പാരിസ്: ജന്‍ ശിക്ഷണ്‍ സന്‍സ്ഥാന്‍ (ജെ.എസ്.എസ്) മലപ്പുറം യൂനിറ്റ് യുനെസ്‌കോ സാക്ഷരതാ പുരസ്‌കാരം ഏറ്റുവാങ്ങി.
യുനെസ്‌കോ ഡയറക്ടര്‍ ജനറല്‍ ഐറിന ബൊക്കോവയില്‍ നിന്ന് കേന്ദ്ര മാനവവിഭവ ശേഷി സഹമന്ത്രി ഉപേന്ദ്ര കുശ്വഹ, ജെ.എസ്.എസ്. ചെയര്‍മാന്‍ പി.വി അബ്ദുല്‍വഹാബ് എം.പി എന്നിവര്‍ അവാര്‍ഡ് സ്വീകരിച്ചു. ഇത് ഇന്ത്യന്‍ സര്‍ക്കാരിന് ജെ.എസ്.എസ് മലപ്പുറത്തിലൂടെ ലഭിച്ച അംഗീകാരമാണെന്ന് മന്ത്രി ഉപേന്ദ്ര കുശ്വഹ മറുപടി പ്രസംഗത്തില്‍ പറഞ്ഞു.   മലപ്പുറത്ത് നടപ്പാക്കി വരുന്ന സാക്ഷര-തൊഴില്‍ നൈപുണ്യ പ്രവര്‍ത്തനങ്ങളാണ് അവാര്‍ഡിന് പരിഗണിച്ചത്. 2006ലാണ് ജെ.എസ്.എസ് ജില്ലയില്‍ പ്രവര്‍ത്തനങ്ങള്‍ തുടങ്ങുന്നത്. മൂന്ന് വര്‍ഷത്തെ പ്രവര്‍ത്തനങ്ങളാണ് അവാര്‍ഡിന് പരിഗണിച്ചത്. ഇന്ത്യയെ പ്രതിനിധീകരിച്ച് രണ്ട് പദ്ധതികളാണ് സമര്‍പ്പിക്കപ്പെട്ടത്.
2014 ഭാരത സര്‍ക്കാരിന്റെ സാക്ഷര ഭാരത് അവാര്‍ഡും ജെ.എസ്.എസിനായിരുന്നു. സാക്ഷരതാ പ്രവര്‍ത്തനങ്ങളുടെ അന്‍പതാം വാര്‍ഷികാഘോഷങ്ങളുടെ ഭാഗമായി നടന്ന ചര്‍ച്ചയില്‍ പി.വി അബ്ദുല്‍വഹാബ് ക്ഷണിതാവായിരുന്നു.