തിരുവനന്തപുരം: ബജറ്റവതരണത്തിന് മുന്നോടിയായി ധനമന്ത്രിയുടെ ഫേസ്ബുക്ക് പോസ്റ്റ്. നാടിന്റെ ഭാവിക്ക് മുതല്‍ക്കൂട്ടാകുന്ന പല പദ്ധതികളും പ്രഖ്യാപനങ്ങളും ബജറ്റിലുണ്ടാകുമെന്നാണ് ധനമന്ത്രി കെ.എന്‍ ബാലഗോപാല്‍ ഉറപ്പു നല്‍കുന്നത്. വികസന വിപ്ലവത്തെ കൂടുതല്‍ കരുത്തോടെ മുന്നോട്ടു കൊണ്ടുപോകാനുള്ള രേഖയായി ബജറ്റിനു മാറാന്‍ കഴിയും  എന്നാണ് പ്രതീക്ഷയും മന്ത്രി തന്റെ പോസ്റ്റില്‍ പങ്കുവെക്കുന്നു.    

പോസ്റ്റ് ഇങ്ങനെ
രണ്ടാം പിണറായി സര്‍ക്കാരിന്റെ   ആറാമത്തെ ബജറ്റ് ഇന്ന് അവതരിപ്പിക്കുകയാണ്. നാടിന്റെ ഭാവിക്ക് മുതല്‍ക്കൂട്ടാകുന്ന പല പദ്ധതികളും പ്രഖ്യാപനങ്ങളും ബജറ്റിലുണ്ടാകും. എല്‍ഡിഎഫ് സര്‍ക്കാര്‍ കേരളത്തിന് അനുഭവേദ്യമാക്കിയ വികസന വിപ്ലവത്തെ കൂടുതല്‍ കരുത്തോടെ മുന്നോട്ടു കൊണ്ടുപോകാനുള്ള രേഖയായി ബജറ്റിനു മാറാന്‍ കഴിയും  എന്നാണ് പ്രതീക്ഷിക്കുന്നത്.

രാവിലെ ഒന്‍പത് മണിക്കാണ് ബജറ്റ് അവതരണം ആരംഭിക്കുക. ക്ഷേമപെന്‍ഷന്‍ വര്‍ധിപ്പിക്കുന്നത് അടക്കമുള്ള ജനക്ഷേമ പ്രഖ്യാപനങ്ങള്‍ ബജറ്റില്‍ ഉണ്ടാകുമെന്നാണ് പ്രതീക്ഷ.സര്‍ക്കാര്‍ ജീവനക്കാരുടെ ശമ്പള പരിഷ്‌കരണം, അതിവേഗ പാത, വിഴിഞ്ഞം അനുബന്ധ വികസന പദ്ധതികള്‍, പരമ്പരാഗത വ്യവസായങ്ങള്‍ക്കുള്ള സഹായം, വയോജന സംരക്ഷണ പദ്ധതികള്‍, ചില വന്‍കിട വ്യവസായ പദ്ധതികള്‍ എന്നിവ ബജറ്റിലുണ്ടാകുമെന്നും പ്രതീക്ഷിക്കുന്നു. 

ALSO READ: പെട്ടിയില്‍ സസ്‌പെന്‍സ്! രണ്ടാം പിണറായി സര്‍ക്കാരിന്റെ അവസാന ബജറ്റ് ഇന്ന് സഭയില്‍ 

ക്ഷേമ പ്രവര്‍ത്തനങ്ങള്‍ക്ക് കേന്ദ്രത്തിന്റെ സാമ്പത്തിക ഉപരോധം മാത്രമാണ് തടസമെന്നാണ് ധനവകുപ്പ് പറയുന്നത്. അഞ്ചുവര്‍ഷത്തിനിടെ ആശാവഹമായ മാറ്റം സംസ്ഥാനത്ത് ഉണ്ടായതെന്നും, കടമെടുപ്പ് നിരക്ക് കാര്യമായ കുറവുണ്ടായെന്നുമാണ് ധനമന്ത്രി ഇന്നലെ പ്രതികരിച്ചത്.

ahead of the kerala budget presentation, finance minister k n balagopal says the budget will include key announcements and projects aimed at strengthening development and shaping the state’s future.