കുണിയ: ചരിത്രം അങ്ങിനെയാണ്... ചിലപ്പോൾ സ്വയം തിരുത്തപ്പെടും. എന്നാൽ ഇസ്‌ലാമിക ചരിത്രത്തിലെ സുവർണ കാലഘട്ടം എന്ന (ഇസ്‌ലാമിക് ഗോൾഡൻ ഏജ്)  ഗ്ലോബൽ എക്സ്പോ പവലിയൻ കാഴ്ചക്കാരെ ചിതലരിച്ചു പോയ സ്‌പെയിന്റെ ചരിത്ര നാഗരികതയിലേക്കാണ് കൂട്ടിക്കൊണ്ടുപോകുന്നത്. 10-ാം നൂറ്റാണ്ടിലെ സ്‌പെയിനിലെ ഭരണാധികാരി നിർമിച്ച മദീനത്ത് സഹ്‌റ എന്ന നഗരം പുനരാവിഷ്‌കരിച്ചിരിക്കുകയാണ് ഇവിടെ. ആറാം നൂറ്റാണ്ട് മുതൽ 14-ാം നൂറ്റാണ്ട് വരെയുള്ള ഇസ്‌ലാമിന്റെ ഭരണ, സാംസ്‌കാരിക, സാമൂഹിക പശ്ചാത്തല കാഴ്ചയുടെ വിസ്മയം തീർക്കുകയാണ് ഗ്ലോബൽ എക്‌സ്‌പോയിലെ ഇസ്‌ലാമിക് ഗോൾഡൻ ഏജ് എന്ന പവലിയൻ. അന്നത്തെ പ്രമുഖരുടെ കണ്ടുപിടുത്തങ്ങൾ, പ്രാചീനകാലത്തെ ആശുപത്രി, ജലസേചന മാർഗം, ലൈബ്രറി, മതപഠനശാല തുടങ്ങിയവ  ഗതകാല സ്മൃതികളിലേക്കാണ് കാണികളെ നയിക്കുന്നത്.

ബാബ് അൽ സുദ്ദയാണ് രാജകൊട്ടാരത്തിലേക്കുള്ള ഔദ്യോഗിക പ്രവേശന കവാടം. ഇതുവഴിയാണ് ഭരണാധികാരിയുടെ പ്രവേശനം. രാഷ്്ട്രീയ അധികാരവും സാമ്രാജ്യത്വ ശക്തിയും പ്രകടിപ്പിക്കുന്നതിനാണ് ഈ കവാടം നിർമിച്ചത്. കൊട്ടാരത്തിന്റെ വടക്ക് കിഴക്ക് ഭാഗത്തായാണ് ഈ കവാടം. 14 വലിയ കമാനങ്ങൾ ചേർന്ന് രൂപകൽപന ചെയ്ത വലിയ പോർട്ടിക്കോ ആണ് ഇതിന്റെ പ്രത്യേകത. മുഖ്യപ്രവേശന കവാടം കുതിരക്കാൽ ആകൃതിയിലുള്ളതാണ്. ഇതിന് മുകളിലെ ചെറിയ മണ്ഡപത്തിലാണ് ഖലീഫ പ്രത്യക്ഷപ്പെടുക. പ്രജകൾക്ക് താഴെ പ്രത്യേക ഇരിപ്പിടവുമുണ്ടായിരുന്നു. 

ബാബ് അൽ സുദ്ദ വഴി പ്രവേശിച്ചാൽ ഇസ്‌ലാമിക ശരീഅത്ത് അടിസ്ഥാനമാക്കി പ്രവർത്തിച്ചിരുന്ന അൻദലുസിലെ മാർക്കറ്റാണ് ആദ്യം കൺമുമ്പിലെത്തുന്നത്. പള്ളികൾക്കും പ്രധാന വഴികൾക്കും ഇടയിലായിരുന്നു ഈ മാർക്കറ്റ് പ്രവർത്തിച്ചിരുന്നത്. മെഡിറ്ററേനിയൻ വ്യാപാര ശൃംഖലകളുമായി ബന്ധപ്പെട്ട ഈ മാർക്കറ്റുകൾ  സാമ്പത്തിക സമൃദ്ധിയെ പ്രതിഫലിപ്പിക്കുന്നതായിരുന്നു. അക്കാലത്ത് ഉപയോഗിച്ചിരുന്ന വസ്ത്രങ്ങൾ, പാത്രങ്ങൾ, അളവ് ഉപരണങ്ങൾ, ഹുക്ക തുടങ്ങി അന്നത്തെ ജീവിത വ്യവസ്ഥയുടെ നേർക്കാഴ്ചയാണ് ഇവിടം. അന്നത്തെ വലിയൊരു ഗ്രന്ഥശാലയും ഇവിടെ പുനരാവിഷ്‌ക്കരിച്ചിട്ടുണ്ട്.