കണ്ണൂര്‍: സംസ്ഥാനത്തെ ജയില്‍ തടവുകാരുടെ വേതനം വര്‍ധിപ്പിച്ചതിനെ അനുകൂലിച്ച് സി.പി.എം നേതാവ് ഇ.പി ജയരാജന്‍. തടവുകാരുടെ വേതനം വര്‍ധിപ്പിച്ചതിനെ എന്തിനാണ് എതിര്‍ക്കുന്നതെന്നും ജയിലിലുള്ളത് പാവങ്ങളാണെന്നും ഇ.പി പറഞ്ഞു. 

''വേതന വര്‍ധനവിനെ എതിര്‍ക്കുന്നത് തെറ്റായ നിലപാടാണ്. വേതനം കൂട്ടിയതിനെ പ്രശംസിക്കുകയാണ് വേണ്ടത്. ജയിലിലുള്ളത് പാവങ്ങളാണ്. പല കാരണങ്ങള്‍ കൊണ്ട് കുറ്റവാളികളായവരാണ്. ജയിലില്‍ അത്യാവശ്യ സാധനങ്ങള്‍ വാങ്ങാന്‍ ഈ കൂലി അവര്‍ക്ക് ഉപകാരപ്പെടും. സര്‍ക്കാര്‍ കാലോചിതമായ പരിഷ്‌കരണമാണ് കൊണ്ടുവന്നത്. എന്തിനാണ് ഈ ദ്രോഹം ചെയ്യുന്നത്. കൊലക്കുറ്റം ചെയ്തവരും ക്രിമിനലുകളുമാകാം. എങ്കിലും ജീവപര്യന്തം അവര്‍ ആ ജയിലില്‍ അല്ലെ. പണിയെടുത്ത് കിട്ടുന്ന കൂലി കുറച്ച് സ്വന്തം ആവശ്യത്തിന് ഉപയോഗിച്ച് ബാക്കി വര്‍ഷങ്ങള്‍ക്ക് ശേഷം ജയിലില്‍ നിന്ന് പുറത്തിറങ്ങുമ്പോള്‍ ഉപയോഗിക്കും. ഇങ്ങനെയുള്ള ആനുകൂല്യത്തെ എന്തിനാണ് എതിര്‍ക്കുന്നത്''-  ഇ.പി ജയരാജന്‍ പറഞ്ഞു.

അതേസമയം, തൊഴിലുറപ്പിന്റെയും ആശമാരുടേയും വേതനം കൂട്ടാന്‍ കേന്ദ്രത്തോട് ആവശ്യപ്പെടണമെന്നും ഇ.പി കൂട്ടിച്ചേര്‍ത്തു. 

ജയില്‍ തടവുകാരുടെ പ്രതിദിന വേതനത്തില്‍ പത്ത് മടങ്ങ് വരെയാണ് വര്‍ധന വരുത്തിയത്. സ്‌കില്‍ഡ് ജോലികളില്‍ ഏര്‍പ്പെടുന്നവര്‍ക്ക് 620 രൂപയായിരിക്കും പുതുക്കിയ വേതനം. സെമി സ്‌കില്‍ഡ് ജോലികളില്‍ 560രൂപയും അണ്‍ സ്‌കില്‍ഡ് ജോലികളില്‍ 530 രൂപയുമാണ് പരിഷ്‌കരിച്ച കൂലി. മുമ്പ് അണ്‍ സ്‌കില്‍ഡ് ജോലികള്‍ ചെയ്യുന്നവര്‍ക്ക് 63 രൂപ ആയിരുന്നു നല്‍കിയിരുന്നത്. ഇത് 530 രൂപയായാണ് ഉയര്‍ത്തിയത്. 127 രൂപ വേതനമുണ്ടായിരുന്നവര്‍ക്ക് ഇനി 560 ഉം 152 രൂപയുണ്ടായിരുന്നവര്‍ക്ക് ഇനി 620 രൂപയും ലഭിക്കും. ജയിലുകളില്‍ കഴിയുന്ന ശിക്ഷാതടവുകാര്‍ക്ക് ആണ് കൂലിയുള്ള ജോലിയുള്ളത്. നാല് സെന്‍ട്രല്‍ ജയിലുകളിലെ തടവുകാര്‍ക്ക് ആനുകൂല്യം ലഭിക്കും. വേതനം കൂട്ടണമെന്ന ജയില്‍ മേധാവിയുടെ ശുപാര്‍ശ തത്വത്തില്‍ സര്‍ക്കാര്‍ അംഗീകരിക്കുകയായിരുന്നു. ജയില്‍ അന്തേവാസികളുടെ വേതനം പരിഷ്‌കരിക്കേണ്ടത് അത്യാവശ്യമാണെന്നും മറ്റു സംസ്ഥാനങ്ങളില്‍ ഇതിനകം വേതനപരിഷ്‌കരണംനടപ്പിലാക്കിയിട്ടുണ്ടെന്നും ശുപാര്‍ശയില്‍ പറയുന്നു. 

പരിഷ്‌കാരത്തിലൂടെ മൂവായിരത്തിലധികം ജയില്‍പുള്ളികള്‍ക്കാണ് വേതനം കൂടുക. 2018ല്‍ ആണ് തടവുപുള്ളികളുടെ വേതനം അവസാനമായി കൂട്ടിയത്. ഇത്രയും വലിയ തുക കൂട്ടുന്നത് ഇതാദ്യമാണ്. ജയിലിലെ അന്തേവാസികളെ സ്വയം പര്യാപ്തരാക്കി സമൂഹത്തിലേക്ക് മടക്കിഅയക്കുക എന്ന ജയില്‍ വകുപ്പിന്റെ ദൗത്യം മുന്‍നിര്‍ത്തി സ്‌കില്‍ഡ്, സെമി സ്‌കില്‍ഡ്, അണ്‍സ്‌കില്‍ഡ് എന്നിങ്ങനെ മൂന്ന് വിഭാഗങ്ങളായി സംസ്ഥാനത്തെ എല്ലാ ജയിലുകളിലെയും വേതന ഘടന ഏകീകരിച്ചാണ് വേതനം പരിഷ്‌കരിച്ചിട്ടുള്ളതെന്ന് ആഭ്യന്തര വകുപ്പ് പുറത്തിറക്കിയ ഉത്തരവില്‍ പറയുന്നു.

CPM leader E.P. Jayarajan has come out in support of the Kerala government’s decision to increase the wages of prison inmates, questioning why the move is being opposed.