ആലപ്പുഴ: ആലപ്പുഴ ജില്ല ജയിലില്‍ പോക്‌സോ കേസ് പ്രതിക്ക് സഹതടവുകാരന്റെ മര്‍ദനം. പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച കേസിലെ പ്രതിയായ 85 കാരനായ തങ്കപ്പന്‍ എന്നയാള്‍ക്ക് നേരെയാണ് അക്രമം. തനിക്കും പെണ്‍മക്കളുണ്ടെന്ന് പറഞ്ഞ് പ്രതിയുടെ പല്ല് അടിച്ചു കൊഴിക്കുകയായിരുന്നു.കഴിഞ്ഞ ദിവസമായിരുന്നു സംഭവം. 

മോഷണക്കേസില്‍ ശിക്ഷിക്കപ്പെട്ട് ജയിലുള്ളയാളാണ് തങ്കപ്പനെ മര്‍ദ്ദിച്ചത്. കഴിഞ്ഞ ദിവസമാണ് തങ്കപ്പന്‍ ജയിലിലെത്തിയത്.

സഹതടവുകാരന് തങ്കപ്പന്‍ ഏത് കേസിലെ പ്രതിയാണെന്ന് ആദ്യം അറിയില്ലായിരുന്നു. പിന്നീട് തങ്കപ്പന്‍ പോക്‌സോ കേസ് പ്രതിയാണെന്ന് അറിഞ്ഞതിനെ തുടര്‍ന്നായിരുന്നു മര്‍ദനം. അടിയേറ്റ് തങ്കപ്പന്റെ പല്ല് കൊഴിഞ്ഞിട്ടുണ്ട്. പരുക്കേറ്റ ഇയാളെ ആശുപത്രിയില്‍ പ്രവേശിപ്പിച്ച് ചികിത്സ നല്‍കി. 

സംഭവത്തില്‍ തങ്കപ്പനെ മര്‍ദ്ദിച്ച സഹതടവുകാരനെതിരെ ആലപ്പുഴ സൗത്ത് പൊലിസ് കേസെടുത്തിട്ടുണ്ട്.