ്പ് ഓർഡർ ബാറ്റ്‌സ്‌മാനായിരുന്ന സാക്കിനെ, ഭാവിയിൽ ന്യൂസിലൻഡിൻ്റെ മികച്ച ഒരു ഓൾറൗണ്ടറായിട്ടാണ് (നമ്പർ 7 പൊസിഷൻ) മുൻ താരം പീറ്റർ ഫുൾട്ടൺ വിലയിരുത്തുന്നത്. ടി20യിൽ 140-ന് മുകളിലുള്ള അദ്ദേഹത്തിൻ്റെ സ്‌ട്രൈക്ക് റേറ്റ് ഇതിന് തെളിവാണ്.

3. ടെസ്റ്റ് അരങ്ങേറ്റത്തിലെ റെക്കോർഡ് നേട്ടം

2025 ഓഗസ്റ്റിൽ സിംബാബ്‌വെക്കെതിരായ ടെസ്റ്റ് മത്സരത്തിലൂടെയാണ് സാക്ക് റെഡ് ബോൾ ക്രിക്കറ്റിൽ അരങ്ങേറ്റം കുറിച്ചത്. ആദ്യ മത്സരത്തിൽ തന്നെ രണ്ട് ഇന്നിംഗ്‌സുകളിൽ നിന്നുമായി 75 റൺസ് വഴങ്ങി 9 വിക്കറ്റുകൾ വീഴ്ത്തി അദ്ദേഹം ചരിത്രം കുറിച്ചു. ഒരു ന്യൂസിലൻഡ് താരം തൻ്റെ അരങ്ങേറ്റ ടെസ്റ്റിൽ കുറിക്കുന്ന ഏറ്റവും മികച്ച മാച്ച് ഫിഗറാണിത്. വില്യം ഒ'റൂർക്കിൻ്റെ റെക്കോർഡാണ് സാക്ക് ഇവിടെ തകർത്തത്.

4. റഗ്ബി മൈതാനത്തെ പരീക്ഷണങ്ങൾ

മിക്ക ന്യൂസിലൻഡ് യുവാക്കളെയും പോലെ സാക്കും കുട്ടിക്കാലത്ത് റഗ്ബിയിൽ ഒരു കൈ നോക്കിയിരുന്നു. എന്നാൽ വേഗതയുടെ കാര്യത്തിൽ അല്പം പിന്നിലായതിനാൽ റഗ്ബി കരിയർ മുന്നോട്ട് കൊണ്ടുപോകാൻ അദ്ദേഹത്തിന് കഴിഞ്ഞില്ല. ഒടുവിൽ വേഗതയും സ്വിംഗും പന്തിൽ പരീക്ഷിച്ച് അദ്ദേഹം ക്രിക്കറ്റിൽ തൻ്റെ ഇടം കണ്ടെത്തുകയായിരുന്നു.

5. അവസാന പന്തിലെ ആ സിക്സർ!

2024-ലെ സൂപ്പർ സ്മാഷ് എലിമിനേഷൻ ഫൈനലിൽ കാൻ്റർബറിയെ വിജയത്തിലെത്തിച്ച പ്രകടനം ആരാധകർ അത്രവേഗം മറക്കില്ല. വെല്ലിംഗ്ടണിനെതിരായ മത്സരത്തിൽ അവസാന പന്തിൽ വിജയിക്കാൻ 3 റൺസ് വേണമെന്നിരിക്കെ, ലോഗൻ വാൻ ബീക്കിനെ സിക്സറിന് പറത്തിയാണ് സാക്ക് ടീമിനെ ഫൈനലിലേക്ക് നയിച്ചത്. വെറും 7 പന്തിൽ 11 റൺസും 3 വിക്കറ്റും നേടിയ സാക്കായിരുന്നു അന്ന് ആ വിജയശില്പി.